The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​ខ្លះ​ធ្វើ​ពហិការ​មិន​ធ្វើ​ការ​ថែម​ម៉ោង​តែ​ខ្លះ​នៅ​តែ​បន្ត​ធ្វើ




កម្មករ​ខ្លះ​ធ្វើ​ពហិការ​មិន​ធ្វើ​ការ​ថែម​ម៉ោង​តែ​ខ្លះ​នៅ​តែ​បន្ត​ធ្វើ

កម្មករ​ខ្លះ​ធ្វើ​ពហិការ​មិន​ធ្វើ​ការ​ថែម​ម៉ោង​តែ​ខ្លះ​នៅ​តែ​បន្ត​ធ្វើ

20140225_06
កម្មកររោងចក្រ SL ធ្វើបាតុកម្មមុខសាលាក្រុងកន្លងមក

ភ្នំពេញៈ កម្មករ​កាត់ដេរ​បាន​ចាប់​ផ្តើម​ធ្វើ​ពហិការ​មិន​ធ្វើ​ការ​បន្ថែម​ម៉ោង​ដូច​ការ​គ្រោង​ទុក​របស់​មន្ត្រី​សហជីព កាល​ពី​ម្សិលមិញ បន្ទាប់​ពី​មាន​ការ​អំពាវនាវ​និង​ចែក​ខិត្តប័ណ្ណ​ពី​សហជីព​មួយ​ចំនួន​មុន​ឈាន​ទៅ​ធ្វើ​មហា​កូដកម្ម​នៅ​ខែ​ក្រោយ​ក្នុង​ការ​ទាមទារ​ឲ្យ​មាន​ការ​ដំឡើង​ប្រាក់​ឈ្នួល​កម្មករ​ក៏​ប៉ុន្តែ ទោះ​យ៉ាង​ណា​ក៏​មាន​កម្មករ​មួយ​ចំនួន មិន​ចូល​រួម​ធ្វើ​ពហិការ​តាម​ការ​អំពាវនាវ​នេះ​ដែរ ដោយ​សារ​តែ​ពួកគេ​ត្រូវ​ការ​ប្រាក់​ផ្គត់​ផ្គង់​ជីវភាព។

លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ បាន​ឲ្យ​ដឹង​ពី​ម្សិលមិញ​ថា នៅ​ម៉ោង ៤ រសៀល​ថ្ងៃ​ចន្ទ​មាន​កម្មករ​រាប់​ពាន់​នាក់​បាន​ចាក​ចេញ​មិន​ព្រម​ធ្វើ​ការ​បន្ថែម​ម៉ោង។

លោក​បន្ថែម​ថា៖ «កម្មករ​ស្ទើរ​គ្រប់​កន្លែង​និង​តាម​ខេត្ត បាន​ចាក​ចេញ​មិន​ធ្វើ​ការ​បន្ថែម​ម៉ោង​ទេ ដូចជា នៅ ភ្នំពេញ ខេត្ត ស្វាយរៀង ខេត្ត តាកែវ ហើយ​និង​កន្លែង​ដទៃៗ​ទៀត»។

