សៀមរាបៈ កម្មករក្រុមហ៊ុនវីហ្គ្រីន ខូលអិលធីឌីប្រមាណជាង ២០០ នាក់ដែលធ្វើការសម្អាតតំបន់ប្រាសាទអង្គរវត្ត និងប្រាសាទនានាក្នុងខេត្តសៀមរាបបានយល់ព្រមបញ្ឈប់ការតវ៉ា និងបានចូលធ្វើការធម្មតាវិញកាលពីព្រឹកម្សិលមិញ ក្រោយពីថៅកែក្រុមហ៊ុនបានយល់ព្រមដំឡើង ១៥ ដុល្លារលើប្រាក់ខែគោលរបស់ពួកគេ និងបានដោះស្រាយតាមការទាមទារមួយចំនួនទៀតរបស់កម្មករ។
កាលពីថ្ងៃទី ៤ ខែមករា ឆ្នាំ ២០១៩ កម្មករក្រុមហ៊ុន វីហ្គ្រីន ខូលអិលធីឌី ដែលធ្វើការសម្អាតនៅតាមតំបន់ប្រាសាទអង្គរវត្ត និងប្រាសាទផ្សេងៗទៀតក្នុងខេត្តសៀមរាបជាង ២០០ នាក់បានប្រមូលផ្តុំគ្នាតវ៉ាដើម្បីអំពាវនាវទៅប្រមុខរដ្ឋាភិបាល និងថៅកែក្រុមហ៊ុនឲ្យជួយដំឡើងប្រាក់ឈ្នួលដែលពួកគេទទួលបានពី ៨០ ដុល្លារឲ្យដល់ ១៧០ ដុល្លារក្នុង ១ ខែ។
ក្រៅពីការទាមទារដំឡើងប្រាក់ខែពួកគេក៏ទាមទារលក្ខខណ្ឌការងារជាង ១០ ចំណុចដូចជាថ្ងៃឈប់សម្រាកប្រចាំឆ្នាំ និងការបានឈប់សម្រាកនៅថ្ងៃបុណ្យជាតិជាដើម។
លោក គា ទួត តំណាងកម្មករដែលបម្រើការក្នុងក្រុមហ៊ុន វីហ្គ្រីន ខូលអិលធីឌីជិត ១០ ឆ្នាំមកហើយបានប្រាប់ភ្នំពេញប៉ុស្តិ៍កាលពីម្សិលមិញថា នៅរសៀលថ្ងៃសៅរ៍ ទី ៥ ខែមករាថៅកែក្រុមហ៊ុនព្រមចរចាជាមួយតំណាងកម្មករ ដោយក្នុងនោះភាគីក្រុមហ៊ុនយល់ព្រមដំឡើងប្រាក់ខែ ១៥ ដុល្លារពីលើប្រាក់ខែគោលដែលកម្មករទទួលបាន។
លោកបន្តថា ក្រៅពីយល់ព្រមដំឡើងប្រាក់ខែនេះខាងក្រុមហ៊ុនក៏យល់ព្រមតាមសំណើរបស់កម្មករលើលក្ខខណ្ឌការងារមួយចំនួនទៀតផងដែរ។
តំណាងកម្មកររូបនេះបញ្ជាក់ថារហូតមកដល់ថ្ងៃទី ៦ មករាម្សិលមិញកម្មករទាំងអស់បានព្រមព្រៀងគ្នាទទួលយកដំណោះស្រាយដែលក្រុមហ៊ុនបានផ្តល់ឲ្យ និងបានចូលធ្វើការជាធម្មតាវិញហើយ។
លោកនិយាយថា៖ «កម្មករគាត់យល់ព្រមទាំងអស់គ្នាហើយជាង ២០០ នាក់ដែលខាងក្រុមហ៊ុនគាត់ឡើងឲ្យមិនមានអ្នកជំទាស់ទេ ហើយល្ងាចហ្នឹង (ថ្ងៃអាទិត្យ) ចុះកិច្ចសន្យាជាមួយក្រុមហ៊ុនដែលខាងក្រុមហ៊ុន គាត់បានសន្យាឡើងឆ្នាំ ២០១៩ នេះ ១៥ ដុល្លារ ហើយឆ្នាំបន្តបន្ទាប់ឡើង ២០ ដុល្លារ និងអ្នកដែលប្រាក់ខែទាបឆ្នាំក្រោយហ្នឹងឡើងឱ្យបាន ១២០ ដុល្លារគ្រប់គ្នា»។
