ភ្នំពេញៈ កម្មករកាត់ដេរមកពីរោងចក្រចំនួន ៤ ដែលថៅកែបិទទ្វាររត់ចោលបានលើកឡើងនូវក្តីបារម្ភរបស់ខ្លួនអំពីកញ្ចប់សំណង ដែលរៀបចំឡើងដោយក្រសួងការងារដែលបានបិទនៅលើជញ្ជាំងរោងចក្រដោយអះអាងថា ចំនួនប្រាក់សំណងនោះមិនគ្រប់នឹងចំនួនដែលជំពាក់ពួកគេ។
កាលពីខែកុម្ភៈក្រសួងបានប្រកាសថា ក្រសួងបានកំណត់ថវិកាចំនួន ៤,៦ លានដុល្លារ ដើម្បីសងប្រាក់បំណាច់ដល់កម្មករនៅរោងចក្រចំនួន ៩ ដែលថៅកែបានបិទទ្វារ និងរត់ចោល ហើយការប្រកាសនេះបានធ្វើឡើងភ្លាមៗ បន្ទាប់ពីម្ចាស់រោងចក្រ Yu Fa ជនជាតិតៃវ៉ាន់ក្នុងខណ្ឌពោធិ៍សែនជ័យបានបិទទ្វារ ហើយរត់គេចខ្លួន ខណៈកម្មករកំពុងទៅចូលរួមពិធីសំណេះសំណាលជាមួយលោកនាយករដ្ឋមន្ត្រី ហ៊ុន សែន។
បន្ទាប់ពីការប្រកាសកាលពីសប្តាហ៍មុនថាកម្មករនៅរោងចក្រចំនួន ៤ រួមមានរោងចក្រ Benoh Apparel រោងចក្រ Yu Fa Garment Industry រោងចក្រ Great Honour Textile Factory និងរោងចក្រ Chung Fai Knitwear នឹងត្រូវផ្តល់សំណងមុនចូលឆ្នាំខ្មែរ ក្រសួងការងារបានបិទប្រកាសពីចំនួនប្រាក់សំណងនៅរោងចក្រនីមួយៗកាលពីថ្ងៃសុក្រ។
ទោះយ៉ាងណាក្តី កម្មករបានអះអាងថា ការគណនាដែលធ្វើឡើងដោយពួកគេខ្លួនឯង និងសហជីពមិនត្រូវគ្នានឹងចំនួនសំណងនៅក្នុងឯកសាររបស់ក្រសួងនោះទេ។
អ្នកនាង រឿម សៅលាប ដែលជាកម្មការិនីនៅរោងចក្រ Benoh Apparel បានថ្លែងថា វាគួរឲ្យខកចិត្តដែលឃើញថា អ្នកនាងនឹងទទួលបានតែ ៤១ ដុល្លារ បន្ទាប់ពីធ្វើការអស់រយៈពេល ៩ ឆ្នាំនៅរោងចក្រនេះហើយចង្អុលបង្ហាញថា អ្នកនាងស្ថិតនៅក្នុងកិច្ចសន្យាមានថិរវេលាកំណត់ ៦ ខែក្នុងអំឡុងពេលនោះ។
កិច្ចសន្យារយៈពេលខ្លីគឺជាបញ្ហាមួយដែលបន្តយាយីវិស័យនេះ ខណៈក្រុមអ្នកតស៊ូមតិសិទ្ធិការងារបានថ្លែងថាវាបំពានបទប្បញ្ញត្តិនៃច្បាប់ស្តីពីការងារដែលកម្មករគួរតែទទួលបានកិច្ចសន្យាមានថិរវេលាមិនកំណត់ បន្ទាប់ពីធ្វើការបាន ២ ឆ្នាំ។ រោងចក្រ Benoh Apparel បានឈប់ប្រតិបត្តិការកាលពីខែវិច្ឆិកា និងផ្តល់ឲ្យកម្មករចំនួន ៦០ ដុល្លារសម្រាប់ការព្យួរការងាររយៈពេល ២ ខែដោយសន្យាថានឹងបើកដំណើរការវិញនៅខែមករា។ ប៉ុន្តែកម្មករបានដឹងថាថៅកែរោងចក្របានរត់គេចខ្លួននៅពេលពួកគេត្រឡប់ទៅធ្វើការវិញ។
