.jpg)
កម្មករឡឥដ្ឋ វ៉ាន់ ឆៃលី (ស្ដាំ) ដែលត្រូវបានគេវៃ។ រូបថត ហ្វេសប៊ុក
ឧត្ដរមានជ័យៈ កម្មករឡឥដ្ឋម្នាក់ក្នុងខេត្តឧត្ដរមានជ័យបានសុំឲ្យសមាគមសិទ្ធិមនុស្សអាដហុក ជួយរៀបចំពាក្យបណ្ដឹងដាក់ទៅតុលាការដើម្បីជួយស្វែងរកយុត្តិធម៌ ករណីមេបញ្ជាការ និងមេបញ្ជាការរងនៃកងពលតូចលេខ ៤ និងពលទាហាន ៣ នាក់ទៀត ប្រើហិង្សាលើរូបគាត់បណ្ដាលឲ្យរបួសធ្ងន់។
លោក វ៉ាន់ ឆៃលី អាយុ ២៧ ឆ្នាំ ជាកម្មករបម្រើក្នុងសិប្បកម្មឡឥដ្ឋមួយ នៅភូមិអូរឫស្សី សង្កាត់-ក្រុងសំរោង ខេត្តឧត្ដរមានជ័យ បានប្រាប់ភ្នំពេញប៉ុស្តិ៍ពីម្សិលមិញថា គាត់ត្រូវបានលោកឧត្ដមសេនីយ៍ទោ សន ស៊ា និងលោកឧត្ដមសេនីយ៍ត្រី ចាន់ នី ដែលជាមេបញ្ជាការ និងជាមេបញ្ជាការរងនៃកងពលតូចលេខ ៤ និងពលទាហាន ៣ នាក់ទៀត ប្រើហិង្សាលើរាងកាយ និងចាប់បង្ខាំងគាត់ទុកក្នុងបន្ទាយយោធាដោយខុសច្បាប់អស់ពេលជិត ៥ ម៉ោង បន្ទាប់ពីគាត់បដិសេធដឹកឥដ្ឋទៅដាក់ទីតាំង ២ កន្លែងផ្សេង ផ្ទុយពីលិខិតទិញ-លក់ រវាងម្ចាស់សិប្បកម្មឡឥដ្ឋ និងម្ចាស់ដេប៉ូដែលគាត់ទទួលបាន។
លោក ឆៃលី បានថ្លែងថា កាលពីថ្ងៃទី ៣១ ខែ កក្កដា ឆ្នាំនេះ គាត់និងមិត្តរួមការងារ ៤ នាក់ទៀត បានដឹកឥដ្ឋ ១៥ ០០០ ដុំ យកទៅឲ្យអតិថិជនម្នាក់តាមការបញ្ជាទិញរបស់ម្ចាស់ដេប៉ូលក់គ្រឿងសំណង់ម្នាក់ឈ្មោះ ដាំ វីរ៉ាសិទ្ធិ។
ក្នុងការបញ្ជាទិញនោះ ម្ចាស់ដេប៉ូបានឲ្យពួកគាត់ទម្លាក់ឥដ្ឋនៅចំណុចចង្ក្រានយក្ស ក្នុងឃុំបឹងបេង ស្រុកបន្ទាយអម្ពិល ដែលជាទីតាំងប្រមូលទិញ-លក់ដំឡូងមី។ លុះពួកគាត់ដឹកដល់ទីតាំងកំណត់នោះ ក៏បានជួបលោកឧត្ដមសេនីយ៍ទោ សន ស៊ា ដែលជាអ្នកបញ្ជាទិញឥដ្ឋទាំងនោះបន្តពីម្ចាស់ដេប៉ូខាងលើ។ ពេលនោះ លោក ស៊ា បានឲ្យពួកគាត់ទម្លាក់ឥដ្ឋនៅទីតាំងដែលបានព្រមព្រៀងគ្នាពីមុនមកចំនួន ៧ ០០០ ដុំ នៅសល់ ៨ ០០០ ដុំ យកទៅដាក់ក្នុងបន្ទាយចំនួន ៥ ០០០ ដុំ និង ៣ ០០០ ដុំទៀត យកទៅកន្លែងផ្សេងដោយឲ្យកូនទាហានម្នាក់ចាំនាំផ្លូវ។
