The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​រោងចក្រ A&J ៥០០ នាក់​តវ៉ា​ឲ្យ​យក​តំណាង​សហជីព​ចូល​ធ្វើការ​វិញ




កម្មករ​រោងចក្រ A&J ៥០០ នាក់​តវ៉ា​ឲ្យ​យក​តំណាង​សហជីព​ចូល​ធ្វើការ​វិញ

កម្មករ​រោងចក្រ A&J ៥០០ នាក់​តវ៉ា​ឲ្យ​យក​តំណាង​សហជីព​ចូល​ធ្វើការ​វិញ

កំពង់ស្ពឺៈ កម្មករ​នៅ​រោងចក្រ A&J នៅ​ឃុំ​ត្រពាំង​គង​ក្នុង​​ស្រុក​សំរោងទង​បាន​បន្ត​ធ្វើ​កូដកម្ម​នៅ​ក្រៅ​រោងចក្រ​ចូល​ដល់​ថ្ងៃ​ទី ៥ កាលពី​ម្សិលមិញ​ដើម្បី​ស្នើសុំ​ឲ្យ​ថៅកែ​រោងចក្រ​ទទួល​យក​ថ្នាក់​ដឹកនាំ​សហជីព​ ៣ នាក់​ចូល​ធ្វើការ​វិញ បន្ទាប់ពី​ពួកគេ​ត្រូវ​បាន​បញ្ឈប់​​ពី​ការងារ​ដោយសារ​តែ​បាន​រួម​គ្នា​បង្កើត​សហជីព​សេរី​កម្មករ​ប្រចាំ​នៅ​រោងចក្រ​នេះ​។

កូដកម្ម​ដែល​បាន​ចាប់ផ្តើម​ធ្វើ​តាំងពី​ថ្ងៃ​ទី ១១ ខែ​មិថុនា​មក​នេះ​មាន​កម្មករ​ប្រមាណ​ ៥០០ នាក់ ដោយ​ទាមទារ​ឲ្យ​ថៅកែ​រោងចក្រ​ទទួល​យក​តំណាង​កម្មករ​បី​នាក់​ចូល​ធ្វើការ​វិញ​បន្ទាប់ពី​ថៅកែ​បាន​បញ្ឈប់​កិច្ចសន្យា​ការងារ​ដោយ​ផ្តល់​សំណង​ទូទាត់​ឲ្យ​​កម្មករ​ក្នុង​ម្នាក់ៗ​ប្រមាណ​ ៦០០ ដុល្លារ តែ​ពួកគេ​មិន​ព្រម​។ នេះ​បើ​តាម​លោក សុខ ចាន់ តំណាង​កម្មករ​ម្នាក់​ដែល​ត្រូវ​គេ​បណ្តេញ​ចេញ​ពី​ការងារ​កាលពី​ថ្ងៃ​ទី​ ៤ មិថុនា។

លោក​ ចាន់ និយាយ​ថា លោក​ និង​តំណាង​កម្មករ​ ២ នាក់​ទៀត​ត្រូវ​បាន​កម្មករ​ក្នុង​រោងចក្រ បោះឆ្នោត​ឲ្យ​ជាប់​ជា​ថ្នាក់ដឹកនាំ​សហជីព​សេរីកម្មករ​កាលពី​ដើម​ខែ​មិថុនា​ប៉ុន្តែ​ដំណឹង​នេះ​នៅ​មិន​ទាន់​​ប្រាប់​រោងចក្រ​ឲ្យ​ដឹង​នៅ​ឡើយ ស្រាប់តែ​ក្រុមហ៊ុន​បាន​លេច​ឮ​ដំណឹង​មុន​ហើយ​បាន​បញ្ឈប់​ពួក​លោក​ពី​ការងារ​តែ​ម្តង។

លោក​ ចាន់ និយាយ​ថា៖ «ខ្ញុំ​ធ្វើការ​បាន ១ ឆ្នាំ​ ១ ខែ​ហើយ ហើយ​ខ្ញុំ​តែង​ទទួល​នូវ​រង្វាន់​អ្នក​ធ្វើការ​ល្អ​ទៀត។ ការ​បញ្ឈប់​កុងត្រា​ស្រប​ពេល​ខ្ញុំ​បង្កើត​សហជីព​ក្នុង​រោងចក្រ ដើម្បី​ទាមទារ​ឲ្យ​កម្មករ​មាន​សិទ្ធិ​សេរីភាព​ថ្លៃថ្នូរ​ តែ​បែរ​ជា​គេ​យក​លេស​ថា​ខ្ញុំ​ធ្វើការ​អត់​ល្អ​ទៅ​វិញ។ តាមពិត​គេ​មិន​ចង់​ឲ្យ​យើង​បង្កើត​សហជីព​ដែល​ជួយ​កម្មករ​ទេ គេ​មាន​សហជីព​ក្នុង​រោងចក្រ​រួច​ហើយ​តែ​មិន​បាន​ជួយ​កម្មករ​ឡើយ​»។