អ្នកនាងបានថ្លែងបន្តថា៖ «កម្មករជាច្រើននៅរោងចក្រ Benoh ឥឡូវនេះទទួលបានសំណងពី ១៧ ដុល្លារទៅ ៤៥ ដុល្លារ។ វាតិចតួចណាស់ហើយសហជីពជួយគណនាខ្ញុំ ខ្ញុំទទួលបានប្រហែល ៣០០០ ដុល្លារ ប៉ុន្តែនៅក្នុងបញ្ជីពីក្រសួងការងារ ខ្ញុំទទួលបានតែ ៤១ ដុល្លារ»។
សំណងសម្រាប់កម្មករ គឺគិតទៅលើកត្តា ៥ ក្នុងនោះមានប្រាក់ខែមិនទាន់បើក ការឈប់សម្រាកប្រចាំឆ្នាំដែលនៅសល់ប្រាក់បំណាច់បណ្តេញចេញប្រាក់សំណងសម្រាប់ការមិនបានជូនដំណឹង និងប្រាក់ជំងឺចិត្ត។
អ្នកនាង កឿន ជីវិន ជាកម្មការិនីនៅរោងចក្រ Chung Fai បានថ្លែងថា ការគណនារបស់ក្រសួងពិចារណាតែកត្តា ៣ ដំបូង និងមិនពិចារណាកត្តា ២ ខាងក្រោយនោះទេ។ អ្នកនាងអះអាងថានាងត្រូវទទួលបានប្រហែល ២៦០០ ដុល្លារ ប៉ុន្តែត្រូវបានកំណត់ឲ្យទទួលបាន ១៥០៤ ដុល្លារ។ អ្នកនាងបន្តថា៖ «យើងខកចិត្តចំពោះអ្វីដែលយើងបានឮពីការសន្យារបស់នាយករដ្ឋមន្ត្រីដែលថាយើងនឹងទទួលបានសំណងទាំងអស់ទៅតាមច្បាប់»។ «ក្រសួងបានឆ្លើយតប...ថា ថវិកាដែលរដ្ឋាភិបាលមានគឺសម្រាប់កម្មករជាង ៤០០០ នាក់ ដូច្នេះមិនអាចផ្តល់គ្រប់អ្វីៗឲ្យសុក្រឹតនោះទេ ហើយពួកគេបានព្យាយាមខិតខំអស់ពីសមត្ថភាពក្នុងការផ្តល់សំណងនោះ»។
អ្នកនាំពាក្យក្រសួងការងារលោក ហេង សួរ មិនអាចទាក់ទងសុំអត្ថាធិប្បាយបានទេកាលពីថ្ងៃអាទិត្យ។
លោក អាត់ ធន់ ប្រធានសហភាពការងារកម្ពុជាបានថ្លែងថា គណៈកម្មាធិការទទួលបន្ទុកការគណនាប្រហែលជាមិនបានទទួលបានឯកសារសុក្រឹត សម្រាប់កម្មករទាំងអស់ជាពិសេសកម្មករដែលធ្វើការក្រោមកិច្ចសន្យារយៈពេលខ្លី។ «នោះហើយជាមូលហេតុដែលយើងតែងតែសុំចូលរួមនៅក្នុងគណៈកម្មាធិការនេះ ដើម្បីចូលរួមនៅក្នុងដំណើរការគណនាហើយផ្តល់ការទូទាត់ដោយសុក្រឹតដល់កម្មករ»៕ PS