The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​រោងចក្រ ​ជើនេរេស៊ិន​តវ៉ា​ឲ្យ​តុលាការ​ទម្លាក់​បទ​ចោទ​ប្រកាន់




កម្មករ​រោងចក្រ ​ជើនេរេស៊ិន​តវ៉ា​ឲ្យ​តុលាការ​ទម្លាក់​បទ​ចោទ​ប្រកាន់

កម្មករ​រោងចក្រ ​ជើនេរេស៊ិន​តវ៉ា​ឲ្យ​តុលាការ​ទម្លាក់​បទ​ចោទ​ប្រកាន់

កំពង់ស្ពឺៈ កម្មករ​រាប់​ពាន់​នាក់​ នៃ​រោងចក្រ​ជើនេរេស៊ិន ស្ថិត​នៅ​ស្រុក​សំរោងទង បាន​នាំ​គ្នា​ឈរ​មុខ​សាលាដំបូង​ខេត្តកំពង់ស្ពឺ កាល​ពី​ម្សិលមិញ ដើម្បី​ទាមទារ​ឲ្យ​តុលាការ ទម្លាក់​ការ​ចោទ​ប្រកាន់​លើ​តំណាង​បី​នាក់​របស់​ពួក​គេ ដែល​រង​ការ​ប្តឹង​ពី​សំណាក់​ថៅ​កែ​រោងចក្រ។

លោក សុខ រ៉ាវុធ ប្រធាន​សហព័ន្ធ​សហជីព​សេរី​ពលករ​ខ្មែរ ឲ្យ​ដឹង​ថា តំណាង​ទាំង​បី​ជា​ប្រធាន អនុប្រធាន និង​អគ្គលេខាធិការ​នៃ​សហជីព​សេរី​ពលករ​ខ្មែរ ត្រូវ​ទទួល​បាន​ដីកា​កោះ​ពី​តុលាការ កាល​ពី​ចុង​សប្តាហ៍​មុន ឲ្យ​មក​បំភ្លឺ​ម្សិលមិញ​ទាក់ទិន​នឹង​បណ្តឹង​រោងចក្រ។

លោក​រ៉ាវុធ បាន​ចាប់​ផ្តើម​ធ្វើ​កូដកម្ម ពី​ដើម​សប្តាហ៍​មុន ទាមទារ​នូវ​លក្ខខណ្ឌ​មួយ​ចំនួន សុំ​ឲ្យ​រោងចក្រ​ធ្វើ​អាហារ​ថ្ងៃ​ត្រង់​ឲ្យ​មាន​អនាម័យ​សម្រាប់​កម្មករ កុំ​កាត់​លុយ​ពេល​កម្មករ​មក​ធ្វើ​ការ​យឺតយ៉ាវ​តែ​មួយ​ឬ​ពីរ​នាទី​នោះ​សូម​ឲ្យ​មាន​ថ្នាំ​ពេទ្យ​ញ៉ាំ​គ្រប់​គ្រាន់​ដោយ​គ្មាន​ការ​លក់​ដូរ​ជា​ដើម។

លោក​ថា ៖ «ពួក​យើង​ធ្វើ​កូដកម្ម​ដោយ​អហិង្សា សូម្បី​ផ្លូវ​ជាតិ ឬ​ផ្លូវ​ចេញ​ចូល​រោងចក្រ អត់​មាន​បិទ​ទេ។ អត់​មាន​ការ​វាយ​តប់ ប្រទូសរ៉ាយ​អី​ទាំង​អស់ ប៉ុន្តែ​បែរ​ជា​មាន​បណ្តឹង​ថា​តំណាង​ពួក​យើង ធ្វើការ​បំផ្លាញ​ទ្រព្យសម្បត្តិ​រោងចក្រ​ទៅ​វិញ»។

អ្នក​ទាំង​បី ត្រូវ​បាន​សាលាដំបូង​ខេត្ត​អនុញ្ញាត​ឲ្យ​ត្រឡប់​មក​វិញ ក្រោយ​ការ​សាកសួរ។ មន្ត្រី​នៅ​សាលាដំបូង​ខេត្ត​កំពង់ស្ពឺ មិន​អាច​ទាក់​ទង​បាន​ទេ​កាល​ពី​ម្សិលមិញ។

លោក តាត់ សុង ប្រធាន​ការិយាល័យ​ការងារ​នៃ​មន្ទីរ​ការងារ និង​បណ្តុះ​បណ្តាល​វិជ្ជាជីវៈ​ខេត្តកំពង់ស្ពឺ ថ្លែង​ថា កម្មករ​រោងចក្រ​ជេនើរេស៊ិន ដែល​កាត់​ដេរ​ស្បែក​ជើង មាន​កម្មករ​សរុប​ជិត​៨​ពាន់​នាក់ ហើយ​កម្មករ​ចូល​រួម​កូដកម្ម មាន​ពាក់​កណ្តាល។

លោក​ឲ្យ​ដឹង​ថា​រោងចក្រ​បាន​ប្តឹង​បុគ្គល​ទាំង​បី​រូប កាល​ពី​ចុង​ខែ​ឧសភា​មក​ ម្ល៉េះ ។ លោក​ថា ៖ «ក្រុមហ៊ុន​ប្តឹង ដោយសារ​គេ​ថា​អ្នក​ទាំង​បី​បង្ក​រឿង​ធ្វើ​ឲ្យ​ប៉ះ​ពាល់​ផលិតភាព​ការងារ»៕

អត្ថបទគួរចាប់អារម្មណ៍