.jpg)
កម្មករសំណង់ពេលតវ៉ាទាមទារបើកប្រាក់ឈ្នួលពីថៅកែចិន។ រូបថត សហការី
ព្រះសីហនុៈ កម្មករសំណង់ជាជនជាតិខ្មែរ និងចិនជាង ៣០ នាក់ តំណាងឲ្យកម្មករជាង ១០០ នាក់ បានប្រមូលផ្តុំគ្នាតវ៉ាកាលពីថ្ងៃទី ៦ ខែមេសា ដើម្បីឲ្យម្ចាស់អគារជាជនជាតិចិនកម្ពស់ ២២ ជាន់ស្ថិតក្នុងភូមិ ១ សង្កាត់លេខ ៣ ក្រុងព្រះសីហនុ ខេត្តព្រះសីហនុបើកប្រាក់ខែឲ្យពួកគាត់រយៈពេល ៤ ខែដែលមិនទាន់បើកជាង ១០ ម៉ឺនដុល្លារ ខណៈម្ចាស់អគារសន្យាទូទាត់នៅថ្ងៃទី ១២ មេសាខាងមុខ។
អ្នកស្រី គា ស្រីគុំ តំណាងឲ្យកម្មករទាំងអស់ និងជាអ្នកបកប្រែភាសាចិនបានប្រាប់ភ្នំពេញប៉ុស្តិ៍កាលពីថ្ងៃទី ៦ ខែមេសា ថាកម្មករជាជនជាតិខ្មែរ និងចិន ដែលមកពីផ្នែក ពិតាន ការ៉ូ និងលាបថ្នាំអគារបានធ្វើការនៅអគារនេះតាំងពីខែ ១២ ឆ្នាំ ២០១៩ រហូតដល់ពាក់កណ្តាលខែមីនា។
អ្នកស្រីបន្តថា អំឡុងពេលធ្វើការនោះថៅកែជាជនជាតិចិនមិនបានបើកប្រាក់ឲ្យទាំងអស់នោះទេ ដោយសន្យាថានឹងបើកឲ្យនៅពេលបញ្ចប់ការងារដោយគ្រាន់តែបើកឲ្យកម្មករនូវប្រាក់សម្រាប់ម្ហូបប៉ុណ្ណោះ។
អ្នកស្រីបានថ្លែងឲ្យដឹងថា៖ «យូរណាស់ហើយដែលគាត់មិនបើកលុយពួកខ្ញុំ គឺបើកតែម៉ាហូបៗរហូតដល់កម្មករមួយចំនួនទៅផ្ទះអស់ខ្លះ ហើយនៅមេការកម្មករ និងកម្មករមួយចំនួនដែលនៅចាំបើកលុយ ហើយថៅកែនៅតែសន្យាថា ឲ្យរង់ចាំៗរហូតផ្ទុះការតវ៉ានេះ»។
លោក មាជ ណារី ជាកម្មករសំណង់ដែលមានស្រុកកំណើតនៅខេត្តសៀមរាប បានថ្លែងឲ្យដឹងផងដែរថា បច្ចុប្បន្ននេះលោកគ្មានលុយទិញបាយហូបនោះទេ ព្រោះម្ចាស់អគារនេះមិនព្រមបើកលុយឲ្យខ្លួនដែលខំធ្វើការជាយូរខែមកហើយ។ លោកបន្តថា នៅពេលដែលមិនបានទទួលបានប្រាក់ខែ សូម្បីតែគ្រួសារស្ថិតនៅស្រុកកំណើតក៏គ្មានប្រាក់សម្រាប់ផ្គត់ផ្គង់ជីវភាពដែរ។
លោកបានឲ្យដឹងទៀតថា៖ «ខ្ញុំធ្វើការនេះយូរហើយ ប្រហែលជា ៦ ទៅ ៧ ខែហើយ។ ខ្ញុំគ្មានអីទេ មានតែសំណូមពរឲ្យជួយផ្តល់ដំណោះស្រាយឲ្យមេជាងខ្ញុំ ហើយមេខ្ញុំ ក៏គាត់មានលុយផ្តល់ឲ្យខ្ញុំបន្តទៀត។ រាល់ថ្ងៃនេះខ្ញុំនៅផ្ទះជួលនេះក៏គ្មានលុយបង់ផ្ទះទៀត ដល់ខែគេហើយ ព្រោះសន្យាមួយអាទិត្យមុននោះថាដោះស្រាយឲ្យដល់ពេលឥឡូវនេះ គ្មានបើកសោះ»។
