ភ្នំពេញៈ កម្មករ កម្មការិនីជិត២០០នាក់នៅរោងចក្រកាត់ដេរចំនួន៦ ស្ថិតក្នុងសួនឧស្សាហកម្មវឌ្ឍនៈទី ២ ក្នុងសង្កាត់ ក្រាំងពង្រ ខណ្ឌដង្កោ រាជធានីភ្នំពេញ បានសន្លប់បន្តគ្នានិងបានបញ្ជូនទៅសង្គ្រោះនៅមន្ទីរពេទ្យនិងគ្លីនិកចំនួន៣ កាលពីរសៀលថ្ងៃពុធម្សិលមិញ។
កម្មការិនីរោងចក្រកាត់ដេរផាភីលៀន នូ ស្រីពេជ្រ អាយុ២៨ឆ្នាំ ដែលសម្រាក ព្យាបាលក្នុងមន្ទីរពេទ្យមិត្តភាពខ្មែរ-សូវៀតបានឲ្យដឹងថា ពេលនាងកំពុងធ្វើការក្នុងរោងចក្រ ម៉ោងជាង១រសៀលក៏ធុំក្លិនឆួលក្រពុលខ្លាំងចូលមក ប៉ុន្តែ មិនដឹងថាជាក្លិនអ្វីជះមកពីណាទេ រួចហើយក៏មានមិត្តភក្តិនៅជិតនាងដួលសន្លប់បន្តគ្នាតែម្តង។ នាងបន្តថា៖ «ពេលឃើញអ្នករួមការងារដួលសន្លប់ ទាំងខ្ញុំនិងកម្មករជាច្រើនទៀតក៏ជ្រួលឡើងគិតសម្រុកចេញ តែត្រូវខាងរោងចក្រឃាត់ ប៉ុន្តែដោយកម្មករចេះតែដួលបន្តបន្ទាប់គ្នា ខាងរោងចក្រ ក៏ព្រមឲ្យចេញក្រៅ ខ្លះមកដល់ខាងក្រៅក៏ដួលបន្តទៀតដែរ» ។
ស្រីពេជ្រ និយាយថា ៖ «ខ្ញុំធុំក្លិនក្រពុលក៏ណែនទ្រូង ក្អួតចង្អោរ រួចងងឹតមុខដួលតែម្តង តែមិនដឹងថា ជាក្លិនអ្វីឲ្យពិតប្រាកដទេ»។
កម្មការិនី ឡាយ ចន្ថា វ័យ៣១ឆ្នាំ នៃរោងចក្រញូវធិច ដែលមិនរងគ្រោះនឹងគេ ហើយបានជួយនាំអ្នកសន្លប់ចេញពីរោងចក្រផងបានអះអាងថា ក្លិនក្រពុលដែលជះចូលក្នុងរោងចក្រ អាចមកពីខាងក្រៅតាមកង្ហារបឺតខ្យល់ដែលមានបំពាក់នៅតាមជញ្ជាំង។ នៅប្រមាណ១០នាទី ការធុំក្លិនភាយមកនោះក៏ធ្វើឲ្យកម្មករមួយចំនួនដួលសន្លប់បន្តគ្នាតែម្តង។
ចន្ថា និយាយថា៖«ខ្ញុំបានប្រញាប់ជួយសង្គ្រោះនាំពួកគេចេញក្រៅរោងចក្រនៅពេលខ្ញុំឃើញពួកគេដួលសន្លប់ ហើយមានក្អួតចង្អោរ ផង»។
ចន្ថា អះអាងថា នាងមិនដឹងថាការដួលសន្លប់នោះមកពីអ្វីឲ្យប្រាកដទេប៉ុន្តែត្រូវគេប្រាប់ថា មកពីក្លិនប្រេងម៉ាស៊ីនដែលគេច្រាលចេញពីអេស្កាវ៉ាទ័រ ដែលឈូសឆាយដីសាងសង់រោងចក្រក្បែរនោះ»។
លោក ខឹម ចំណាន មន្ត្រីសហជីពសេរីកម្មករកម្ពុជាដែលបានចុះផ្ទាល់ដល់កន្លែងកើតហេតុបានឲ្យដឹងថា យ៉ាងតិចមានកម្មករប្រមាណជា២០០នាក់ បានក្អួតចង្អោរទន់ដៃជើង និងដួលសន្លប់ នៅក្នុង៦រោងចក្រនោះ មានរោងចក្រញូវធិច, ផាភីលៀននិងរោងចក្រកាត់ដេរ មហាហ្គាមេន ទី១ ទី២ និងទី៣ ដែលស្ថិតនៅក្នុងបរិវេណសួនឧស្សាហកម្មវឌ្ឍនៈ។