ភ្នំពេញប៉ុស្តិ៍ មិនអាចទាក់ទងតំណាងក្រុមហ៊ុន វីហ្គ្រីន ខូលអិលធីឌី លោក ហៀង ណារិន បានទេកាលពីថ្ងៃអាទិត្យម្សិលមិញ។ ចំណែកលោក ឡុង កុសល អ្នកនាំពាក្យអាជ្ញាធរជាតិអប្សរាសុំមិនធ្វើអធិប្បាយអ្វីទាំងអស់ជុំវិញករណីនេះដោយបង្វែរសំណួរទៅខាងក្រុមហ៊ុន។
ប្រធានសហព័ន្ធសហជីពវិស័យទេសចរណ៍ និងសេវាកម្មកម្ពុជាលោក ម៉ម រិទ្ធី ដែលតាមដានករណីនេះបាននិយាយថា បើមានការចរចាហើយមានការសម្រេចរបស់កម្មករក្នុងការទទួលយកលក្ខខណ្ឌតាមការព្រមព្រៀងនោះគឺជាសិទ្ធិរបស់ពួកគាត់។ តែលោកអះអាងថាបច្ចុប្បន្នប្រាក់ខែដែលទាបបែបនេះមិនអាចធ្វើឱ្យជីវភាពរបស់កម្មករមានភាពល្អប្រសើរនោះទេ។
លោកថ្លែងថា៖ «មិនគួរឲ្យកើតមានបុគ្គលិកទទួលបានប្រាក់ខែប៉ុណ្ណឹងទេឃើញថានេះនៅក្នុងខេត្តសៀមរាបទៀតដែលជាខេត្តមានសក្តានុពលខ្ពស់ពីវិស័យទេសចរណ៍ដែលចំណូលចូលបានរាប់សែនលានដុល្លារ ដូច្នេះថា្នក់ដឹកនាំប្រទេសគួរយកចិត្តទុកដាក់ និងមិនត្រូវសម្រេចឲ្យប្រាក់ខែពួកគាត់ប៉ុណ្ណឹងទេ»។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ថ្លែងថាករណីនេះក្រសួងបានចុះទៅសម្របសម្រួល និងបានដាក់កំហិតឲ្យអនុវត្តតាមការស្នើសុំរបស់តំណាងកម្មករ ហើយក្រសួងនឹងបន្តសម្របសម្រួលរឿងនេះបន្តទៀត។
លោកបញ្ជាក់ថា៖ «ករណីក្រុមហ៊ុន វីហ្គ្រីន នេះគឺជាការអនុវត្តនូវនីតិវិធីវិវាទការងាររួមដែលមានដីការក្សាការពារដើម្បីឲ្យកម្មករនិយោជិតដែលធ្វើកូដកម្មខុសនីតិវិធីចូលធ្វើការវិញក្នុងរយៈពេល ៤៨ ម៉ោង។ ជាទូទៅក្រុមហ៊ុនអាចទទួលយកវិញរាល់បុគ្គលិកទាំងអស់ដែលមិនជាប់ពាក់ព័ន្ធនឹងបទបំផ្លិចបំផ្លាញទ្រព្យសម្បត្តិ មិនរារាំងបិទផ្លូវចេញចូលរោងចក្រ មិនគំរាមកំហែងកម្មករដែលចង់ចូលធ្វើការ»។
បើតាមតំណាងកម្មករ ក្រុមហ៊ុន វីហ្គ្រីន ខូលអិលធីឌី គឺជាក្រុមហ៊ុនទទួលបានគម្រោងពីអាជ្ញាធរជាតិអប្សរាលើការសម្អាតនៅតាមតំបន់ប្រាសាទអង្គរវត្ត និងប្រាសាទផ្សេងៗទៀតក្នុងខេត្តសៀមរាបដែលក្រុមហ៊ុននេះបានបើកដំណើរការតាំងពីឆ្នាំ ២០១៣ ដែលមានកម្មករបម្រើការចំនួន ៥៥១ នាក់ហើយភាគច្រើនជាស្ត្រី។ ក្នុងនោះកម្មករទាំងជាង ៥០០ នាក់នោះគឺទទួលបានប្រាក់ខែចន្លោះពី ៨០ ដុល្លារទៅដល់ ១៤០ ដុល្លារតាមអតីតភាពការងាររបស់ពួកគាត់៕