ថៅកែជាជនជាតិចិនដែលត្រូវបានកម្មករចោទប្រកាន់ថា មិនបានបើកប្រាក់ខែឲ្យពួកគាត់មិនអាចរកប្រភពដើម្បីសុំការអត្ថាធិប្បាយបាននោះទេកាលពីថ្ងៃទី ៧ ខែមេសា ឆ្នាំ ២០២០។
លោក យ៉ូវ ខេមរា ប្រធានមន្ទីរការងារខេត្តព្រះសីហនុបានអះអាងប្រាប់ភ្នំពេញប៉ុស្តិ៍កាលពីថ្ងៃទី ៦ ខែមេសា ថាក្រោយការតវ៉ា មន្ត្រីនៃមន្ទីរការងារ បានចុះទៅអន្តរាគមន៍។
លោកបានថ្លែងឲ្យដឹងទៀតថា ក្នុងនោះម្ចាស់សំណង់កម្ពស់ ២២ ជាន់ដែលមានថៅកែជាជនជាតិចិននោះបានសន្យានឹងផ្តល់ប្រាក់ខែដល់កម្មកររបស់ខ្លួនជាង ១០០ នាក់នោះនៅថ្ងៃទី ១២ មេសាខាងមុខ។
លោកបន្ថែមថា នៅថ្ងៃអង្គារនេះកម្មករទាំងអស់ក៏នឹងមកដាក់ពាក្យបណ្តឹងនៅមន្ទីរការងារបន្ថែមទៀត ដើម្បីឲ្យមន្ទីរប្រមូលតួលេខត្រឹមត្រូវ និងបន្តតាមដាន ដែលលោកលើកឡើងថា ក្នុងករណីដែលថៅកែអគារនេះ មិនគោរពតាមការសន្យាក្នុងការដោះស្រាយដល់កម្មករនោះ មន្ទីរការងារខេត្តនឹងបន្តនីតិវិធីទៅតាមច្បាប់។
លោកបញ្ជាក់ថា៖ «ក្រុមការងារយើងបានកត់កំណត់ហេតុអស់ហើយនឹងបន្តតាមដានទៀតនូវការសន្យារបស់ថៅកែអគារដែលថានឹងដោះស្រាយដល់កម្មករនៅថ្ងៃទី ១២។ ដោយសារតែការដ្ឋានសំណង់នេះមិនទាន់ធ្វើហើយ ១០០ ភាគរយទេ ដូច្នេះមិនទាន់មានឈ្មោះនោះទេ ហើយក៏មិនដឹងថា គម្រោងធ្វើអីដែរ»។
លោក ខេមរា បានឲ្យដឹងថាសំណង់អគារនេះត្រូវបានថៅកែជាជនជាតិចិនបានជួលពីពលរដ្ឋខ្មែរ ដែលជាម្ចាស់ដីដើម្បីសាងសង់អគារនេះ ប៉ុន្តែព័ត៌មានបន្ថែមទាក់ទងនឹងអគារនេះមន្ទីរការងារខេត្តកំពុងបន្តការតាមដាន។
អ្នកស្រី គា ស្រីគុំ រំពឹងថាដល់ថ្ងៃកំណត់នឹងទទួលបានដំណោះស្រាយ ហើយក្នុងករណីម្ចាស់សំណង់នេះនៅតែមិនបើកប្រាក់ខែជូនពួកគាត់ទៀតកម្មករទាំងអស់នឹងបន្តប្រមូលផ្តុំគ្នាជាថ្មីទៀតរួមទាំងបន្តស្វែងរកកិច្ចអន្តរាគមន៍ពីមន្ទីរការងារបន្ថែមទៀតផងដែរ៕
