The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​ជួប​វិបត្តិ​ថវិកា​ក្នុង​ការ​ទៅ​បុណ្យ​ភ្ជុំ

កម្មករ​ជួប​វិបត្តិ​ថវិកា​ក្នុង​ការ​ទៅ​បុណ្យ​ភ្ជុំ

កម្មករ​ជួប​វិបត្តិ​ថវិកា​ក្នុង​ការ​ទៅ​បុណ្យ​ភ្ជុំ

Content image - Phnom Penh Post

ភ្នំពេញៈ បន្ទាប់​ពី​ការ​ប្រមូល​ផ្តុំ នៅ​មុខ​រោងចក្រ SL កាល​ពី​ថ្ងៃ​ចន្ទ អ្នក​នាង ជឹម សោមអ៊ីម បាន​លើក​ម្រាម​ដៃ​ឡើង​ចំនួន ៧ ជា​សញ្ញា​បង្ហាញ​អំពី​ចំនួន​ទឹក​ប្រាក់​ដែល​អ្នក​នាង​ទទួល​បាន។

អ្នក​នាង សោម អ៊ីម មក​ពី​ខេត្ត កំពង់ចាម និង​ជា​កម្មការិនី​រោងចក្រ SL ម្នាក់ ដែល​បាន​ធ្វើ​កូដកម្ម​បាន​ថ្លែង​ថា៖ «ប្រាំ​ពីរ​ដុល្លារ មិន​គ្រប់​គ្រាន់ សម្រាប់​ធ្វើ​ដំណើរ​ទៅ​ស្រុក​កំណើត​របស់​ខ្ញុំ​ទេ​»។ អ្នក​នាង​បាន​ស្រែក​ខ្លាំងៗ​ថា៖ «ខ្ញុំ​ខឹង​ខ្លាំង​ណាស់​ចំពោះ​រោងចក្រ»។ ដោយ​ទន្ទឹង​រង់​ចាំ​ការ​ឈប់​សម្រាក​សម្រាប់​បុណ្យ​ភ្ជុំបិណ្ឌ ដែល​ចាប់​ផ្តើម​ពី​ថ្ងៃ​ព្រហស្បតិ៍​ដល់​ថ្ងៃ​ចន្ទ​ប្រជាជន​ក្នុង​រាជធានី​ភ្នំពេញ​បាន​ចំណាយ​រយៈ​ពេល​ពីរ​បី​សប្តាហ៍​ចុង​ក្រោយ​នេះ​ធ្វើ​ផែនការ​ដើរ​លេង​និង​ទិញ​របស់​របរ​សម្រាប់​ពិធី​បុណ្យ ភ្ជុំបិណ្ឌ។

ប៉ុន្តែ ចំពោះ​កម្មករ​ជាច្រើន​នៅ​ក្នុង​ឧស្សាហកម្ម​កាត់​ដេរ ពួកគេ​បាន​ចំណាយ​ពេល​វេលា​ជាច្រើន​ដើម្បី​ស្វែង​រក​វិធី​ទទួល​បាន​ប្រាក់​សម្រាប់​ការ​ធ្វើ​ដំណើរ​ទៅ​លេង​ស្រុក​កំណើត។

លោក មឿន តុលា ប្រធាន​កម្មវិធី​ការងារ​នៅ​មជ្ឈមណ្ឌល​អប់រំ​ច្បាប់​សម្រាប់​សហគមន៍ បាន​ថ្លែង​ថា បញ្ហា​ប្រឈម​របស់​កម្មករ​ជាច្រើន​គឺ​ស្រដៀងៗ​គ្នា។ រោងចក្រ​ភាគ​ច្រើន​បំផុត​បើក​ប្រាក់​ខែ​នៅ​ថ្ងៃ ទី១០ ប៉ុន្តែ ភ្ជុំបិណ្ឌ​ឆ្នាំ​នេះ គឺ​ត្រូវ​ប្រារព្ធ​ធ្វើ​ឡើង​នៅ​មុន​ថ្ងៃ​បើក​ប្រាក់​ខែ​របស់​ពួក​គេ។

លោក មឿន តុលា ថ្លែង​ថា៖ «ជា​ញឹក​ញាប់ យើង​បាន​ឮ​អំពី​រឿង​នោះ»។ «ប្រាក់​ឈ្នួល​របស់​កម្មករ​ក៏​តិច​តួច​ពេក ពួក​គេ​សន្សំ​ប្រាក់​មិន​សល់​...ប៉ុន្តែ​ពួក​គេ​ត្រូវ​ការ​ប្រាក់ សម្រាប់​ធ្វើ​ដំណើរ​និង​សម្រាប់​ទិញ​របស់​របរ​ផ្ញើ​ឪពុក​ម្តាយ និង​កូន​ចៅ​របស់​ខ្លួន»។