លោក​អះអាង​ថា លោក​មិន​ទទួល​បាន​ព័ត៌មាន​ពី​មន្រ្តី​ក្រសួង​ការងារ​ស្តី​ពី​វិធានការ​លើ​ការ​ធ្វើ​ពហិការ​មិន​ធ្វើ​ការ​បន្ថែម​ម៉ោង​របស់​កម្មករ​នេះ​ទេ។ លោក​ថា៖ «យើង​ស្វាគមន៍​គ្រប់​ពេល​នូវ​អន្តរាគមន៍​ពី​ក្រសួង ហើយ​យើង​ចង់​ឲ្យ​ពួកគេ​ធ្វើ​តាម​ការ​ទាមទារ​របស់​កម្មករ​ឲ្យ​បាន​ឆាប់»។​កម្មការិនី សៀន សុផល តំណាង​កម្មករ​នៅ​រោងចក្រ SL បាន​ឲ្យ​ដឹង​កាល​ពី​ម្សិលមិញ​ថា កម្មករ​នៅ​រោងចក្រ​នេះ​ប្តេជ្ញា​ធ្វើ​ពហិការ​មិន​ធ្វើ​ការ​បន្ថែម​ម៉ោង​ចាប់​ពី​ថ្ងៃ​ចន្ទ​ត​ទៅ ហើយ​គាត់​បាន​ចែក​ខិត្តប័ណ្ណ ១ ពាន់​សន្លឹក​ឲ្យ​កម្មករ​រួច​ហើយ​ដើម្បី​ជូន​ដំណឹង​ពី​គោល​បំណង និង​ឲ្យ​ពួកគេ​ចូល​រួម​ធ្វើ​ពហិការ​មិន​ធ្វើ​ការ​បន្ថែម​ម៉ោង។

អ្នក​នាង​ថ្លែង​ថា៖ «យើង​បាន​សម្រេច​ចិត្ត​មិន​ធ្វើ​ការ​បន្ថែម​ម៉ោង​ចាប់​ពី​ថ្ងៃ​ចន្ទ​នេះ រហូត​ដល់​ថ្ងៃ​សុក្រ ដើម្បី​ទាមទារ​ប្រាក់​ឈ្នួល​បន្ថែម ហើយ​ជំរុញ​ឲ្យ​ក្រសួង​ពាក់ព័ន្ធ​ស្វែង​រក​ដំណោះ​ស្រាយ​តាម​ការ​ទាមទារ​របស់​កម្មករ»។ អ្នក​នាង​បន្ត​ថា៖ «យើង​ចង់​ឃើញ​ការ​ទាមទារ​របស់​យើង​ត្រូវ​បាន​ដោះស្រាយ​ក្នុង​ពេល​ឆាប់ៗ​នោះ​ជា​មូល​ហេតុ​ដែល​យើង​ធ្វើ​គ្រប់​យ៉ាង​តាម​ដែល​យើង​អាច​ធ្វើ​បាន​ដើម្បី ផល​ប្រយោជន៍​ពួក​យើង​ជា​កម្មករ»។

ទោះ​ជា​យ៉ាង​ណា កម្មករ​នៅ​រោងចក្រ Siu Quinch Garment នៅ​ខណ្ឌ ដង្កោ រាជធានី ភ្នំពេញ នៅ​តែ​បន្ត​ធ្វើ​ការ​បន្ថែម​ម៉ោង​ដោយ​សារ​តែ​ពួកគេ​ត្រូវ​ការ​ប្រាក់​ដោះស្រាយ​ជីវភាព។

កម្មការិនី ប៊ួយ ស្រីមុំ អាយុ ២៦ឆ្នាំ ធ្វើ​ការ​នៅ​រោងចក្រ Siu Quinch បាន​ប្រាប់​កាល​ពី​ម្សិលមិញ​ថា នាង​បាន​ឮ​អំពី​ការ​ធ្វើ​ពហិការ​មិន​បន្ថែម​ម៉ោង នៅ​រោងចក្រ​ដទៃ​ទៀត ប៉ុន្តែ​នាង​និង​កម្មករ​នៅ​រោងចក្រ​នេះ មិន​ចូល​រួម​នោះ​ទេ។

