.jpg)
កម្មកររោងចក្រ នូវ ខប តវ៉ាមុខរោងចក្រ។ ហ្វេសប៊ុក
កណ្ដាលៈ កម្មកររោងចក្រ នូវ ខប មួយចំនួននៅតែអះអាងថា ពួកគេនឹងដាក់ពាក្យបណ្តឹងទៅក្រុមប្រឹក្សាអាជ្ញាកណ្តាល ដើម្បីស្វែងរកការអន្តរាគន៍បន្តករណីរោងចក្រផ្តល់សំណងមិនត្រឹមត្រូវដល់ពួកគេ ក្រោយមិនមានលទ្ធភាពបន្តកិច្ចសន្យាការងារជាមួយកម្មករ ព្រោះតែគ្មានការបញ្ជាទិញ។
ការអះអាងយ៉ាងដូច្នេះ បន្ទាប់ពីការចរចាកាលពីម្សិលមិញ តាំងពីម៉ោង ៩ ព្រឹក រហូតដល់ម៉ោង ១២ ថ្ងៃត្រង់ រវាងតំណាងកម្មកររោងចក្រ នូវ ខប ចំនួន ១២ នាក់ និងភាគីរោងចក្រ ដោយមានការសម្របសម្រួលពីប្រធានមន្ទីរការងារខេត្ត មិនទាន់ទទួលបានការឯកភាពទាំងស្រុង ដោយមានកម្មករមួយចំនួន នៅតែប្រកាន់ជំហរ ខណៈកម្មករមួយចំនួន យល់ព្រមទទួលយកអត្ថប្រយោជន៍បន្ថែមពីថៅកែរោងចក្រ។ នេះបើតាមការអះអាងរបស់ លោក ថុន នាង ប្រធានមន្ទីរការងារខេត្តកណ្តាល បានប្រាប់ភ្នំពេញប៉ុស្តិ៍ពីម្សិលមិញ។
លោក នាង បន្តថា ក្រោយកិច្ចចរចាជាមួយភាគីពាក់ព័ន្ធ កម្មករទាំងអស់ បានសម្រេចបែងចែកជា ៣ ក្រុម ដោយមួយក្រុមសម្រេចបន្តដាក់ពាក្យបណ្តឹងទៅក្រសួងការងារ និងមួយក្រុមសម្រេចបញ្ជូនករណីនេះទៅតុលាការ ចំណែកមួយក្រុមទៀត បានយល់ព្រមទទួលសំណងបន្ថែមដែលភាគីរោងចក្របានផ្តល់ជូន ចន្លោះពី ៤៥០ ដុល្លារ ដល់ជាង ៥០០ ដុល្លារ បន្ទាប់ពីបូកបន្ថែមអត្ថប្រយោជន៍ក្នុងឆ្នាំថ្មីនេះដែលភាគីរោងចក្រព្រមផ្តល់ជូន។
លោក នាង បានបញ្ជាក់ថា៖ «ប្តឹង និងដោះស្រាយទៅច្បាប់ការងារ ដែលយើងបន្ត បើបងប្អូនណាគាត់ព្រមទទួលយក ពីក្រុមហ៊ុននេះជាសិទ្ធិរបស់គាត់ ហើយបើបងប្អូនណាមិនព្រមជាសិទ្ធិរបស់គាត់។ យើងនឹងដោះស្រាយបន្តទៀត យើងនឹងធ្វើឯកសារហ្នឹងបញ្ចូនទៅ»។
លោក ហេង សុខា តំណាងកម្មករម្នាក់ដែលបានចូលជួបចរចា បានប្រាប់ភ្នំពេញប៉ុស្តិ៍ពីម្សិលមិញថា ចំពោះការចង់បានរបស់លោក និងកម្មករដទៃទៀត គឺចង់ឲ្យភាគីរោងចក្រ ផ្តល់សំណង និងប្រាក់អតីតភាពការងារដល់ពួកគាត់ទៅតាមអតីតភាពការងាររបស់កម្មករនីមួយៗ ដែលអាចមានជាង ១០ ឆ្នាំ ប៉ុន្តែភាគីរោងចក្រ ព្រមទូទាត់ឲ្យកម្មករតែរយៈពេល ២ ឆ្នាំកន្លះប៉ុណ្ណោះ ដោយសំអាងថា រោងចក្របានទូទាត់ជូនកម្មករម្តងរួចមកហើយ។
លោកបញ្ជាក់ថា៖ «ជាមួយនឹងការគ្មានលទ្ធភាពបន្តកិច្ចសន្យាជាមួយកម្មករនេះ ភាគីរោងចក្រក៏មិនបានបង្ហាញឲ្យច្បាស់ថា រោងចក្ររបស់ខ្លួន ក្ស័យធន ឬយ៉ាងណានោះដែរ ដែលជាហេតុធ្វើឲ្យក្រុមកម្មករ មិនអាចទទួលយកបាននោះទេ»។