ក្រៅពី​ការ​ទាមទារ​សុំ​​ឲ្យ​រោងចក្រ​ទទួល​យក​តំណាង​សហជីព​ចូល​ធ្វើការ​វិញ​កម្មករ​ក៏​ទាមទារ​ឲ្យ​មាន​ការ​ផ្តល់​ប្រាក់​បាយ​ថ្ងៃ​ត្រង់​ក្នុង​ម្នាក់​ ១៥ ដុល្លារ ស្នើ​កុំ​បណ្តេញ​កម្មករ​ដោយ​គ្មាន​មូលហេតុ និង​មិន​ត្រូវ​​​បង្ខំ​ឲ្យ​កម្មករ​ធ្វើការ​បន្ថែម​ម៉ោង​ឡើយ​។

លោក តាត់ សុង ប្រធាន​ការិយាល័យ​ការងារ​នៃ​មន្ទីរ​ការងារ​ខេត្ត​កំពង់ស្ពឺ​បាន​ឲ្យ​ដឹង​ថា មន្ទីរ​បាន​ហៅ​ភាគី​រោងចក្រ និង​តំណាង​សហជីព​សេរីកម្មករ​មក​ធ្វើការ​ចរចា​សម្រុះសម្រួល​គ្នា​តែ​នៅ​តែ​មិន​សះ​ជា​ទើប​មន្ទីរ​ក៏​សម្រេច​បញ្ជូន​សំណុំ​រឿង​វិវាទ​នេះ​ទៅ​ក្រុម​ប្រឹក្សា​អាជ្ញាកណ្តាល​ កាលពី​ព្រឹក​ម្សិលមិញ​។

លោក​​បញ្ជាក់​ថា៖ «ពួកគេ​ប្រកាន់​ជំហរ​រៀងៗ​ខ្លួន គឺ​ខាង​សហជីព​ទាមទារ​ឲ្យ​តំណាង​ខ្លួន​ចូល​ធ្វើការ​វិញ ឯ​រោងចក្រ​មិន​ព្រម​។ តាម​ការ​ស៊ើបសួរ​របស់​យើង​ការ​បង្កើត​សហជីព​ក្នុង​រោងចក្រ​មិនមែន​ជា​បញ្ហា​ទេ តែ​ពួកគេ (តំណាង​ទាំង​បី) បាន​ធ្វើឲ្យ​ផលិតផល​ការងារ​ថយ​ចុះ ដោយ​ដើរ​បំផុស​បំផុល​កម្មករ​ឲ្យ​គាំទ្រ​គាត់ បង្ក​ចលាចល​ក្នុង​រោងចក្រ»។

ទោះ​យ៉ាង​ណា​លោក តាក់ សុង ​ថ្លែង​​ថា៖ «អាច​ជា​លេស​ (ក្រុមហ៊ុន​បញ្ឈប់​) ក៏​ថា​បាន​ព្រោះ​ជា​ទូទៅ​យើង​ឃើញ​ក្រុមហ៊ុន​មិន​ចង់​ឲ្យ​មាន​សហជីព​ក្នុង​រោងចក្រ​ទេ​​»។

តំណាង​រោងចក្រ​ A&J ដែល​ដេរ​សម្លៀកបំពាក់​កុមារ​ មិន​អាច​ទាក់ទង​បាន​ទេ​កាលពី​ម្សិល​មិញ​។

លោក សយ ចាន់ធូ អ្នក​អង្កេត​នៃ​​សហជីព​សេរីកម្មករ​បាន​ថ្លែង​​ថា៖ «នេះ​ជា​ករណី​រើសអើង​សហជីព​សុទ្ធសាធ ដោយសារ​គេ​ខ្លាច​សហជីព​ធ្វើការ​តវ៉ា​ទាមទារ​លក្ខខណ្ឌ​ការងារ​ប្រសើរ​​ឡើង​ជូន​កម្មករ​។ គេ​មិន​ចង់​ឲ្យ​មាន​សហជីព​ដែល​ហ៊ាន​ជួយ​កម្មករ​ការពារ​ផលប្រយោជន៍​ពិតប្រាកដ​ជូន​កម្មករ​​នោះ​ទេ»៕

អត្ថបទគួរចាប់អារម្មណ៍