កំពង់ស្ពឺៈ យ៉ាងហោចណាស់មានកម្មករផលិតស្បែកជើងប្រមាណជិត ៧០ នាក់ បានដួលសន្លប់នៅក្នុងរោងចក្រផលិតស្បែកជើងឈ្មោះវីងស្តារ ២ ក្នុងភូមិអង្គសុគន្ធា ឃុំមហាឫស្សី ស្រុកគងពិសី ខេត្តកំពង់ស្ពឺ និងត្រូវបានបញ្ជូនទៅសង្គ្រោះនៅតាមមណ្ឌលសុខភាព គ្លីនិកឯកជន និងនៅមន្ទីរពេទ្យបង្អែកខេត្តដែលហេតុការណ៍នេះកម្មករក្នុងរោងចក្រកើតហេតុបានអះអាងថា ដោយសារចំហាយក្លិនកាវ។
លោក ឃឹម សុផាន់រ៉ា អធិការនគរបាលស្រុកគងពិសីប្រាប់ភ្នំពេញប៉ុស្ដិ៍កាលពីម្សិលមិញថា ករណីកម្មករដួលសន្លប់នោះកើតឡើងនៅវេលាម៉ោងប្រមាណជា ៩ ព្រឹកថ្ងៃទី ៥ ខែមីនា ស្ថិតនៅទីតាំងខាងលើដោយមានចំនួនសរុបទាំងអស់ប្រហែលជាង ៦០ នាក់។
លោកថា បន្ទាប់ពីទទួលសេចក្តីរាយការណ៍ហើយលោកបានដឹកនាំកម្លាំងចុះដល់ទីតាំងរោងចក្រកើតហេតុដោយបានជួយសម្រួលចរាចរណ៍ និងជួយការពារសន្តិសុខនៅក្នុងបរិវេណរោងចក្រ និងជុំវិញទីតាំងកើតហេតុ។ កម្មកររងគ្រោះទាំងអស់ត្រូវបានបញ្ជូនទៅសង្គ្រោះនៅទីតាំងផ្សេងៗគ្នាមានដូចជា គ្លីនិកឈ្មោះ ជា សុខលីម មន្ទីរពេទ្យបង្អែកខេត្តមណ្ឌលសុខភាពត្រាំខ្នារ និងគ្លីនិកឈ្មោះមូលមិត្តក្នុងខេត្តកំពង់ស្ពឺ។
លោកបញ្ជាក់ថា៖ «បញ្ហានេះខ្ញុំក៏មិនដឹងច្បាស់ថាបណ្តាលមកពីមូលហេតុអីដែរ តែបើតាមកម្មករដែលរងគ្រោះប្រាប់ថាធុំក្លិនកាវបិទស្បែកជើង។ ព្រោះសមត្ថកិច្ចខ្ញុំមាននាទីតែការពារសន្តិសុខប៉ុណ្ណោះ»។
ស្ត្រីជាកម្មការិនីម្នាក់ដែលសុំមិនឲ្យបញ្ចេញឈ្មោះ និងជាជនរងគ្រោះពីការដួលសន្លប់ក្នុងចំណោមកម្មករជាង ៦០ នាក់នោះឲ្យដឹងថា មុនពេលកើតហេតុ នាងកំពុងធ្វើការដូចសព្វមួយដង។ ប៉ុន្តែមួយសន្ទុះក្រោយមកស្រាប់តែនាងធុំក្លិន ដែលក្លិននោះទំនងជាក្លិនកាវដែលគេប្រើសម្រាប់បិទស្បែកជើងក្នុងរោងចក្រ។
កម្មការិនីរូបនោះថា៖ «បន្ទាប់ពីខ្ញុំធុំក្លិនមកស្រាប់តែខ្លួនខ្ញុំហាក់ចង់ក្អួត និងឈឺក្បាលហើយក៏លែងដឹងខ្លួនតែម្តង»។
ពាក់ព័ន្ធបញ្ហានេះដែរលោក ប៉ាវ ស៊ីណា ប្រធានសហជីពចលនាកម្មករកម្ពុជា ឲ្យដឹងពីម្សិលមិញថា រោងចក្រផលិតស្បែកជើងនោះមានឈ្មោះ វីងស្តារ២ ជាសាខារបស់រោងចក្រវីងស្តារ ១ ស្ថិតនៅក្នុងស្រុកគងពិសីខេត្តកំពង់ស្ពឺ។ បញ្ហាដួលសន្លប់នេះដែរបើតាមដែលលោកទទួលរបាយការណ៍ពីក្រុមកម្មករនៅក្នុងរោងចក្របានប្រាប់ថាកម្មករដែលដួលសន្លប់នោះមានចំនួនសរុបទាំងអស់ ៦៩ នាក់។