ជាមួយគ្នានេះ កម្មករម្នាក់ឈ្មោះ លោក ខែន សុភ័ណ្ឌ វ័យ ៣១ ឆ្នាំ បានបញ្ជាក់ជំហររបស់លោកថាបើគ្មានដំណោះស្រាយដែលអាចទទួលយកបាននោះទេ ក្រុមកម្មករទាំងអស់នឹងប្រមូលផ្តុំគ្នា ដាក់ពាក្យបណ្តឹងទៅក្រុមប្រឹក្សាអាជ្ញាកណ្តាលនៃក្រសួងការងារ ដើម្បីឲ្យជួយស្វែងរកយុត្តិធម៌ ព្រោះតែក្រុមហ៊ុនមិនបានអនុវត្តឲ្យស្របទៅតាមច្បាប់ការងារ។
កាលពីថ្ងៃទី ២៦ និង ២៧ ខែ មិថុនា កម្មកររោងចក្រ នូវ ខប ដែលមានទីតាំងស្ថិតនៅភូមិជើងអក ឃុំលំហាច ស្រុកអង្គស្នួល ខេត្តកណ្តាល ប្រមាណជាង ៤០០ នាក់ ដែលមិនយល់ព្រមទទួលសំណងពីក្រុមហ៊ុន បានប្រមូលផ្តុំគ្នានៅមុខរោងចក្រ ដើម្បិទាមទារឲ្យថៅកែរោងចក្រទូទាត់ប្រាក់អត្ថប្រយោជន៍នានារបស់ពួកគេឲ្យបានត្រឹមត្រូវ។
ការទាមទារនេះ ត្រូវបានកម្មករអះអាងថា ព្រោះតែរោងចក្រ នូវ ខប ពុំមានការងារឲ្យកម្មករ ទើបសម្រេចកាត់បន្ថយការងារកម្មករ ៥០ ភាគរយ រយៈពេល ១ ខែកន្លះ និងបន្ទាប់មក ក៏បានប្រកាសព្យួរការងាររយៈពេល ២ ខែ ដោយបានជូនដំណឹងដល់កម្មករឲ្យចូលធ្វើការងារវិញ នៅថ្ងៃទី ២៦ ខែ មិថុនា។
ប៉ុន្តែនៅពេលដល់ថ្ងៃកំណត់ នៅតែគ្មានការងារឲ្យកម្មករធ្វើដដែល ទើបរោងចក្រ បានប្រកាសឲ្យកម្មករទាំងអស់ ដែលមិនអាចបន្តរង់ចាំបានមកទទួលយកប្រាក់អត្ថប្រយោជន៍ដោយគិតទូទាត់លុយឲ្យកម្មករចន្លោះពី ៣២០$ ទៅ ៤៥០$ ក្នុងម្នាក់ៗ មិនថា កម្មករថ្មី ឬចាស់នោះទេ ដោយមិនបានជូនដំណឹងដល់កម្មករ កម្មការិនីថា បិទរោងចក្រឬក៏បើករោងចក្រនោះទេ។
ភ្នំពេញប៉ុស្តិ៍មិនអាចទាក់ទងម្ចាស់រោងចក្រ ដែលកម្មករអះអាងថា ជាជនជាតិកូរ៉េនោះបានទេ ចំណែកមន្ត្រីផ្នែករដ្ឋបាល ឈ្មោះ វាសនា ក៏មិនអាចទាក់ទងបានដែរ កាលពីម្សិលមិញ ព្រោះតែទូរស័ព្ទលោកមិនអាចទាក់ទងបាន។
លោក សៀង សម្បត្តិ ប្រធានសហព័ន្ធសហជីពមិត្តភាពកម្មករ បានប្រាប់ភ្នំពេញប៉ុស្តិ៍ពីម្សិលមិញថា ករណីនេះ វាអាស្រ័យលើការសម្រេចរបស់កម្មករ ព្រោះវាជាវិវាទការងារស្ថិតក្នុងការចរចា ប៉ុន្តែបើភាគីណាមួយមិនអាចទទួលយកបាន នោះគឺអាចប្តឹងបន្តទៅក្រសួងការងារ និងតុលាការបាន។
លោកបញ្ជាក់ថា៖ «ដោយសារតែនៅពេលប្រជុំ ភាគីទាំងសងខាងសុទ្ធតែមានអំណះអំណាងរៀងៗខ្លួន ប៉ុន្តែបើតាមការបកស្រាយរបស់ប្រធានមន្ទីរការងារ បានអះអាងថាផ្អែកតាមច្បាប់ កម្មករ អាចនឹងទទួលបានអត្ថប្រយោជន៍តិចជាងអត្ថប្រយោជន៍ដែលក្រុមហ៊ុនបានផ្តល់ជូន។ ប៉ុន្តែការសម្រេចយ៉ាងណា គឺអាស្រ័យលើកម្មករខ្លួនឯង»។
តាមការអះអាងរបស់កម្មករ និងសហជីព បានឲ្យដឹងថា រោចចក្រ នូវ ខប បានបើកដំណើរការតាំងពីឆ្នាំ ២០០៦ ដែលមានកម្មករប្រមាណ ១ ៤០០ នាក់ ហើយសម្លៀកបំពាក់ដែលផលិតបាន គឺធ្វើការនាំចេញទៅសហរដ្ឋអាមេរិក។ កម្មករប្រមាណជាង ៤០០ នាក់ទៀត នៅតែបន្តការតវ៉ានេះ៕
