The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​រោងចក្រ​ជាង​ ៦០ ​នាក់​នៅ​ទន្លេ​បាទី​ដួល​សន្លប់




កម្មករ​រោងចក្រ​ជាង​ ៦០ ​នាក់​នៅ​ទន្លេ​បាទី​ដួល​សន្លប់

ការ​រស់នៅ​ខ្វះ​អនាម័យ​​ និង​អាហារ​គ្មាន​ជីវជាតិ កម្មការិនី​តែង​ដួល​សន្លប់​​​។
ការ​រស់នៅ​ខ្វះ​អនាម័យ​​ និង​អាហារ​គ្មាន​ជីវជាតិ កម្មការិនី​តែង​ដួល​សន្លប់​​​។ ផា លីណា

កម្មករ​រោងចក្រ​ជាង​ ៦០ ​នាក់​នៅ​ទន្លេ​បាទី​ដួល​សន្លប់

តាកែវៈ នគរបាល​ឲ្យ​ដឹង​ថា​កម្មករ​ជាង​ ៦០ នាក់​ទៀត​បាន​ដួល​សន្លប់​កាលពី​រសៀល​ម្សិលមិញ​ដោយសារ​ការ​ពុល​ចំណី​អាហារ​នៅ​រោងចក្រ​កាត់ដេរ វូណាមមី (Vonammy) ស្ថិត​នៅក្នុង​ស្រុក​បាទី ខេត្ត​តាកែវ​។

លោក ឈន ទ្រឿន អធិការរង​នគរបាល​ស្រុក​បាទី​ឲ្យ​ដឹង​ថា​មាន​កម្មករ​ ៦៤ ​នាក់​បាន​ដួល​សន្លប់ បន្ទាប់​ពី​ហូប​បាយ​ថ្ងៃត្រង់​រួច​កាលពី​ម្សិលមិញ​ដោយសារ​ហូប​ផ្អក​កំពឹស​ដែល​ទិញ​មក​ពី​ក្រៅ​រោងចក្រ​។

លោក​ថា ៖ «ពួកគេ​ទាំងអស់​សុទ្ធតែ​កម្មការិនី​។ ពួកគេ​ពុល​ផ្អក​កំពឹស​តែ​អ្នក​ខ្លះ​ថា​មកពី​ក្លិន​ក្រណាត់​ក្នុង​រោងចក្រ។ យើង​ឃើញ​មាន​អ្នក​ខ្លះ​ក្អួត​ចង្អោរ​ហើយ​ត្រូវ​បាន​បញ្ជូន​ទៅ​មន្ទីរពេទ្យ​បង្អែក​ក្បែរ​នោះ និង​ខ្លះ​ទៅ​ពេទ្យ​ឯកជន»។

ទោះ​យ៉ាងណា លោក ជាវ ប៊ុនរិទ្ធ មន្ត្រី​នាំ​ពាក្យ​នៃ​បេឡាជាតិ​របប​សន្តិសុខ​សង្គម (ប ស ស) ​​នៃ​ក្រសួង​ការងារ​ និង​បណ្តុះបណ្តាល​វិជ្ជាជីវៈ​ដែល​ជា​អ្នក​ចេញ​ថ្លៃ​រ៉ាប់រង​ការ​ថែទាំ​សុខភាព​របស់​កម្មករ​ដួល​សន្លប់​នេះ​បាន​ឲ្យ​ដឹង​ថា​តួលេខ​បឋម​ដែល​ទទួល​បាន​មាន​ត្រឹមតែ​ ៦១ នាក់​ប៉ុណ្ណោះ។

លោក​ថា ៖ «ពួកគេ​សន្លប់​ដោយសារ​ពុល​ចំណី​អាហារ​។ យើង​បាន​ឲ្យ​ពេទ្យ​សុង​ក្រពះ​ពួកគេ​ហើយ»។

លោក​ឲ្យ​ដឹង​ថា​នៅ​ខេត្ត​កំពង់ឆ្នាំង រោងចក្រ​ M&V ក៏​មាន​ករណី​នៃ​ការ​ដួល​សន្លប់​ដែល​មាន​ចំនួន​ ៣ នាក់​ផង​ដែរ​កាលពី​ម្សិលមិញ។

គួរ​រំឭក​ផង​ដែរ​ថា​កាលពី​ឆ្នាំ​ ២០១៤ មាន​ករណី​សន្លប់​នៅ​តាម​រោងចក្រ​កាត់ដេរ​ទូទាំង​ប្រទេស​មាន​ ១៨០៦ ករណី​ដែល​កើនឡើង​លើស​ពី​ឆ្នាំ​ ២០១៣ ជាង​ ១០០ ​ភាគរយ​។ នេះ​បើ​តាម​របាយការណ៍​ប្រចាំ​ឆ្នាំ​ ២០១៤ របស់ ប ស ស ដែល​ឲ្យ​ដឹង​បន្ត​ថា​មាន​រោងចក្រ​ចំនួន​ ៣៤ ​​រោងចក្រ​កើត​មាន​ករណី​សន្លប់​។

របាយការណ៍​ថា​ ករណី​ភាគច្រើន​កើតឡើង​ពី​កម្ដៅ​នៅក្នុង​រោងចក្រ​ដោយសារ​មិន​មាន​កង្ហារទឹក ការ​អស់​កម្លាំង ការ​មាន​ធុំក្លិន​នៅក្នុង​រោងចក្រ និង​កើត​ពី​អារម្មណ៍​តក់ស្លុត​ជាដើម។

នៅ​ ៦ ខែ​ដើម​ឆ្នាំ​ ២០១៥ នេះ ករណី​កម្មករ​សន្លប់​មាន ៥៥៧ ករណី តិច​ជាង​ឆ្នាំ ២០១៤ ដែល​ ៦ ខែ​មាន ៨៩៦ ​ករណី៕

អត្ថបទគួរចាប់អារម្មណ៍