ករណីនេះលោកមិនទាន់ដឹងច្បាស់ថា ការដួលសន្លប់នេះបណ្តាលមកពីមូលហេតុអ្វីទេ តែបើតាមព័ត៌មានពីកម្មករប្រាប់លោកថា ដូចជាមានក្លិនប្រភេទជាកាវ ប៉ុន្តែបញ្ហានេះគ្រាន់តែនិយាយតៗគ្នាតែប៉ុណ្ណោះ។
លោកប្រាប់ថា៖ «ករណីនេះយើងរកមូលហេតុមិនទាន់បានទេ»។ លោកបន្តថានៅក្នុងរោងចក្រស្បែកជើងកើតហេតុនោះមានកម្មករជាង ១ ពាន់នាក់ដែលធ្វើការនៅក្នុងរោងចក្រនោះ។ ចំពោះដំណោះស្រាយជុំវិញបញ្ហានេះលោកបានប្រាប់ទៅភាគីពាក់ព័ន្ធថា ធ្វើយ៉ាងណាឲ្យមន្ត្រីជំនាញរបស់ក្រសួងការងារដូចជា ខាង ប.ស.ស. ឬខាងពេទ្យដែលប្រចាំការក្នុងរោងចក្រ ឬពេទ្យដែលមានជំនាញខាងការចុះត្រួតពិនិត្យទៅលើនាយកដ្ឋានពេទ្យរបស់ក្រសួងការងារជាដើមគួរតែចុះស្រាវជ្រាវរកហេតុផលនៃការដួលសន្លប់របស់កម្មករនេះឲ្យទាន់ពេលវេលាតាមដែលអាចធ្វើទៅបាន។
លោកថ្លែងថា៖ «ដោយសារឥឡូវនេះមានព័ត៌មានជាច្រើនដែលពាក់ព័ន្ធជំងឺវីរុសផង អីផង អ៊ីចឹង យើងមិនចង់ឲ្យមានពាក្យចចាមអារ៉ាមករណីដួលសន្លប់ទៅជាហេតុអីផ្សេងៗទេ»។
លោកបញ្ជាក់ថា ចំពោះស្ថានភាពបរិស្ថានក្នុងរោងចក្រនៅកម្ពុជានៅមិនទាន់មានលក្ខណៈមួយដែលជាការសាងសង់រោងចក្រស្របតាមស្តង់ដាប្រសើរនៅឡើយទេ។ វានៅមានកម្រិតនៅឡើយ ហើយភាគតិចណាស់ដែលថាមានប្រព័ន្ធត្រួតពិនិត្យបរិស្ថានតាមស្តង់ដានោះ។ ដោយឡែកនៅក្នុងរោងចក្រវីងស្តារនេះទាំងការសាងសង់អគារទាំងអ្វីទៀតនោះ ហាក់ដូចជានៅក្នុងកម្រិតមួយមិនជាអាក្រក់ទេ ដោយសាងសង់អគារខ្ពស់ហើយគ្មានបង្អួចគ្រប់គ្រាន់។ អ៊ីចឹងលោកថាវាអាចពាក់ព័ន្ធក្លិនកាវ ឬក្លិនថ្នាំអ្វីផ្សេងដែលជាធាតុផ្សំក្នុងការផលិតស្បែកជើងនោះ ដូច្នេះវាអាចពាក់ព័ន្ធនឹងបញ្ហានេះច្រើនជាង។
ភ្នំពេញប៉ុស្តិ៍នៅមិនទាន់អាចរកប្រភពណាមួយ ដើម្បីទាក់ទងសុំការបំភ្លឺពីអ្នកគ្រប់គ្រងរោងចក្រខាងលើបានទេម្សិលមិញ។
ពាក់ព័ន្ធបញ្ហានេះកាលពីម្សិលមិញភ្នំពេញប៉ុស្តិ៍ទូរស័ព្ទទៅលោក ហេង សួរ អ្នកនាំពាក្យក្រសួងការងារដើម្បីសុំការពន្យល់ដែរ ប៉ុន្តែលោកមិនលើកទូរស័ព្ទ៕