The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​ក្រុមហ៊ុន ស៊ីនទ្រី ព្រម​ចូល​ធ្វើការ​វិញ​ហើយ

កម្មករ​ក្រុមហ៊ុន ស៊ីនទ្រី ព្រម​ចូល​ធ្វើការ​វិញ​ហើយ

កម្មករ​ក្រុមហ៊ុន ស៊ីនទ្រី ព្រម​ចូល​ធ្វើការ​វិញ​ហើយ

140206_01
បុគ្គលិកក្រុមហ៊ុនស៊ីនទ្រីម្នាក់នេះ ដើរតម្រង់ទៅឡានដឹកសំរាមរបស់ក្រុមហ៊ុន ដើម្បីចាប់ផ្តើមប្រមូលសំរាមឡើងវិញបន្ទាប់ពីបញ្ឈប់ការតវ៉ា កាលពីម្សិលមិញ

ភ្នំពេញៈ កម្មករ​ប្រមូល​សំរាម​របស់​ក្រុមហ៊ុន ស៊ីនទ្រី ដែល​បាន​ធ្វើ​ការ​តវ៉ា​រយៈ​ពេល ៣ ថ្ងៃ​កន្លង​មក​នេះ​បាន​យល់​ព្រម​ចូល​ធ្វើ​ការ​ជា​ធម្មតា​វិញ​ហើយ កាល​ពី​រសៀល​ថ្ងៃ​ពុធ​ម្សិលមិញ​បើ​ទោះ​បី​ជា​ពួក​គេ មិន​ទាន់​ទទួល​បាន​ការ​ដំឡើង​ប្រាក់​ខែ ទៅ​តាម​អ្វី​ដែល​ពួក​គេ​បាន​ទាមទារ​ក៏​ដោយ។

លោក ប្រាក់ សុខា តំណាង​កម្មករ​ក្រុមហ៊ុន ស៊ីនទ្រី បាន​និយាយ​កាល​ពី​ថ្ងៃ​ម្សិលមិញ​ថា កម្មករ​ព្រម​បញ្ឈប់​ការ​តវ៉ា​ហើយ ដោយ​ពួក​គេ​ទទួល​យក​នូវ​អ្វី​ដែល​ក្រុមហ៊ុន​បាន​ផ្តល់​ឲ្យ​បើ​ទោះ​បី​ជា​ការ​ផ្តល់​ឲ្យ​នោះ​មិន​បាន ១០០ ភាគរយ​ក៏​ដោយ។

លោក ថ្លែង​ថា៖ «អ្វី​ដែល​កម្មករ​ទទួល​បាន​នេះ​ប្រហែល​ជា ៣០ ភាគរយ​នៃ​ការ​ទាមទារ ប៉ុន្តែ​ដោយ​សារ​តែ​សាលា​ក្រុង​នៅ​បន្ត​ធ្វើ​ការ​បើក​ផ្លូវ​សម្រាប់​កម្មករ​ធ្វើ​ការ​ចរចា​ទៀត អ៊ីចឹង​ហើយ ទើប​បាន​ជា​កម្មករ​ផ្អាក​ការ​តវ៉ា​សិន»។

បើ​តាម លោក សុខា កម្មករ​ទទួល​បាន​ការ​ដំឡើង​ប្រាក់​ខែ ចន្លោះ​ពី ២០ ទៅ ២៥ ដុល្លារ​ទៅ​តាម​ផ្នែក និង​ជំនាញ​របស់​ពួក​គេ ហើយ​ប្រាក់​ឈ្នួល​នេះ​នឹង​មាន​ប្រសិទ្ធភាព​ចាប់​តាំង​ពី​ខែ កុម្ភៈ នេះ​ត​ទៅ។

លោក ឃួង ស្រេង អភិបាល​រង​រាជធានី​ភ្នំពេញ ដែល​បាន​ចុះ​ទៅ​ជួយ​អន្តរាគមន៍​នៅ​យានដ្ឋាន​ជួសជុល​រថយន្ត​របស់​ក្រុមហ៊ុន ស៊ីនទ្រី ក្នុង​ខណ្ឌ ដង្កោ កាល​ពី​ម្សិលមិញ​បាន​និយាយ​ថា សាលា​រាជធានី ត្រូវ​ការ​ឡាន​ជា​ចាំបាច់ សម្រាប់​ធ្វើ​ការ​ប្រមូល​គំនរ​សំរាម​ក្នុង​រាជធានី​បើ​ទោះ​បីជា​កម្មករ​មិន​ទាន់​យល់​ព្រម​ចូល​ធ្វើ​ការ​ក៏​ដោយ។

លោក​ថ្លែង​ថា៖ «ខ្ញុំ​ជា​តំណាង​អភិបាល​រាជធានី​ភ្នំពេញ មក​ខ្ចី​ឡាន​ដើម្បី​យក​ទៅ​ប្រមូល​សំរាម ដូច​បង​ប្អូន​ដឹង​ហើយ​ថា សំរាម ១ថ្ងៃ មាន​ប្រមាណ ១៥០០ តោន ក្នុង​រាជធានី។ ដូច​នេះ​ប្រសិន​បើ​យើង​ទុក​សំរាម​ដូច​នេះ​ទៀត ភ្នំពេញ យើង​នឹង​ក្លាយ​ជា​រាជធានី​សំរាម ដែល​បញ្ហា​នេះ សាលា​រាជធានី​មិន​អាច​ទទួល​យក​បាន​ជា​ដាច់​ខាត»។