កញ្ញា​និយាយ​ថា៖ «ខ្ញុំ​មិន​លះបង់​ការងារ​បន្ថែម​ម៉ោង​ទេ ព្រោះ​ខ្ញុំ​អាច​រក​ប្រាក់​បាន​ល្មម​សម​គួរ​ពី​ការងារ​បន្ថែម​ម៉ោង​នេះ។ ខ្ញុំ​អាច​រក​បាន ១ ដុល្លារ​ក្នុង ១ ម៉ោង ហើយ​មួយ​ថ្ងៃ​ខ្ញុំ​ធ្វើ​តែ​ពីរ​ម៉ោង​ទេ»។ ស្រីមុំ បន្ត​ទៀត​ថា «វា​ជា​សិទិ្ធ​របស់​ពួកគេ ក្នុង​ការ​ធ្វើ​ពហិការ​មិន​ធ្វើ​ការ​បន្ថែម ប៉ុន្តែ ខ្ញុំ​ក៏​មាន​សិទិ្ធ​ធ្វើ​ការ​បន្ថែម​ម៉ោង​ដើម្បី​រក​ប្រាក់​បន្ថែម​មក​ផ្គត់​ផ្គង់​ជីវភាព​គ្រួសារ​ខ្ញុំ​ដែរ»។

ស្រីមុំ អះអាង​ថា៖ «យ៉ាង​ហោច ខ្ញុំ​អាច​រក​បាន​ប្រាក់​ថែម​ម៉ោង​ដើម្បី​ទិញ​ម្ហូប​អាហារ​សម្រាប់​គ្រួសារ​ខ្ញុំ​ខ្លះ​ដែរ»។

សហជីព​កម្មករ​កាត់ដេរ​បាន​ទាមទារ​ប្រាំ​ពីរ​ចំណុច ក្នុង​នោះ មាន​ការ​ដំឡើង​ប្រាក់​ឈ្នួល​អប្បបរមា​ប្រចាំ​ខែ​ឲ្យ​បាន ១៦០ ដុល្លារ​អាមេរិក និង​ការ​ដោះលែង​មនុស្ស ២១នាក់ ដែល​ត្រូវ​ចាប់​ខ្លួន​ក្នុង​បាតុកម្ម ពី​ដើម​ខែ​មុន ត្រូវ​បាន​លើក​ទឹក​ចិត្ត​ឲ្យ​ធ្វើ​ពហិការ​ក្នុង​សប្តាហ៍​នេះ។

ប្រសិន​គ្មាន​ភាព​រីក​ចម្រើន​ទេ​នោះ វេទិកា​សាធារណៈ​នឹង​រៀបចំ​ឡើង​នៅ​ថ្ងៃ ទី៨ ខែ មីនា មុន​ពេល​សហជីព​ធ្វើ​កូដកម្ម​ធំ ជា​ថ្មី​ម្តង​ទៀត ចាប់​ពី​ថ្ងៃ ទី១២ ខែ មីនា យ៉ាង​ហោច​ក៏​ទៅ​ដល់​ថ្ងៃ ទី១៩ ខែ មីនា ដែរ។

លោក រ៉ុង ឈុន ប្រធាន​សហភាព​សហជីព​កម្ពុជា ថ្លែង​ពី​ម្សិលមិញ​ថា កម្មករ​ចាប់​អារម្មណ៍​ខ្លាំង​លើ​មហា​កូដកម្ម​នៅ​ថ្ងៃ ទី១២ ខែ មីនា នេះ។

លោក​អះអាង​ថា៖ «ពេល​ខ្ញុំ​ជួប​តំណាង​កម្មករ​កាល​ពី​ម្សិលមិញ ពួក​គេ​ថា កម្មករ​ស្ទើរ​ទាំង​អស់​ពិត​ជា​ចាប់​អារម្មណ៍​លើ​ការ​ធ្វើ​មហា​កូដកម្ម​ជា​ខ្លាំង ហើយ​ពួកគេ​នឹង​ចូល​រួម»។

លោក សុខ ឧត្តម ប្រធាន​រដ្ឋបាល​រោងចក្រ Maurea Garment ក្នុង​ខណ្ឌ ឫស្សីកែវ រាជធានី​ភ្នំពេញ កាល​ពី​ម្សិលមិញ​ថា រោងចក្រ​លោក​គ្មាន​កម្មករ​ទៅ​ផ្ទះ​ពេល​ថែម​ម៉ោង​ទេ។