លោក ឆៃលី ថា៖ «ប្រាប់ហើយគាត់ [សន ស៊ា] ក៏ឡើងរថយន្តបើកចេញទៅបាត់»។
លោកបានបន្តថា ដោយសារមានការប្រាប់ឲ្យដឹកឥដ្ឋយកទៅទម្លាក់ខុសទីតាំងដែលបានកំណត់គាត់ក៏បានទូរស័ព្ទទៅម្ចាស់សិប្បកម្មឡឥដ្ឋ ពីរឿងនោះ ប៉ុន្តែម្ចាស់សិប្បកម្មបានប្រាប់ឲ្យគាត់ទម្លាក់ឥដ្ឋទាំងអស់នៅលើទីតាំងដែលបានព្រមព្រៀងគ្នាពីមុនវិញ។ ពេលនោះមានពលទាហានម្នាក់បានស្ដាប់ឮក៏បានទូរស័ព្ទប្រាប់លោក ស៊ា ហើយលោក ស៊ា ក៏បានសុំជួបនិយាយផ្ទាល់ជាមួយគាត់។
យ៉ាងណាក្ដី លោក ឆៃលី មិនបានប្រាប់លម្អិតអំពីកិច្ចសន្ទនារវាងគាត់ និងលោក ស៊ា នោះទេ ដោយគ្រាន់តែថា លោក ស៊ា ឲ្យពួកគាត់ដឹកឥដ្ឋទាំងនោះទៅទម្លាក់នៅទីតាំងដែលគាត់បានប្រាប់ពីព្រឹករួចមកហើយនោះ និងបានប្រាប់បន្ថែមថា ដឹកមកកុំ «ឆ្កួត» តាមមេពួកឯងអី។
លោក ឆៃលី បានបញ្ជាក់ថា៖ «ពេលនោះ ខ្ញុំបានសួរគាត់ [លោក ស៊ា] ក្នុងន័យនិយាយលេងថា ពូឯងស័ក្តិប៉ុន្មាន បានហ៊ានថាថៅកែស្រីខ្ញុំថាឆ្កួត។ មួយសន្ទុះក្រោយមកស្រាប់តែលោក ចាន់ នី ជិះឡានមកដល់ជាមួយកូនទាហាន ៣ នាក់ទៀត ហើយបានប្រាប់ឲ្យខ្ញុំឡើងឡានបើកទៅបន្ទាយរបស់គាត់ ប៉ុន្តែខ្ញុំបដិសេធ»។
លោកថា៖ «ពេលនោះខ្ញុំក៏ត្រូវលោក ចាន់ នី ចាប់ក្របួចកអាវ ហើយទះកំផ្លៀង ១ ដៃ និងបានបញ្ជាឲ្យកូនទាហានចាប់សែងខ្ញុំដាក់ឡានដឹកទៅបន្ទាយតែម្ដង។ ខ្ញុំត្រូវបានលោក សន ស៊ា បង្ខំឲ្យលុតជង្គង់លើដុំក្រួស និងបានឲ្យកូនទាហានរបស់គាត់ ៣ នាក់ ទាត់ធាក់ខ្ញុំយ៉ាងកំរោល ហើយគាត់ផ្ទាល់បានយកដំបងឈើមូលមកវាយខ្ញុំយ៉ាងចាស់ដៃ ចំស្មាខាងឆ្វេង ចំនួន ៣ ដំបង បណ្ដាលឲ្យបាក់ដំបងនោះ។ បន្ទាប់មកគាត់បានយកកំណាត់ដំបងបាក់នោះមកវាយក្បាលខ្ញុំទៀតបណ្ដាលរងរបួសធ្ងន់ធ្ងរ និងបានបង្អត់អាហារថ្ងៃត្រង់ខ្ញុំថែមទៀត»។
