.jpg)
កម្មករ-កម្មការិនីបម្រើការងារនៅរោងចក្រ ធី&អិល ប្រមាណ ៥០ នាក់ស្ថិតក្នុងខណ្ឌកំបូល រាជធានីភ្នំពេញបានបន្តការតវ៉ាជាថ្មីទៀតកាលពីម្សិលមិញ។ សហការី
ភ្នំពេញៈ កម្មករ-កម្មការិនីបម្រើការងារនៅរោងចក្រ ធី&អិល ប្រមាណ ៥០ នាក់ស្ថិតក្នុងខណ្ឌកំបូល រាជធានីភ្នំពេញបានបន្តការតវ៉ាជាថ្មីទៀតកាលពីម្សិលមិញ បន្ទាប់ពីថៅកែរោងចក្រនៅតែមិនព្រមទទួលយកតំណាងកម្មករចំនួន ៤ នាក់ឲ្យចូលធ្វើការវិញ បន្ទាប់ពីត្រូវបានបញ្ឈប់ពីការងារក្រោមហេតុផលចងក្រងបង្កើតសហជីពក្នុងរោងចក្រ។
ការតវ៉ានេះធ្វើឡើងបន្ទាប់ពីក្រុមប្រឹក្សាអាជ្ញាកណ្តាលបានចេញសេចក្តីសម្រេចតម្រូវឲ្យកម្មករទាំងអស់ ដែលបន្តការតវ៉ាតាំងពីដើមខែមីនាមកឲ្យចូលធ្វើការវិញជាធម្មតា និងបញ្ឈប់សកម្មភាពតវ៉ានៅមុខរោងចក្រនៅត្រឹមថ្ងៃទី ៩ មីនានេះ។
តំណាងកម្មករលោក សាន សាមុន ដែលត្រូវបានបញ្ឈប់ពីការងារបានថ្លែងក្នុងការឡាយលើបណ្តាញទំនាក់ទំនងសង្គមកាលពីថ្ងៃចន្ទក្នុងអំឡុងពេលតវ៉ាថា ពួកលោក ៤ នាក់ដែលជាតំណាងកម្មករត្រូវបានថៅកែរោងចក្របញ្ឈប់ពីការងារដោយគ្មានមូលហេតុ ក្រោយពីបានបោះឆ្នោតបង្កើតសហជីពនៅក្នុងរោងចក្រនេះមិនបាន ១ ខែផង។ នេះគឺជាការរើសអើងសហជីពដោយមិនចង់ឱ្យមានសហជីពក្នុងរោងចក្រ ខណៈដែលថៅកែរោងចក្រមួយនេះកំពុងរំលោភបំពានសិទ្ធិរបស់កម្មករជាច្រើនករណី ហើយមូលហេតុដែលរោងចក្រនេះមិនអនុញ្ញាតឲ្យមានសហជីព ក៏ព្រោះតែរោងចក្រនេះមិនបានគោរពទៅតាមច្បាប់ការងារនោះទេ។
លោកថ្លែងថា៖ «កម្មករតវ៉ាដោយស្ម័គ្រចិត្ត មិនមានការបង្ខំពីពួកយើងនោះទេ គឺពួកគាត់តវ៉ាចង់ឲ្យតំណាងពួកគាត់បានចូលធ្វើការជាធម្មតា ដើម្បីបម្រើផលប្រយោជន៍របស់កម្មករដែលកន្លងទៅរោងចក្រនេះធ្លាប់បានបំពាន។ ធ្លាប់មានការបញ្ឈប់កម្មករមានផ្ទៃពោះ។ រោងចក្រនេះបើកជាង ១ ឆ្នាំហើយ តែគ្មានបន្ទប់ពិនិត្យជំងឺនោះទេ»។
