.jpg)
កម្មកររោងចក្រតវ៉ានៅខណ្ឌមានជ័យ រាជធានីភ្នំពេញពីម្សិលមិញ។ ហេង ជីវ័ន
ភ្នំពេញៈ កម្មកររោងចក្រយីងហីហ្គាមេនខូអិលធីឌី ជាង ១ ពាន់នាក់ នៅភូមិទ្រា សង្កាត់ស្ទឹងមានជ័យ រាជធានីភ្នំពេញ ពីម្សិលមិញ បានផ្ទុះកូដកម្មទាមទារលក្ខខណ្ឌការងារ និងប្រាក់អតីតភាពការងារ ខណៈកម្មកររោងចក្រកាត់ដេរតៃអ៊ីហ្ស៊ីជិត ៥ ពាន់នាក់ នៅខេត្តពោធិ៍សាត់ ដែលផ្ទុះការតវ៉ាបិទផ្លូវជាតិលេខ ៥ កាលពីថ្ងៃទី ១២ មករា បានបញ្ឈប់ការតវ៉ា ក្រោយរោងចក្រយល់ព្រមទូទាត់ផ្នែកខ្លះតាមការទាមទារ។
ការប្រមូលផ្តុំតវ៉ាពីម្សិលមិញរបស់កម្មករកម្មការិនីជាង ១ ០០០ នាក់ នៃរោងចក្រយីងហី (ខេមបូឌា) ហ្គាមេនខូអិលធីឌីនេះ បន្ទាប់ពីរោងចក្របានគេចវេះក្នុងការផ្តល់ប្រាក់បំណាច់អតីតភាពការងាររបស់កម្មករ ដែលបានសន្យាថា នឹងបើកផ្តល់ជូនកម្មករនៅឆ្នាំ ២០២១។ នេះបើតាមការអះអាងរបស់អ្នកស្រីប្រុញ ចន្ទី កម្មការិនីម្នាក់ដែលបានចូលរួមក្នុងការតវ៉ា។
អ្នកស្រីបញ្ជាក់ថា៖ «យើងទាមទារប្រាក់អតីតភាពការងារឆ្នាំ ២០១៩ និងឆ្នាំ ២០២០ ដែលកាលមុនរោងចក្របានសន្យាផ្តល់ជូនកម្មករនៅឆ្នាំ ២០២១ នេះ ដោយលើកមូលហេតុថា រងផលប៉ះពាល់ពីវិបត្តិកូវីដ ១៩។ ប៉ុន្តែនៅឆ្នាំ ២០២១ នេះបែរជារោងចក្រប្រកាសពន្យារពេល ដោយមិនមានពេលកំណត់ក្នុងការបើកប្រាក់ទាំងនេះជូនកម្មករទៅវិញ»។
ដោយឡែកការតវ៉ាទាមទារលក្ខខណ្ឌ និងអត្ថប្រយោជន៍រហូតដល់បិទផ្លូវជាតិលេខ ៥ នៅស្រុកក្រគរ ខេត្តពោធិ៍សាត់កាលពីថ្ងៃទី ១២ មករា បានបញ្ឈប់សកម្មភាព ហើយក្រោយពីរោងចក្រយល់ព្រមទូទាត់ផ្នែកខ្លះនៃលក្ខខណ្ឌ។
លោក ប៉ុន ឡៃ មេឃុំអន្លង់ត្នោត ស្រុកក្រគរ ប្រាប់ភ្នំពេញ-ប៉ុស្តិ៍កាលពីថ្ងៃទី ១៣ មករា ថា កម្មករជិត ៥ ០០០ នាក់ បានផ្ទុះការតវ៉ាដោយប្រមូលផ្តុំគ្នាបិទផ្លូវជាតិលេខ ៥ នៅចំណុចរោងចក្រកាត់ដេរតៃអ៊ីហ្ស៊ី ស្ថិតក្នុងភូមិទន្សាយគល់ ឃុំអន្លង់ត្នោត ស្រុកក្រគរ ខេត្តពោធិ៍សាត់។
លោកបញ្ជាក់ថា៖ «កម្មករកម្មការិនីរោងចក្រកាត់ដេរ គាត់បានផ្ទុះធ្វើកូដកម្ម ទាមទារលក្ខខណ្ឌការងារចំនួន ២ ចំណុចគឺប្រាក់អតីតភាពការងារ និងប្រាក់ជួសការឈប់សម្រាកប្រចាំឆ្នាំ។ ខ្ញុំមិនដឹងដែរថា ហេតុអ្វីបានគាត់តវ៉ាទាមទារប្រាក់ទាំងនេះ ប៉ុន្តែយ៉ាងណាពួកគាត់ក៏បានបញ្ឈប់តវ៉ា ក្រោយមានការចុះសម្របសម្រួលពីអភិបាលខេត្តពោធិ៍សាត់ លោក ម៉ៅ ធនិន»។
