.jpg)
កម្មកររោងចក្រម៉ូណូភា ធ្វើការតវ៉ានាពេលកន្លងមក។ CENTRAL
កំពង់ស្ពឺៈ កម្មកររោងចក្រម៉ូណូភា Monopia (Cambodia) នៅខេត្តកំពង់ស្ពឺ បានចាប់ផ្តើមធ្វើការតវ៉ាជាថ្មីទៀតកាលពីថ្ងៃពុធ និងថ្ងៃព្រហស្បតិ៍ម្សិលមិញនៅមុខរោងចក្រ បន្ទាប់ពីមន្ត្រីអធិការកិច្ចនៃមន្ទីរការងារខេត្តបានចេញសេចក្តីសម្រេចឲ្យភាគីរោងចក្របញ្ឈប់តំណាងកម្មករ ២ នាក់តាមការស្នើសុំរបស់ភាគីរោងចក្រក្រោយពីចុះអង្កេត ១ សប្តាហ៍។
ការផ្ទុះការតវ៉ាជាថ្មីនេះក៏បានធ្វើឡើងបន្ទាប់ពីកម្មករទាំងនោះបានចូលធ្វើការវិញតាមការបញ្ជារបស់តុលាការខេត្តនេះកាលពីថ្ងៃទី ១៥ ខែវិច្ឆិកា ដោយសម្រេចក្នុងដីការក្សាការពារតម្រូវឲ្យកម្មករទាំងអស់បញ្ឃប់ការធ្វើបាតុកម្មខុសច្បាប់ និងចូលធ្វើការវិញក្នុងអំឡុងពេល ៤៨ ម៉ោង។
អ្នកស្រី សួស សោភ័ណ្ឌ កម្មការិនីដែលចូលរួមការតវ៉ានេះបានប្រាប់ភ្នំពេញប៉ុស្តិ៍ពីម្សិលមិញថា កម្មករបានផ្ទុះការតវ៉ាជាថ្មីកាលពីថ្ងៃពុធរហូតមកដល់ថ្ងៃព្រហស្បតិ៍បន្ទាប់ពីដីការក្សាការពារដែលកំណត់ឲ្យពួកគាត់ចូលធ្វើការវិញ បានផុតសុពលភាព។ អ្នកស្រីបន្តថា កម្មករទាំងអស់នៅតែប្រកាន់ជំហរ ចូលរួមការតវ៉ារហូតទាល់តែរោងចក្រព្រមទទួលយកតំណាងរបស់ពួកគេឲ្យចូលធ្វើការវិញ។
អ្នកស្រី សោភ័ណ្ឌ បញ្ជាក់ថា៖ «ព្រោះអីយើងអត់មានតវ៉ាទាមទារអីច្រើនទេ គឺសូមតែតំណាង ២ រូប ហើយនិងបងកម្មករ ៧ នាក់ទៀតបានចូលធ្វើការវិញ។ ស្អែកហ្នឹង (ថ្ងៃសុក្រ) យើងនឹងបន្តការតវ៉ាបន្តទៀតព្រោះគេមិនបានសម្របសម្រួលឲ្យពួកគាត់ចូលធ្វើការវិញទេ។ យើងនៅតែមានជំហររឹងមាំ តវ៉ាដដែល»។
កាលពីថ្ងៃទី ១៤ ខែវិច្ឆិកា កម្មកររោងចក្រ ម៉ូណូភា ដែលមានទីតាំងក្នុងស្រុកសំរោងទង ខេត្តកំពង់ស្ពឺជាង ៦០០ នាក់ក្នុងចំណោមកម្មករសរុបជាង ៩០០ នាក់ បានធ្វើការតវ៉ានៅមុខរោងចក្រ ក្រោយទទួលដំណឹងពីការបញ្ឈប់តំណាងរបស់ពួកគេចំនួន ២ នាក់កាលពីដើមខែ។ បន្ទាប់ពីតវ៉ា ភាគីរោងចក្រក៏បានប្តឹងទៅតុលាការហើយតុលាការក៏បានចេញដីការក្សាការពារ ឲ្យកម្មករចូលធ្វើការ និងបានព្យួរការងារកម្មករដែលចូលរួមតវ៉ាក្នុងពេលនោះចំនួន ៧ នាក់បន្ថែមទៀត។