ចំណែកមន្ត្រីសហព័ន្ធសហជីពអភិវឌ្ឍន៍កម្មករលោក អួក ឆវ័ន្ត ដែលត្រូវបានបញ្ឈប់ពីការងារដែរនោះ ថ្លែងថាបើទោះជាមានការសម្រេចឲ្យកម្មករ ចូលធ្វើការធម្មតា ប៉ុន្តែតំណាងកម្មករទាំង ៤ នាក់ដែលត្រូវបានបញ្ឈប់ គឺមិនត្រូវបានថៅកែរោងចក្រឲ្យចូលធ្វើការវិញនោះទេ។ ដូច្នេះកម្មករទាំងអស់ក៏បន្តការតវ៉ាជាថ្មីទៀត ដោយមិនព្រមចូលធ្វើការ ដើម្បីទាមទារឲ្យថៅកែរោងចក្រទទួលតំណាង ៤ នាក់វិញ។
លោកបន្ថែមថា៖ «គេអត់ឲ្យខ្ញុំចូលធ្វើការទេ ដាច់ខាតគេមិនឲ្យពួកខ្ញុំ ៤ នាក់នេះចូលធ្វើការដាច់ខាត»។
តំណាងរោងចក្រ ធី&អិល កាលពីម្សិលមិញមិនអាចស្វែងរកប្រភព ដើម្បីសាកសួរជុំវិញករណីនេះបានទេ។
លោក ទេស រុក្ខាផល អគ្គលេខាធិការរងនៃអគ្គលេខាធិការដ្ឋាននៃគណៈកម្មការសម្រាប់ដោះស្រាយបញ្ហាកូដកម្មបាតុកម្មនៅតាមគ្រប់មុខសញ្ញានៃក្រសួងការងារបានប្រាប់ភ្នំពេញ-ប៉ុស្តិ៍ពីម្សិលមិញថា យោងតាមសេចក្តីសម្រេចរបស់ក្រុមប្រឹក្សាអាជ្ញាកណ្តាលបានសម្រេចឲ្យកម្មករដែលនៅសេសសល់ត្រូវចូលធ្វើការវិញនៅថ្ងៃទី ៩ មីនា។ ប៉ុន្តែកម្មករ និងតំណាងកម្មករមិនបានគោរពតាមនោះទេ និងបានបន្តធ្វើបាតុកម្ម ដោយមានការហែក្បួនទៀតផង។
លោកបន្តថា ក្រុមការងារ នឹងបន្តផ្សះផ្សាបន្តទៀត ហើយក្នុងករណីដែលកម្មករនៅតែបន្តការតវ៉ានោះ ក្រុមការងារនឹងបញ្ចូនរឿងនេះទៅថ្នាក់លើ ឬ បញ្ចូនទៅតុលាការធ្វើការបន្តតែម្តង។ យ៉ាងណាក្នុងដំណាក់កាលនេះលោកអះអាងថា ក្រសួងនឹងបន្តផ្សះផ្សាបន្តទៀត។
លោកបញ្ជាក់ថា៖ «កាលពីថ្ងៃចន្ទហ្នឹង ក្រុមការងារយើងក៏បានចុះផ្សះផ្សាដែរ ប៉ុន្តែមិនជាសះនោះទេ បន្ទាប់ពីពួកគាត់បាននាំគ្នាមកតវ៉ា នៅក្រសួងការងារ ហើយក៏បានត្រឡប់ទៅវិញ ក្រោយសម្របសម្រួល។ យើងនឹងបន្តផ្សះផ្សាទៀត ប៉ុន្តែជារួមកម្មករមិនបានធ្វើតាមនីតិវិធីនៃការផ្សះផ្សា។ ដូច្នេះបើគាត់នៅបន្តធ្វើកូដកម្មបន្តទៀត យើងនឹងមិនបន្តដោះស្រាយករណីនេះទៀតទេ »។
លោក អួក ឆវ័ន្ត ឱ្យដឹងថារោងចក្រ ធី&អិល ហ៊ែនប៊ែក (T&L Cambodia Handbags Industrial) ជារោងចក្រផលិតកាបូប មានថៅកែជាជនជាតិចិន និងមានកម្មករ ៣៨០ នាក់កំពុងបំពេញការងារ៕