លោក​ថ្លែង​បន្ត​ថា រោងចក្រ​ភាគ​ច្រើន​យល់​ព្រម​បើក​ប្រាក់​ឈ្នួល​ដល់​កម្មករ​និយោជិត ឬ​ចំណែក​ខ្លះ​នៃ​ប្រាក់​ឈ្នួល​មុន​ថ្ងៃ​ភ្ជុំបិណ្ឌ។ ប៉ុន្តែ​ចំពោះ​រោងចក្រ​មួយ​ចំនួន អ្នក​គ្រប់​គ្រង​រោងចក្រ​មិន​បំពេញ​តាម​សំណើ​របស់​កម្មករ​សម្រាប់ ការ​បើក​ប្រាក់​ឈ្នួល​មុន​នេះ​ទេ នាំ​ឲ្យ​កម្មករ​ធ្វើ​កូដកម្ម ដើម្បី​ទទួល​បាន​ប្រាក់​សម្រាប់​ភ្ជុំបិណ្ឌ​ឬ​អ្នក​ខ្លះ​ទៀត​សុខ​ចិត្ត​មិន​ទៅ​ស្រុក​កំណើត។

យ៉ាង​ហោច​ណាស់​រោងចក្រ​ចំនួន​ពីរ​បាន​ជាប់​គាំង​ដោយ​សារ​តែ​វិវាទ ទាក់​ទង​នឹង​បញ្ហា​ភ្ជុំបិណ្ឌ​គឺ​រោងចក្រ Sae Han International និង​រោងចក្រ Chin Chin garment ដែល​កម្មករ​បាន​នាំ​គ្នា​ធ្វើ​កូដកម្ម។

កម្មករ​រោងចក្រ Chin Chin ប្រហែល ១៥០ នាក់​បាន​នាំ​គ្នា​បិទ​ផ្លូវ​ជាតិ​លេខ ៤ មួយ​រយៈ​ខ្លី​នៅ​មុខ​រោងចក្រ​របស់​ខ្លួន​ដែល​ស្ថិត​នៅ​ក្នុង​ខណ្ឌ ពោធិ៍​សែន​ជ័យ កាល​ពី​ថ្ងៃ​អង្គារ​សប្តាហ៍​មុន នៅ​ពេល​ដែល​ម្ចាស់​រោងចក្រ​នេះ​បាន​និយាយ​ថា គេ​នឹង​បើក​ប្រាក់​ខែ​ឲ្យ​កម្មករ​ចំនួន​ពាក់​កណ្តាល​មុន​ភ្ជុំបិណ្ឌ ជា​ជាង​បើក​ប្រាក់​ខែ​ទាំង​អស់។ លោក វ៉ា សារ៉ង ចៅសង្កាត់ រង​នៃ​សង្កាត់ ចោមចៅ ក្នុង​ខណ្ឌ ពោធិ៍​សែន​ជ័យ ដែល​រោងចក្រ​នេះ​មាន​ទីតាំង​ស្ថិត​នៅ​ថ្លែង​ថា៖ «កម្មករ​ត្រូវ​ការ​ប្រាក់​ធ្វើ​ដំណើរ​ទៅ​ស្រុក​កំណើត​ដើម្បី​ប្រារព្ធ​ពិធី​បុណ្យ​ភ្ជុំបិណ្ឌ»។

131002_08b
កម្មករនៅរោងចក្រ SL ធ្វើការតវ៉ា កាលពីថ្ងៃសុក្រសប្តាហ៍មុន

បន្ទាប់​ពី​ការ​ចរចា​រយៈ​ពេល​បួន​ម៉ោង​លោក សារ៉ង បាន​ថ្លែង​ថា អ្នក​គ្រប់​គ្រង​រោងចក្រ​សុខ​ចិត្ត​បើក​ប្រាក់​ខែ​ទាំង​អស់​មុន​ភ្ជុំបិណ្ឌ។

កម្មករ​នៅ​រោងចក្រ​ផ្សេងៗ​ទៀត​ក៏​ព្យាយាម​សុំ​រោងចក្រ​បើក​ប្រាក់​ឈ្នួល​មុន​ឲ្យ​បាន​ច្រើន​ដែរ។

អ្នក​នាង ផេង ម៉េងហុង អាយុ ២៣ ឆ្នាំ​បាន​ថ្លែង​ថា សម្រាប់​ការ​ធ្វើ​ដំណើរ​ទៅ​ស្រុក​កំណើត​ទៅ​លេង​បុណ្យ​ភ្ជុំបិណ្ឌ​នេះ អ្នក​នាង​ទំនង​ជា​មិន​មាន​ទិញ​របស់​របរ​ច្រើន​ដូច​សព្វ​ដង​ទេ។ អ្នក​នាង ម៉េងហុង និង​កម្មករ​រួម​ការងារ​ដទៃៗ​ទៀត​បាន​ស្នើ​សុំ​ឲ្យ​អ្នក​គ្រប់​គ្រង​រោងចក្រ Terratex Knitting & Garment Int'l បើក​ប្រាក់​ខែ ៧០ ដុល្លារ​មុន​ភ្ជុំបិណ្ឌ ប៉ុន្តែ​រោងចក្រ​យល់​ព្រម​បើក​តែ ៥០ ដុល្លារ។ អ្នក​នាង ម៉េងហុង បាន​ថ្លែង​កាល​ពី​សប្តាហ៍​មុន​ថា៖ «ចំនួន​ទឹក​ប្រាក់​នេះ​តិច​តួច​ណាស់ ប៉ុន្តែ​ខ្ញុំ​មិន​មាន​ជម្រើស»។