លោក កុល ប៊ុនធឿន ប្រធានស្តីទីមន្ទីរការងារ និងបណ្ដុះបណ្ដាលវិជ្ជាជីវៈខេត្តពោធិ៍សាត់បានប្រាប់ ភ្នំពេញ ប៉ុស្តិ៍ កាលពីថ្ងៃទី ១៣ មករាថា ការទាមទារប្រាក់អតីតភាពការងាររបស់កម្មករ គឺមិនត្រឹមត្រូវនោះទេ ព្រោះយោងតាមសេចក្តីសម្រេចរបស់ក្រសួងការងារជាបន្តបន្ទាប់ គឺប្រាក់នេះត្រូវបានសម្រេចផ្អាក។
ចំណែកការទាមទារប្រាក់ជួសការឈប់សម្រាកប្រចាំឆ្នាំវិញ លោកបញ្ជាក់ថា ជាទូទៅច្បាប់មិនតម្រូវឱ្យរោងចក្រទូទាត់ជាលុយនូវការឈប់សម្រាកប្រចាំឆ្នាំ ដែលកម្មករនៅសល់នោះទេ គឺរោងចក្រត្រូវរក្សាថ្ងៃឈប់សម្រាក ដែលកម្មករនៅសល់ក្នុង ១ ឆ្នាំ មាន ១៨ ថ្ងៃនេះបន្តទៅឆ្នាំបន្តបន្ទាប់ទៀត។ ប៉ុន្តែលោកថាដោយសារតែទម្លាប់របស់រោងចក្រខ្លះមិនបានកំណត់ពេលវេលា ឬរៀបចំពេលវេលាជាក់លាក់ឱ្យកម្មករបានឈប់សម្រាកប្រចាំឆ្នាំ ទើបរោងចក្រទាំងនោះសម្រេចទូទាត់ជាលុយជូនកម្មករ។
លោកថា៖ «គោលការណ៍របស់ក្រសួងគឺមិនតម្រូវឱ្យទូទាត់ជាលុយកាកទេ ដោយគោលការណ៍ក្រសួងតម្រូវឱ្យរោងចក្រហ្នឹងឯង រៀបចំថ្ងៃឈប់សម្រាកជូនបងប្អូន កម្មករ បានន័យថា ១ ខែ មានថ្ងៃឈប់សម្រាក ១ ថ្ងៃកន្លះ។ ប៉ុន្តែដោយសារតែខាងរោងចក្រនេះមិនបានរៀបចំ ដោយគាត់យកពេលវេលាហ្នឹងឱ្យកម្មករធ្វើការបំពេញផលិតភាពរបស់ខ្លួន។ អ៊ីចឹងទម្លាប់របស់រោងចក្រនេះ គាត់ធ្លាប់ទូទាត់ឱ្យកម្មករដល់ពេលគាត់អត់ទូទាត់ឱ្យកម្មករ ក៏ផ្ទុះការតវ៉ាទាមទារ»។
បើតាមលោក កុល ប៊ុនធឿន ដោយសារតែក្រុមហ៊ុនយល់ព្រមទូទាត់ការទាមទាររបស់កម្មករនូវប្រាក់ជួសការឈប់សម្រាកប្រចាំឆ្នាំដែលកម្មករសល់ប្រចាំឆ្នាំ ដូច្នេះនៅថ្ងៃទៅទី ១៥ មករា រោងចក្រកាត់ដេរ តៃអ៊ីហ្ស៊ី នឹងទូទាត់ប្រាក់ទាំងនេះជូនកម្មករទាំងអស់ ហើយកម្មករក៏ឯកភាពក្នុងការទទួលយកដោយបញ្ឈប់ការតវ៉ា។
លោក ប៉ាវ ស៊ីណា ប្រធានសហភាពចលនាកម្មករកម្ពុជាប្រាប់ ភ្នំពេញ ប៉ុស្តិ៍ ពីម្សិលមិញថាករណីកម្មករតវ៉ាទាមទារប្រាក់អតីតភាពការងារ គឺមិនខុសច្បាប់នោះទេ ព្រោះកម្មករកំពុងប្រឈមនឹងបញ្ហាជីវភាព ទើបពួកគាត់ទាមទារឱ្យខាងរោងចក្រពិចារណាផ្តល់ប្រាក់ទាំងនេះដល់ខ្លួន។
លោកថ្លែងថា៖ «ខ្ញុំសូមសំណូមពរឱ្យរោងចក្រដែលមានលទ្ធភាព បើកផ្តល់ប្រាក់រំឭកអតីតភាព ឬប្រាក់អតីតភាពការងារដល់កម្មករ សូមអនុវត្តនូវការបើកទៅដើម្បីទប់ស្កាត់ការទាមទារតវ៉ាផ្សេងៗ ព្រោះការទាមទារនេះគឺជាអត្ថប្រយោជន៍ ដែលគង់តែផ្តល់ជូនគាត់»។
លោក ហេង សួរ អ្នកនាំពាក្យក្រសួងការងារប្រាប់ ភ្នំពេញ ប៉ុស្តិ៍ ពីម្សិលមិញថា រឿងកម្មកររោងចក្រ យីងហីហ្គាមេនខូអិលធីឌី នៅសង្កាត់ស្ទឹងមានជ័យ រាជធានីភ្នំពេញតវ៉ាទាមទារប្រាក់អតីតភាពការងារ គឺក្រសួងកំពុងសម្របសម្រួល និងដោះស្រាយបន្ត៕
