ភ្នំពេញៈ កម្មករកាត់ដេរ និងអ្នកគាំទ្រប្រហែល ៦០០០ នាក់ ត្រូវបានរំពឹងថានឹងធ្វើការតវ៉ានៅមុខក្រសួងសង្គមកិច្ច និងសាលាក្រុងភ្នំពេញ ដោយជំរុញឲ្យរដ្ឋាភិបាល គាំទ្រការតវ៉ារបស់ពួកគេដែលបានឈានចូលដល់សប្តាហ៍ទី ២ ហើយ។
លោកឡាច ស៊ីធន កម្មករ និងជាសមាជិកសហជីព ស៊ីខៅឌូ ដែលតំណាងកម្មករនៅរោងចក្រ SL បានឲ្យដឹងថា ការធ្វើកូដកម្មនៅរោងចក្រ SL នឹងរៀបចំឡើងនៅថ្ងៃនេះ ឬថ្ងៃស្អែក។
លោក បញ្ជាក់ថា៖ «[កម្មករ] គ្រោងប្រមូលផ្តុំគ្នា និងស្នើសុំកិច្ចអន្តរាគមន៍ពីសាលាក្រុង ហើយបន្តស្នើក្រសួងសង្គមកិច្ចជំរុញមន្រ្តីរោងចក្រ SL ធ្វើការចរចា»។ បើតាមលោកស៊ីធន ការចរចាលើកទី២ រវាងកម្មករ និងថ្នាក់គ្រប់គ្រងរោងចក្រកាលពីថ្ងៃសុក្រ ពុំទទួលបានលទ្ធផលទេ។ មន្រ្តីក្រុមហ៊ុន ហាក់មិនពិចារណាលើការទាមទាររបស់កម្មករឡើយ ដោយបញ្ជូនអ្នកបកប្រែដែលគ្មានសិទិ្ធអំណាចមកចរចាជាមួយតំណាងកម្មករ។ ក្នុងចំណោមការទាមទារទាំង៩ចំណុចក៏មានការទាមទារប្រាក់ឈ្នួលប្រចាំខែអប្បបរមា១៥០ដុល្លារផងដែរ។
លោក អាត់ ធន់ ប្រធានសហជីព ស៊ីខៅឌូ បានប្រាប់កម្មករកាលពីថ្ងៃសុក្រថា៖ «ខ្ញុំកំពុងធ្វើការជាមួយនឹងក្រុមហ៊ុនម៉ាកដូចជា H&M, Gap និង Levi's ដើម្បីដាក់សម្ពាធលើថ្នាក់គ្រប់គ្រងSLឲ្យរកដំណោះស្រាយជូនកម្មករ»។
លោក វង្ស សុវណ្ណ អគ្គលេខាធិការរងនៃគណៈកម្មាធិការដោះស្រាយកូដកម្ម និងបាតុកម្មនៃក្រសួងសង្គមកិច្ច បានថ្លែងថា កម្មករ SL ទាមទារច្រើនពេក និងថា គណៈកម្មាធិការលោកចង់ឲ្យមានការសម្របសម្រួលគ្នា។ «យើងមិនចង់ឲ្យកម្មករប្រមូលផ្តុំគ្នាធ្វើកូដកម្មទេ ព្រោះវាស្ទះចរាចរណ៍»៕ TK
