ព្រះសីហនុៈ កម្មករសំណង់ជិត ១០០ នាក់ ព្រមទទួលយកប្រាក់ ១០០ ដុល្លារ ជាបណ្តោះអាសន្ន ដើម្បីបានប្រាក់ត្រឡប់ទៅស្រុកកំណើត បន្ទាប់ពីពួកគេតវ៉ានៅពេលការដ្ឋានសំណង់ឈ្មោះ ថាយ សឿ ដែលមានថៅកែជនជាតិចិន ស្ថិតនៅភូមិ ៤ សង្កាត់លេខ ៤ ក្នុងខេត្តព្រះសីហនុបានផ្អាកការងារពួកគេ ហើយបានបណ្តេញពួកគេចេញមិនឲ្យស្នាក់នៅក្នុងការដ្ឋានដោយមិនទាន់បើកប្រាក់ឈ្នួលឲ្យ។
កាលពីរសៀលថ្ងៃទី ២៧ ខែ មីនា ឆ្នាំ ២០២០ មានកម្មករជិត ១០០ នាក់ បានប្រមូលផ្តុំគ្នាតវ៉ានៅក្នុងការដ្ឋានសំណង់អគារកម្ពស់ ១២ ជាន់ បន្ទាប់ពីថៅកែជនជាតិចិនបានផ្តាច់ទឹកផ្តាច់ភ្លើងនៅកន្លែងដែលពួកគាត់ស្នាក់នៅបណ្តោះអាសន្នហើយបង្ខំឲ្យពួកគាត់ចាកចេញដោយមិនបើកប្រាក់ខែឲ្យពួកគាត់។
អ្នកស្រី នឿ សុខគាំ កម្មករសំណង់ដែលមានស្រុកកំណើតនៅខេត្តបាត់ដំបង បានប្រាប់ភ្នំពេញប៉ុស្តិ៍ពីថ្ងៃចន្ទថា អ្នកស្រីបានធ្វើការនៅការដ្ឋានសំណង់នេះជាង ១ ឆ្នាំមកហើយ ប៉ុន្តែក្នុងរយៈពេលចុងក្រោយនេះខាងក្រុមហ៊ុនបានជំរុញឲ្យកម្មករទាំងអស់ថែមម៉ោង និងពន្លឿនការងារឲ្យឆាប់ចប់ដោយអះអាងថា ពេលចប់ការងារនឹងបើកប្រាក់ឈ្នួលសរុបជូនកម្មករ។ ប៉ុន្តែនៅពេលមានការផ្ទុះជំងឺកូវីដខាងថៅកែចិនបានប្រកាសឲ្យកម្មករទាំងអស់ ឈប់សម្រាកទៅផ្ទះដោយមិនព្រមបើកប្រាក់ឈ្នួលដែលនៅសេសសល់រយៈពេលជាង ២ ខែនោះឲ្យទេ។
អ្នកស្រីបញ្ជាក់ថា៖ «យើងធ្វើការទៅឲ្យមេការម៉ៅបន្តៗដែលមានការទទួលបន្តៗគ្នាទៅតាមការងារហើយក្រុមហ៊ុន ចេះតែឲ្យយើងធ្វើទៅៗ ចាំចប់ហើយ ចាំបើកទាំងអស់។ ពេលយើងរៀបការ៉ូទាំងយប់ទាំងថ្ងៃហើយ គេថា អត់មាន គេផ្អាកការដ្ឋានហ្នឹង។ ប្រាក់ឈ្នួលដែលពួកខ្ញុំ (មេការ) ត្រូវទទួលបានក្នុងម្នាក់ៗខ្លះក៏ ២ ពាន់ជាងក៏ ៣ ពាន់ជាង»។
អ្នកស្រី ពិសិដ្ឋ ធារ៉ា មេការសំណង់ដែលទទួលសាងសង់ផ្នែករៀបឥដ្ឋការ៉ូក្នុងការដ្ឋាននេះ និងមានកម្មករមួយចំនួនថ្លែងថា បន្ទាប់ពីកម្មករបានផ្ទុះការតវ៉ា ភាគីខាងក្រុមហ៊ុនបានសម្រេចផ្តល់ជូនកម្មករក្នុងម្នាក់ៗ ១០០ ដុល្លារ ដើម្បីជាសោហ៊ុយ ត្រឡប់ទៅផ្ទះសិន ហើយនៅថ្ងៃទី ៣០ ខែមេសាខាងមុខ ក្រុមហ៊ុននឹងទូទាត់សងកម្មករបន្ថែមទៀត។
អ្នកស្រីសម្តែងក្តីបារម្ភស្របពេលដែលក្រុមហ៊ុននេះបានបញ្ជាក់ថា នៅចំពោះមុខ គេទូទាត់ជូនតែកម្មករប៉ុណ្ណោះ ហើយចំពោះមេការដែលទទួលម៉ៅការបន្តនោះគឺមិនទាន់មានដំណោះស្រាយទេ។