លោកឲ្យដឹងថា៖ «មិនទាន់ដឹងពីមូលហេតុពិតនៃការពុលនោះទេ ប៉ុន្តែក្រុមកម្មករប្រាប់ថា ពួកគេពុលក្លិនឈួល ខណៈដែលពួកគេកំពុងធ្វើការ»។
គ្រូពេទ្យមន្ទីរពេទ្យមិត្តភាពខ្មែរ-សូវៀតម្នាក់ដែលកំពុងសង្គ្រោះកម្មការិនី៥នាក់បានប្រាប់ថា កម្មករដែលរងគ្រោះទាំង៥នាក់នេះ ពួកគេមានអាការចុកណែនទ្រូង ក្អួតចង្អោរ រហូតខ្លះត្រូវបញ្ជូលខ្យល់អុកស៊ីសែនជាជំនួយដើម្បីសង្គ្រោះ។ លោកបន្តថា៖«ពួកគេដួលសន្លប់មកពីធុំក្លិនឈួលពេលឃើញគ្នាគាត់ដួលសន្លប់ ភ័យក៏ដួលបន្តៗគ្នា ប៉ុន្តែអាការមិនប៉ះពាល់សុខភាពធ្ងន់ធ្ងរទេ»។លោក អ៊ុលលី នាយប៉ុស្តិ៍នគរបាលក្រាំងពង្របានប្រាប់ថា ក្លិនដែលនាំឲ្យកម្មករដួលសន្លប់ប្រមាណជិត២០០នាក់នោះ សមត្ថកិច្ចសង្ស័យថា មកពីក្លិនប្រេងគ្រឿងចក្រកាយដីដែលកំពុងសាងសង់រោងចក្រនៅក្បែរនោះ ហើយគ្រឿងចក្រនោះខូចត្រូវគេច្រាលប្រេងម៉ាស៊ីនចេញ ហើយចំហាយវាបានភាយចូលក្នុងរោងចក្រ។
លោកបន្តថា៖ «រោងចក្រទាំង៦នៅក្នុងសួនឧទ្យានវឌ្ឍនៈ បានរងការពុល ទាំងអស់ ពួកគេបានបញ្ជូនទៅសង្គ្រោះនៅមន្ទីរពេទ្យយោធា ង.៧០ មន្ទីរពេទ្យ រុស្ស៊ី និងទៅគ្លីនិកឯកជនចោមចៅខ្លះ ប៉ុន្តែក៏មានគ្រួសារយកទៅពេទ្យខ្លះដែរ ព្រោះឡានពេទ្យដឹកមិនទាន់»។
ចំពោះរោងចក្រកាត់ដេរដែលមានកម្មករ កម្មការិនីពុលទាំង៦រោងចក្រនោះពីម្សិលមិញមិនអាចស្វែងរកការបំភ្លឺពីថៅកែរោងចក្របានទេ ខណៈដែលទូរស័ព្ទចូលហើយតែគ្មានអ្នកទទួល។ លោក ស មូរ៉ា ប្រធានសហជីពកម្មករចំណីអាហារនិងសេវាកម្មកម្ពុជាបានប្រាប់ថា ករណីបែបនេះបានកើតមានជាញឹកញាប់មកហើយ ដោយសារតែសំណង់រោងចក្រខ្លះសង់ខុសលក្ខណៈបច្ចេកទេស គ្មានខ្យល់ចេញចូល ឯរចនាសម្ព័ន្ធក្នុងរោងចក្រក៏រៀបចំមិនបានល្អ ដែលនេះជាបញ្ហាប្រឈមសម្រាប់កម្មករបច្ចុប្បន្ន។
មន្ត្រីក្រសួងការងារដែលទទួលបន្ទុកត្រួតពិនិត្យការសន្លប់របស់កម្មកររោងចក្រមិនអាចទាក់ទងបានទេ កាលពីម្សិលមិញ៕
