ភ្នំពេញៈ កម្មករ កម្មការិនីរោងចក្រវ៉ាយអូលែតប្រមាណ ២៥០ នាក់ តំណាងឲ្យកម្មករ ១ ២៨៤ នាក់ កាលពីម្សិលមិញបានប្រមូលផ្តុំគ្នាដាក់ញត្តិនៅមុខទីស្នាក់ការសហគមន៍អឺរ៉ុប (EU) ប្រចាំនៅកម្ពុជា ដើម្បីស្នើឲ្យស្ថាប័នមួយនេះជួយអន្តរាគមន៍ឲ្យរោងចក្រដែលបានបិទទ្វារដោះស្រាយផលប្រយោជន៍ជូនកម្មករទៅតាមច្បាប់។
បើតាមញត្តិរបស់កម្មករដែលបានដាក់ជូនសហគមន៍អឺរ៉ុប (EU) រោងចក្រ វ៉ាយអូលែត មានទីតាំងនៅភូមិត្រពាំងឈូក សង្កាត់អូរបែកក្អម ខណ្ឌសែនសុខ បានព្យួរការងារកម្មកររយៈពេល ២ ខែចាប់ពីខែឧសភាដល់ខែមិថុនា ឆ្នាំ ២០២០។ ញត្តិដដែលបន្តថា ក្នុងពេលនោះក្រុមហ៊ុនបានប្រកាសបិទទ្វាររោងចក្រជាស្ថាពរនៅថ្ងៃទី ១ ខែ កក្កដា ឆ្នាំ ២០២០ ដោយមិនបានដោះស្រាយផលប្រយោជន៍ជូនកម្មករតាមផ្លូវច្បាប់ស្តីពីការងារនោះឡើយ។
ញត្តិកម្មករបញ្ជាក់ថា៖ «ស្នើសុំសហគមន៍អឺរ៉ុបប្រចាំនៅប្រទេសកម្ពុជា មេត្តាជួយរកយុត្តិធម៌ឲ្យបងប្អូនកម្មករកម្មការិនីនៅរោងចក្រវ៉ាយអូលែត ដោយសុំឲ្យក្រុមហ៊ុនទូទាត់ប្រាក់ឈ្នួលជូនកម្មករ ៤ ចំណុច។ ស្នើសុំឲ្យក្រុមហ៊ុនផ្តល់ប្រាក់ដល់កម្មករដែលមានផ្ទៃពោះចាប់ពី ៤ ខែឡើងទៅ ត្រូវទទួលបាន ៥០ ភាគរយ ពីក្រុមហ៊ុនរយៈពេល ៣ ខែនៃលុយលម្ហែមាតុភាព»។
បន្ថែមពីនេះ កម្មករក៏ស្នើឲ្យសហគមន៍អឺរ៉ុបជួយអន្តរាគមន៍ទៅក្រុមហ៊ុនឲ្យទូទាត់ប្រាក់ចំនួន ៥ ថ្ងៃនៃថ្ងៃសម្រាកចូលឆ្នាំ និងស្នើឲ្យក្រសួងការងារ បញ្ចូនសំណុំរឿងវិវាទរោងចក្រ វ៉ាយអូលែតនេះទៅក្រុមប្រឹក្សាអាជ្ញាកណ្តាល។
លោកស្រី Pok Poun មន្ត្រីផ្នែកព័ត៌មាននៃសហគមន៍អឺរ៉ុប (EU) ប្រចាំនៅកម្ពុជាមិនអាចទាក់ទងសុំការអត្ថាធិប្បាយបានទេកាលពីម្សិលមិញ។
អ្នកស្រី អ៊ុង ចាន់ធឿន តំណាងកម្មករដែលបានដាក់ញត្តិជូនសហគមន៍អឺរ៉ុបកាលពីម្សិលមិញបានប្រាប់ភ្នំពេញប៉ុស្តិ៍ថា សហគមន៍អឺរ៉ុបបានសន្យាថា ខ្លួននឹងពិនិត្យទៅលើសំណើរបស់កម្មករ និងជំរុញរឿងនេះទៅកាន់អ្នកបញ្ជាទិញ ដើម្បីដោះស្រាយបញ្ចប់វិវាទទាំងនេះ។
អ្នកស្រីបានបន្តថា៖ «ក្នុងនាមខ្ញុំជាកម្មករ និងបងប្អូនយើងមួយចំនួននៅមានឆន្ទៈ ចង់ស្វែងរកកិច្ចអន្តរាគមន៍ទៅស្ថាប័នពាក់ព័ន្ធដទៃទៀត។ យើងសង្ឃឹមថា យើងនឹងទទួលបានយុត្តិធម៌ តាមច្បាប់ និងចង់ឲ្យរោងចក្រ គោរពច្បាប់ និងផ្តល់នូវអ្វីដែលកម្មករត្រូវទទួលបាន»។
ប៉ុន្តែលោក ប៊ូ សំណាង ប្រធានរដ្ឋបាលរោងចក្រវ៉ាយអូលែត ថ្លែងថាការដាក់ញត្តិទៅសហគមន៍អឺរ៉ុបនេះ គឺនឹងមិនមានឥទ្ធិពលអ្វីមកលើក្រុមហ៊ុននោះទេ ព្រោះរោងចក្របានដោះស្រាយទៅតាមច្បាប់ និងសេចក្តីប្រកាសរបស់ក្រសួងការងារដោយបានផ្តល់សំណងដល់កម្មករចំនួន ៣ ចំណុច ដើម្បីឆ្លើយតបនឹងការបិទទ្វាររោងចក្រហើយ។
លោកបានបន្តថា ចំពោះដំណោះស្រាយទាំងនេះក៏មានការគាំទ្រពីក្រសួងការងារដោយមានកម្មករជាច្រើនបានមកទទួលយកដំណោះស្រាយទាំងនេះ។ លោកបញ្ជាក់ថា៖ «អ្វីដែលគាត់បានទាមទារគឺជារឿងផ្សេង ហើយអ្វីដែលយើងធ្វើ គឺធ្វើទៅតាមច្បាប់ និងមានការចូលរួមពីខាងក្រសួង។ ខ្ញុំក៏មិនដឹងថា យ៉ាងម៉េចបានជាគាត់នៅតែទាមទារដែរ»។
លោកអះអាងថា៖ «លក្ខខណ្ឌ ដែលយើងបានផ្តល់ឲ្យគាត់ គឺការផ្តល់ប្រាក់ខែចុងក្រោយ ប្រាក់បំណាច់ឆ្នាំ និងប្រាក់បំណាច់អតីតភាពការងារ ហើយមកដល់ពេលនេះមានកម្មករជាង ៩០០ នាក់ ហើយបានមកទទួលយកលក្ខខណ្ឌនេះ និងនៅមានជាបន្តបន្ទាប់»៕