អ្នកស្រីបន្ថែមថា៖ «ខ្ញុំមានមេការចិនមួយទៀតទទួលពីក្រុមហ៊ុនផ្ទាល់ បន្ទាប់ពីខាងក្រុមហ៊ុនបានឲ្យម្តង ៦ ០០០ ដុល្លារ យកទៅចែកគ្នាម្នាក់បន្តិចៗ ហើយគេថាយកប៉ុណ្ណឹងទៅដោះស្រាយម្ហូបសិនទៅ ចាំថ្ងៃចន្ទ ចាំដោះស្រាយទៀត ដល់ថ្ងៃចន្ទ គេឲ្យតែ ៣ ពាន់ដុល្លារទៀតទេ ហើយចែកកម្មករតែម្នាក់ ១០០ ដុល្លារៗអស់រលីង»។
បើតាមអ្នកស្រី ធារ៉ា ទឹកប្រាក់ដែលក្រុមហ៊ុននេះមិនទាន់បើកជូនពួកគាត់ ដែលមានអ្នកម៉ៅការជាច្រើនក្រុមផ្សេងៗគ្នា និងក្រុមកម្មករទាំងអស់មានចំនួនសរុបប្រមាណជាង ៣ ម៉ឺនដុល្លារដែលអ្នកស្រីរំពឹងថា អាជ្ញាធរពាក់ព័ន្ធនឹងជួយអន្តរាគមន៍ផ្តល់ដំណោះស្រាយជូនពួកគាត់ ហើយក្នុងករណីដែលដល់ថ្ងៃកំណត់មិនមានដំណោះស្រាយនោះ កម្មករនឹងបន្តការតវ៉ាបន្តទៀត។
តំណាងក្រុមហ៊ុន ថាយ សឿ ដែលមានថៅកែជាជនជាតិចិនមិនអាចស្វែងរកប្រភពទាក់ទង ដើម្បីសួរនាំពីករណីនេះបានទេ។ ប៉ុន្តែទោះយ៉ាងណាបើតាមអ្នកស្រី ចាម សុខគា ដែលទទួលបានគម្រោងពីក្រុមហ៊ុន ថាយ សឿ នេះផ្ទាល់បញ្ជាក់ថា លុយដែលក្រុមហ៊ុនមិនទាន់បើកជូនអ្នកស្រី ដើម្បីបន្តផ្តល់ជូនអ្នកម៉ៅការពីអ្នកស្រីបន្តទៀតនោះមានដល់ទៅជាង ៥ ម៉ឺនដុល្លារ។
អ្នកស្រីបន្តថា អ្នកស្រីក៏រង់ចាំលុយពីក្រុមហ៊ុននេះទម្លាក់មកឲ្យដូចគ្នា ប៉ុន្តែក្រុមហ៊ុនបានព្យាយាមគេចវេះ និងមិនព្រមបើកឲ្យរហូត។ អ្នកស្រី សុខគា បញ្ជាក់ថា លុយមិនព្រមបើកថែមទាំងដេញកម្មករអ្នកស្រីមិនឲ្យស្នាក់នៅក្នុងការដ្ឋានទៀត។ «ឲ្យកម្មករទាំងអស់ រើចេញពីក្នុងការដ្ឋានហ្នឹងទាំងអស់ខ្លាចឆ្លងជំងឺកូវីដ ប៉ុន្តែអត់បើកប្រាក់ អត់ឲ្យលុយគេ គេម៉េចរើចេញបាន គេធ្វើការប្រើកម្លាំងពលកម្មរបស់គេ អត់មានលុយកម្មករម៉េចព្រម។ ខ្ញុំអាណិតកម្មករខ្ញុំណាស់ពួកគាត់ស្រួលនិយាយគ្នាណាស់។ កម្មករមកធ្វើការ គាត់មានប្រពន្ធមានកូនដល់ពេលដេញគាត់ទៅផ្ទះអត់មានលុយទៅផ្ទះម៉េចហើយទៅមានអីហូប»។
លោក យ៉ូវ ខេមរា ប្រធានមន្ទីរការងារខេត្តព្រះសីហនុថ្លែងពីថ្ងៃចន្ទថា មន្ត្រីមន្ទីរការងារនឹងបន្តសម្របសម្រួលករណីនេះបន្តទៀតខណៈដែលក្រុមហ៊ុនបានយល់ព្រមផ្តល់សំណងខ្លះជូនកម្មករ និងបន្តដោះស្រាយក្នុងពេលខាងមុខទៀត។ «នេះជារូបភាពការបន្តការម៉ៅការទេ ដោយសារតែក្បត់ទំនុកចិត្តសម្រាប់អ្នកម៉ៅការបន្តទៅអ្នកម៉ៅការធំអ៊ីចឹងណា។ ដល់ពេលគាត់មិនដឹងប្តឹងអ្នកណា គាត់មកប្តឹងមន្ទីរ មន្ទីរក៏ជួយគាត់ទៅ។ យើងចាំមើលសម្របសម្រួលបន្តទៀត»៕