លោក​បាន​ឲ្យ​ដឹង​ថា៖ «កម្មករ​នៅ​រោងចក្រ​នេះ​ធ្វើ​ការ​ក្នុង​ម៉ោង​បន្ថែម​ជា​ធម្មតា មិន​មាន​អី្វ​ប្រែ​ប្រួល​ឡើយ»។

ឯ លោក ហ៊ីម ផល្លា ប្រធាន​រដ្ឋបាល​ប្រចាំ​រោងចក្រ Huey Chuen ក៏​បាន​ឲ្យ​ដឹង​កាល​ពី​ល្ងាច​មិញ​ដែរ​ថា កម្មករ​នៅ​រោងចក្រ​នេះ ក៏​មិន​រំជើប​រំជួល​ខុស​ប្រក្រតី​ដែរ គឺ​ពួក​គេ​នាំ​គ្នា​បំពេញ​ការងារ​ថែម​ម៉ោង​ដូច​សព្វ​ដង​ធម្មតា។ លោក ផល្លា ប្រាប់​ថា៖ «ខ្ញុំ​គិត​ថា បញ្ហា​នេះ​ជា​បញ្ហា​របស់​ពួក​គេ​ទេ ហើយ​វា​ក៏​មិន​អាច​ធ្វើ​ការ​ទាមទារ​ឲ្យ​បាន​ភ្លាមៗ​នោះ​បាន​ដែរ»។

លោក​បន្ត​ថា រោងចក្រ​របស់​លោក​នឹង​ធ្វើ​ការ​ពិភាក្សា​ជាមួយ​នឹង​សមាគម​រោងចក្រ​កាត់ដេរ ថា តើ​ត្រូវ​ធ្វើ​យ៉ាង​ណា ប្រសិន​បើ​កម្មករ​ផ្អាក​ការងារ​បន្ថែម​ម៉ោង ឬ​ធ្វើការ​តវ៉ា​ដោយសារ​រោងចក្រ លោក​ជា​សមាជិក​មួយ​របស់​សមាគម​រោងចក្រ​កាត់ដេរ​កម្ពុជា។

លោក ប៉ាវ ស៊ីណា បញ្ជាក់​បន្ថែម​បន្ទាប់​ពី​ផុត​ម៉ោង​កម្មករ​ធ្វើ​ការ​ថែម​ម៉ោង​ថា មាន​រោងចក្រ​ប្រមាណ​ជា ២០០ ដែល​ជា​សមាជិក​របស់​សហជីព និង​សហព័ន្ធ​សហជីព​ទាំង ៨ បាន​ចាក​ចេញ​មិន​ធ្វើ​ការ​ថែម​ម៉ោង​ដូច​ការ​គ្រោង​ទុក។ លោក​ថ្លែង​ថា៖ «រោងចក្រ​ជាង ៦០ ដែល​ជា​សហជីព​របស់​ខ្ញុំ​នៅ​ក្នុង​រោងចក្រ​នោះ​បាន​ធ្វើ​ពហិការ​មិន​ធ្វើការ​ថែម​ម៉ោង​ទេ។​ខ្ញុំ​គិត​ថា វា​ដូច​គ្នា​ទៅ​នឹង​តាម​បណ្តា​រោងចក្រ​ផ្សេងៗ​ទៀត​ដែរ»។

លោក ហេង សួរ អ្នក​នាំ​ពាក្យ​ក្រសួង ការងារ មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ កាល​ពី​ម្សិលមិញ។

ចំណែក​លោក សាត សមុទ្រ អនុ​រដ្ឋ​លេខាធិការ​ក្រសួង ការងារ​បាន​បដិសេធ​មិន​ធ្វើ​ការ​អត្ថាធិប្បាយ​ទេ កាល​ពី​ម្សិលមិញ៕ TK

អត្ថបទគួរចាប់អារម្មណ៍