និយោជក​មួយ​ចំនួន​បាន​ឆ្លៀត​កេង​ចំណេញ​ចំពោះ​តម្រូវ​ការ​ប្រាក់​បន្ទាន់​របស់​កម្មករ​ដោយ​យល់​ព្រម​បើក​ប្រាក់​មុន ជា​ថ្នូរ​នឹង​ការ​ផ្លាស់​ប្តូរ​កិច្ច​សន្យា​ការងារ​រយៈ​ពេល​វែង​របស់​ពួក​គេ​ទៅ​ជា​កិច្ច​សន្យា​ការងារ​រយៈ​ពេល​ខ្លី។

កម្មករ​ដទៃ​ខ្លះ​ទៀត​បាន​ខ្ចី​ប្រាក់​ក្នុង​អត្រា​ការ​ប្រាក់​ខ្ពស់​ដែល​អាច​ធ្វើ​ឲ្យ​ពួក​គេ​ស្ថិត​ក្នុង​ស្ថានភាព​លំបាក​បន្ទាប់​ពី​ភ្ជុំបិណ្ឌ​រួច។

ចំពោះ​រោងចក្រ SL វិញ ដែល​កម្មករ​ប្រហែល ៦០០០ នាក់​បាន​ធ្វើ​កូដកម្ម​កកកុញ​ចុះ​ឡើង អស់​រយៈ​ពេល​ជាង​មួយ​ខែ អ្នក​គ្រប់​គ្រង​រោងចក្រ​កាល​ពី​សប្តាហ៍​មុន បាន​ប្រាប់​ថា ខ្លួន​នឹង​បើក​ប្រាក់​ខែ​ដល់​កម្មករ​ដែល​ធ្វើ​កូដកម្ម​ពី​ថ្ងៃ ទី១ និង ២០ កញ្ញា ពាក់​កណ្តាល​មុន​ថ្ងៃ ភ្ជុំបិណ្ឌ ខណៈ​ដែល​អ្នក​នៅ​ធ្វើ​ការ​មិន​ធ្វើ​កូដកម្ម​នឹង​ទទួល​បាន​ប្រាក់​ខែ​ពេញ បូក​រួម​នឹង​ប្រាក់​អត្ថ​ប្រយោជន៍​ផ្សេង ៥០ ភាគរយ។

លោក ឈិន សៅ អ្នក​គ្រប់​គ្រង​រដ្ឋបាល​នៅ​រោងចក្រ SL បាន​ថ្លែង​ថា កម្មករ​ត្រូវ​បាន​បើក​ប្រាក់​ឲ្យ​ចំនួន ១៥ ដុល្លារ។

លោក គង់ អាទិត្យ អនុ​ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា ហៅ​កាត់​ថា ស៊ីខៅឌូ ដែល​តំណាង​ឲ្យ​កម្មករ​ភាគ​ច្រើន​បំផុត​នៅ​រោងចក្រ SL បាន​ថ្លែង​ថា សហជីព​បាន​ទាមទារ​ប្រាក់​ចំនួន ៦០ ដុល្លារ ក្នុង​កម្មករ​ម្នាក់​ពី​មុន​ភ្ជុំបិណ្ឌ ប៉ុន្តែ​លោក​មិន​បាន​ដឹង​ទេ​ថា​តើ​រោងចក្រ​បាន​បើក​ឲ្យ​កម្មករ​ហើយ​ឬ​នៅ?

បើ​តាម​អ្នក​នាង សោមអ៊ីម បាន​ឲ្យ​ដឹង​ថា កម្មករ​ម្នាក់​ឈ្មោះ សឿន វី អាយុ ២៤ ឆ្នាំ និង​កម្មករ​មួយ​ចំនួន​ទៀត​នៅ​រោងចក្រ SL ដែល​ឈរ​នៅ​មុខ​រោងចក្រ​កាល​ពី​ថ្ងៃ​ចន្ទ និង​ដែល​ជា​កម្មករ​ចូល​រួម​ធ្វើ​កូដកម្ម​នា​ពេល​កន្លង​មក​បាន​ទទួល​ប្រាក់​ត្រឹម​តែ ៧ ដុល្លារ​ប៉ុណ្ណោះ។

នៅ​ពេល​សួរ​អំពី​គម្រោង ភ្ជុំបិណ្ឌ លោក សឿន វី បាន​ដាក់​មុខ​ចុះ ហើយ​និយាយ​ថា៖ «ខ្ញុំ​ជំពាក់​ថ្លៃ​ជួល​ផ្ទះ​ពីរ​ខែ​ហើយ និង​បាន​ខ្ចី​ប្រាក់​ពី​ឪពុក​ម្តាយ​រួច​ហើយ​ដែរ​។ ខ្ញុំ​មិន​មាន​ប្រាក់​ទៅ​ស្រុក​ទេ»៕ PS

អត្ថបទគួរចាប់អារម្មណ៍