កណ្តាលៈ កម្មកររោងចក្រ Prestige Garment Co., LTD ជាង ១០០ នាក់ក្នុងចំណោមជាង ៣០០ នាក់ស្ថិតនៅក្នុងឃុំត្បែង ស្រុកកណ្ដាលស្ទឹងនៅតែមិនព្រមចូលធ្វើការហើយគ្រោងយកញត្តិមកដាក់ស្នើសុំអន្តរាគមន៍ពីលោកនាយករដ្ឋមន្ត្រី ហ៊ុន សែន នៅថ្ងៃព្រហស្បតិ៍នេះ ក្រោយពីភាគីរោងចក្រកាលពីម្សិលមិញបានបដិសេធទទួលយកតំណាងពួកគេឲ្យចូលធ្វើការវិញ។
តំណាងកម្មករលោក ហួន សុវ៉ិត និយាយថាភាគីរោងចក្របានយល់ស្របតាមសំណើមួយចំនួនតាមការស្នើសុំទាក់ទងនឹងលក្ខខណ្ឌការងារ។ ប៉ុន្តែមិនបានយល់ព្រមទទួលយករូបលោកឲ្យចូលធ្វើការវិញនោះទេ។
«យើងបានប្រជុំ (ម្សិលមិញ) តាំងពីម៉ោង ១០ ព្រឹករហូតដល់ម៉ោង ១២ ថ្ងៃត្រង់។ រោងចក្របានយល់ព្រម និងចុះជាសមាជិកបេឡាជាតិរបបសន្តិសុខសង្គម។ មិនបង្ខំឲ្យកម្មករចូលធ្វើការមុនម៉ោងក៏ដូចជាការសម្រួលពេលសុំច្បាប់ការងារជាដើម»។
បើទោះបីជាយ៉ាងណាលោក ហួន សុវ៉ិត និយាយថាកម្មករមួយចំនួននឹងមិនចូលធ្វើការទេ ហើយនឹងដង្ហែញត្តិទៅគេហដ្ឋានលោក ហ៊ុន សែន ដើម្បីស្នើឲ្យលោកនាយករដ្ឋមន្ត្រីជួយអន្តរាគមន៍ករណីទាមទារឲ្យលោកបានចូលធ្វើការវិញ។
លោក សុវ៉ិត ថ្លែងថា៖ «ខ្ញុំនៅតែមានសង្ឃឹមថា កម្មករនៅតែចង់ឲ្យខ្ញុំបានចូលធ្វើការវិញ។ ស្អែកហ្នឹង កម្មករនឹងហែញត្តិទៅផ្ទះសម្តេច។ ខ្ញុំគិតថា រោងចក្ររើសអើងខ្ញុំដែលជាតំណាងកម្មករ ព្រោះគាត់លែងអាចជិះជាន់កម្មករបានដោយសារខ្ញុំហ៊ានតវ៉ាការពារកម្មករ»។
លោក ធុល នាង ប្រធានមន្ទីរការងារខេត្តកណ្តាលបានថ្លែងថា ក្នុងការចរចាកាលពីម្សិលមិញភាគីទាំង ២ យល់ព្រមគ្នាបាន ៩ ចំណុចតែមាន ៥ ចំណុចដែលមិនព្រមព្រៀងគ្នា។ កម្មករជាង ២០០ នាក់នឹងបន្តចូលធ្វើការវិញ ខណៈកម្មករប្រមាណជាង ១០០ នាក់ មិនយល់ព្រមចូលធ្វើការវិញទេ។
លោកបញ្ជាក់៖ «យើងបានព្យាយាមចរចារអស់លទ្ធភាពហើយ។ ប៉ុន្តែភាគីទាំង ២ នៅតែមិនព្រម។ ចុងក្រោយខាងសហជីព គាត់ដើរចេញពីតុចរចា។ អ៊ីចឹងថ្ងៃស្អែក (ទី ៣ ខែមករា ឆ្នាំ ២០១៩) ខ្ញុំនឹងបញ្ជូនសំណុំរឿងទៅក្រុមប្រឹក្សាអាជ្ញាកណ្តាលឲ្យដោះស្រាយ។ ចំណុចដែលរឹងទទឹងគឺការមិនព្រមទទួលយកសហជីពហ្នឹង [តំណាងកម្មករ]»៕