Content image - Phnom Penh Post

លោក ឃួង ស្រេង បាន​ថ្លែង​ថា សូម​ឲ្យ​កម្មករ​មេត្តា​យោគ​យល់ ពី​បញ្ហា​នេះ ហើយ​ការ​តវ៉ា​របស់​កម្មករ គឺ​សាលា​រាជធានី​មាន​ការ​គាំទ្រ​ឲ្យ​ធ្វើ​ការ​ចរចា​ជាមួយ​ក្រុមហ៊ុន​បន្ត​ទៀត។

លោក​បន្ថែម​ថា៖ «ប៉ុន្តែ​អ្វី​ដែល​សាលា​រាជធានី​ភ្នំពេញ​មិន​អាច​ទទួល​យក​បាន​នោះ គឺ​ការ ទុក​ចោល​សំរាម​កណ្តាល​ទីក្រុង។ ដូច​នេះ​សុំ​ឲ្យ​បង​ប្អូន​ទាំង​អស់​ចូល​រួម​ធ្វើ​ការងារ​នេះ​ឡើង​វិញ»។

លោក ឃួង ស្រេង បាន​ព្យាយាម​ពន្យល់​ទៅ​កាន់​កម្មករ​របស់​ក្រុមហ៊ុន ស៊ីនទ្រី ពី​ផល​ប៉ះពាល់​នៃ​គំនរ​សំរាម​ក្នុង​ទីក្រុង ពី​ផល​ប្រយោជន៍​ដែល​កម្មករ​ទទួល​បាន​ពី​ការ​ទាមទារ​របស់​ពួក​គេ និង​បាន​ធ្វើ​ការ​ចរចា​ជាមួយ​នឹង​តំណាង​កម្មករ និង​ក្រុមហ៊ុន​អស់​ជាច្រើន​ម៉ោង​ទើប​នៅ​ម៉ោង​ប្រមាណ ៣ រសៀល​ថ្ងៃ​ម្សិលមិញ កម្មករ និង​ក្រុមហ៊ុន​បាន​ព្រម​ព្រៀង​គ្នា​និង​សម្រេច​ចូល​ធ្វើ​ការ​វិញ។

លោក ងួន ស៊ីផេង តំណាង​ក្រុមហ៊ុន ស៊ីនទ្រី បាន​ថ្លែង​ថា បន្ទាប់​ពី​កម្មករ បាន​យល់​ព្រម​ទទួល​យក​នូវ​ដំណោះស្រាយ នៃ​ការ​ទាមទារ​របស់​ពួក​គេ​នោះ មាន​ឡាន​ដឹក​សំរាម​ប្រមាណ​ជា​ជិត ៦០ ឡាន បាន​ចេញ​ពី​យានដ្ឋាន ទៅ​ធ្វើ​ការ​តាម​តំបន់​គោលដៅ​មួយ​ចំនួន។

លោក​មាន​ប្រសាសន៍​ថា៖ «យើង​ក៏​សុំទោស​បង​ប្អូន​ប្រជា​ពលរដ្ឋ​ផង​ដែរ ដោយ​សារ​តែ​កម្មករ​មួយ​ចំនួន​មាន​ការ​នឿយ​ហត់ ហើយ​សុំ​សម្រាក​មួយ​រសៀល​ទៀត តែ​ពួក​គេ​នឹង​ចេញ​ធ្វើ​ការ​វិញ​នៅ​ថ្ងៃ​ព្រហស្បតិ៍​នេះ»។

លោក ងួន ស៊ីផេង មិន​ទាន់​ដឹង​ថា តើ​ក្រុមហ៊ុន​នឹង​ត្រូវ​ចំណាយ​ពេល​ប៉ុន្មាន​ថ្ងៃ​ទេ ក្នុង​ការ​ប្រមូល​សំរាម​នេះ ដោយ​សារ​តែ​សំរាម​មាន​ការ​ថែម​ជា​រៀងរាល់​ថ្ងៃ ប៉ុន្តែ​អ្វី​ដែល​ខាង​ក្រុមហ៊ុន​ត្រូវ​ដោះស្រាយ​ឲ្យ​អស់​នោះ គឺ​សំរាម​នៅ​ក្នុង​ខណ្ឌ​ចំនួន ៤ ដូចជា ខណ្ឌ ដូនពេញ ខណ្ឌ ៧ មករា ខណ្ឌ ទួលគោក និង​ខណ្ឌ ចំការមន។

លោក​បាន​បញ្ជាក់​ថា៖ «យើង​ត្រូវ​ប្រមូល​សំរាម​នៅ​ក្នុង​ខណ្ឌ​ទាំង ៤ នេះ​មុន​គេ ដោយ​សារ​វា​ជា​កន្លែង​ប្រជុំជន បណ្តុំ​ទេសចរ និង​កន្លែង​អាជីវកម្ម តែ​ខណ្ឌ​ផ្សេង និង​ជាយ​ក្រុង ក៏​យើង​ធ្វើ​ដែរ តែ​វា​មិន​មែន​ជា​អាទិភាព»។

លោក ងួន ស៊ីផេង បាន​និយាយ​ថា ក្រុមហ៊ុន​បាន​ព្យាយាម​ប្រមូល​សំរាម​ឲ្យ​អស់​ក្នុង​រយៈ​ពេល​ដ៏​ខ្លី ឬ​អាច​ក្នុង​ថ្ងៃ​អាទិត្យ ឬ​ថ្ងៃ​ចន្ទ​ក្រោយ។

សុខ សាន្ត អាយុ ២០ឆ្នាំ ដែល​ជា​កម្មករ​ប្រមូល​សំរាម​បាន​និយាយ​ថា គាត់​សុខ​ចិត្ត​ទទួល​យក​ដំណោះស្រាយ​នេះ​សិន តែ​លោក​នឹង​បន្ត​ធ្វើ​ការ​ទាមទារ​ទៀត​នៅ​ពេល​ក្រោយ៕

អត្ថបទគួរចាប់អារម្មណ៍