លោក ឆៃលី បានបន្តថា បន្ទាប់មក លោក ស៊ា បានបញ្ជាឲ្យកូនទាហានធ្វើតេស្ដទឹកនោមរកសារធាតុញៀន ប៉ុន្តែគាត់នោមមិនចេញ។
លោកថា៖ «ខ្ញុំមិនបារម្ភអំពីការធ្វើតេស្ដទឹកនោមរកសារធាតុញៀនអីនោះទេ ព្រោះខ្ញុំមិនដែលប្រើគ្រឿងញៀនឡើយ ប៉ុន្តែពួកគាត់វាយធ្វើទារុណកម្មខ្ញុំហើយថែមទាំងបង្អត់អាហារខ្ញុំទៀត សូម្បីតែទឹកក៏មិនឲ្យផឹកផង រហូតដល់រសៀល ដែលម្ដាយរបស់ខ្ញុំ និងថៅកែស្រីខ្ញុំព្រមទាំងអាជ្ញាធរដែនដីទៅដល់ទើបគេដោះលែងខ្ញុំ»។ កាលពីម្សិលមិញភ្នំពេញប៉ុស្ដិ៍បានទាក់ទងទៅលោកឧត្តមសេនីយ៍ទោ សន ស៊ា ដើម្បីសុំពន្យល់ ប៉ុន្តែលោកប្រាប់ថា ខ្ញុំកំពុងជាប់រវល់ ហើយក៏បិទទូរស័ព្ទ។
ប៉ុន្តែកាលពីថ្ងៃចន្ទ លោក ស៊ា ត្រូវបានសារព័ត៌មានស្លាបប៉ាកកាអព្យាក្រឹតដកស្រង់សម្ដីថា៖ «កូនទាហានខ្ញុំបានទះកំផ្លៀង ១ ដៃ និងខោកក្បាលជនរងគ្រោះនោះមែន ព្រោះគាត់និយាយស្ដី និងប្រើអាកប្បកិរិយាច្រឡើសបើស [ឈ្លើយ] ដាក់មន្ត្រីយើងខ្ញុំខ្លាំងពេក ប៉ុន្តែគ្មានការធ្វើទារុណកម្មដូចការចោទនោះទេ»។
លោក ស្រី ណារ៉េន អ្នកសម្របសម្រួលសមាគមសិទ្ធិមនុស្សអាដហុក ខេត្តឧត្តរមានជ័យ បានប្រាប់ភ្នំពេញប៉ុស្តិ៍កាលពីម្សិលមិញថា លោកបានទទួលពាក្យបណ្ដឹងពីជនរងគ្រោះរួចហើយកាលពីថ្ងៃចន្ទ និងកំពុងរៀបចំចងក្រងឯកសារ និងពាក្យបណ្ដឹងដាក់ទៅតុលាការដើម្បីឲ្យជួយអន្តរាគមន៍រកយុត្តិធម៌ជូនជនរងគ្រោះ។
លោកថ្លែងថា៖ «ក្រោយពីទទួលរងការវាយធ្វើទារុណកម្ម កម្មកររូបនោះបានធ្លាក់ខ្លួនឈឺធ្ងន់ ហើយត្រូវបានបញ្ជូនទៅព្យាបាលនៅមន្ទីរពេទ្យខេត្តសៀមរាប។ ជាលទ្ធផលគ្រូពេទ្យជំនាញថា មុខរបួសនោះបានប៉ះពាល់ធ្ងន់ធ្ងរដល់ស្រោមខួរក្បាលគាត់»។
លោកបានបន្ថែមថា ប៉ុន្មានថ្ងៃនេះ ភាគីជនបង្កបានព្យាយាមស្វែងរកការសម្របសម្រួលផ្ដល់សំណងដល់ជនរងគ្រោះ ដើម្បីរំលត់បណ្ដឹង ប៉ុន្តែមិនទាន់មានការព្រមព្រៀងនៅឡើយទេ ខណៈពេលដែលភាគីជនរងគ្រោះទាមទារសំណងចំនួន ១០ ០០០ ដុល្លារ៕