លោក ចឹក បូរិន ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកំពង់ស្ពឺ មិនអាចសុំការអត្ថាធិប្បាយជុំវិញការចុះធ្វើអធិការកិច្ចក្នុងរយៈពេល ១ សប្តាហ៍ របស់លោកនៅរោងចក្រនេះបានទេកាលពីម្សិលមិញព្រោះទូរស័ព្ទលោកមិនអាចទាក់ទងបាន។
ប៉ុន្តែបើតាមលោក សំ សុជា ប្រធានរដ្ឋបាលរោងចក្រ ម៉ូណូភា បានប្រាប់ភ្នំពេញប៉ុស្តិ៍ថា ភាគីរោងចក្របានទទួលសេចក្តីសម្រេចរបស់មន្ត្រីអធិការកិច្ចមន្ទីរការងារហើយកាលពីថ្ងៃទី ១៩ ខែវិច្ឆិកានេះ។
លោកបន្តថា សេចក្តីសម្រេចនេះបានអនុញ្ញាតឲ្យខាងរោងចក្រ បញ្ឈប់តំណាងកម្មករទាំង ២ នាក់នេះតាមការស្នើសុំ។ ប៉ុន្តែលោកបញ្ជាក់ថា ចំពោះកម្មករ ៧ នាក់ផ្សេងទៀតគឺស្ថិតក្នុងនីតិវិធីដោយឡែករបស់តុលាការ ហើយតុលាការគ្រាន់តែព្យួរការងារគាត់មិនឲ្យចូលធ្វើការបណ្តោះអាសន្នប៉ុណ្ណោះ។
លោកបន្តថា៖ «៧ នាក់ផ្សេងទៀតគ្រាន់តែបញ្ចូលទៅក្នុងបញ្ជីរបស់តុលាការ ស្តីពីដីការក្សាការពារទេ មិនពាក់ព័ន្ធនឹងរឿងបញ្ឈប់ទេ។ តាមពិតទៅគាត់អាចចូលធ្វើការបាន ប៉ុន្តែដោយសារតែពួកគាត់អះអាងថា បើពួកគាត់ចូលធ្វើការ ទាល់តែចូលធ្វើការទាំងអស់គ្នា ( ៩ នាក់) បើចូលមួយអត់មួយក៏ពួកគាត់មិនចូលធ្វើការដែរ»។
យ៉ាងណាក៏ដោយជាមួយនឹងការព្រមានតវ៉ារបស់កម្មករបន្តទៀត ដើម្បីឲ្យរោងចក្រទទួលយកតំណាងកម្មករទាំងអស់ឲ្យចូលធ្វើការវិញនោះ លោក សំ សុជា អះអាងថាមិនអាចទៅរួចទេ ហើយការតវ៉ារបស់កម្មករមិនបានធ្វើឲ្យមានផលចំណេញនោះទេគឺនឹងធ្វើឲ្យខាតបង់ទាំងអស់គ្នា។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករយល់ថា ការសម្រេចរបស់មន្ទីរការងារខេត្តគឺជាចេតនាក្នុងការពារការរើសអើងសហជីពពីសំណាក់ថៅកែរោងចក្រដែលតែងតែមិនចង់ឲ្យមានសំឡេងសហជីពនៅរោងចក្ររបស់ពួកគេ ដែលវាផ្ទុយនឹងច្បាប់។
លោកថា៖ «ការដែលក្រុមហ៊ុនបញ្ឈប់ពួកគេគឺមិនមែនជាករណីបញ្ឈប់បុគ្គលទេ គឺបញ្ឈប់ក្រុមសហជីព។ អ៊ីចឹងក្រុមសហជីព គឺតំណាងឲ្យកម្មករតំណាងឲ្យសមាជិក ដូច្នេះបើបញ្ឈប់តំណាងរបស់គាត់ គាត់តវ៉ាគឺជារឿងមួយត្រឹមត្រូវ។ ប៉ុន្តែខ្ញុំគ្រាន់តែសុំឲ្យការតវ៉ានេះធ្វើដោយសន្តិវិធីហើយដើម្បីបញ្ចប់គឺមិនគួរឲ្យមានវិវាទដដែលៗនៅស្រុកយើងដែលមានទាំងច្បាប់អន្តរជាតិ ច្បាប់ជាតិ ក្នុងការធានាដល់សិទ្ធិសេរីភាពរបស់សហជីពគឺត្រូវយកវាមកប្រើ និងអនុវត្តឲ្យបានត្រឹមត្រូវតាមច្បាប់»៕
