The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​ដែល​តវ៉ា​ពីរ​ថ្ងៃ​មក​ហើយ​ព្រម​ចូល​ធ្វើ​ការ​វិញ​នៅ​ថ្ងៃ​នេះ




កម្មករ​ដែល​តវ៉ា​ពីរ​ថ្ងៃ​មក​ហើយ​ព្រម​ចូល​ធ្វើ​ការ​វិញ​នៅ​ថ្ងៃ​នេះ

កម្មករ​ដែល​តវ៉ា​ពីរ​ថ្ងៃ​មក​ហើយ​ព្រម​ចូល​ធ្វើ​ការ​វិញ​នៅ​ថ្ងៃ​នេះ

ភ្នំពេញៈ កម្មករ​ជាង​ ១ ពាន់​នាក់​ នៅ​រោងចក្រ​កាត់​ដេរ​ Sixplus Industrial ក្នុង​ស្រុក​មុខ​កំពូល នឹង​ចូល​ធ្វើ​ការ​វិញ​នៅ​ថ្ងៃ​ព្រហស្បតិ៍​នេះ​ បន្ទាប់​ពី​ពួក​គេ បាន​ធ្វើ​ការ​តវ៉ា​ អស់​រយៈ​ពេល​ពីរ​ថ្ងៃ​ ​ដើម្បី​ទាមទារ​ដំឡើង​ប្រាក់​បៀវត្សរ៍​អប្បបរមា និង​លក្ខ​ខណ្ឌ​ការ​ងារ​ប្រសើរ​ជាង​មុន។

លោក រី សិទ្ធីណែត មន្ត្រី​ដោះ​ស្រាយ​វិវាទ​ការងារ នៃ​សហជីព​សេរីកម្មករ ដែល​បាន​ចរចា ជា​មួយ​ក្រុម​មន្ត្រី​ក្រុមហ៊ុន​ រយៈ​ពេល​ប្រហែល ​៥​ ម៉ោង​ ​បាន​ឲ្យ​ដឹង​កាល​ពី​ម្សិលមិញ​ថា បន្ទាប់​ពី​ពិភាក្សា​គ្នា​ ការ​ទាម​ទារ​របស់​កម្មករ​ត្រូវ​បាន​គេ​ទទួល​យក​។ លោក​បាន​ប​ន្ថែម​ថា៖«​ក្រុម​កម្មករ នឹង​ត្រឡប់​ទៅ​ចូល​ធ្វើ​ការ​វិញ​ នៅ​ថ្ងៃ​ព្រហស្បតិ៍​ ព្រោះ​ថៅ​កែ​បាន​ទទួល​យក​ការ​ទាមទារ​របស់​ពួកគេ​ហើយ​»។

ក្រុម​កម្មករ​ បាន​ទាម​ទារ​ ១៩ ​ចំណុច ​ដូច​ជា​ការ​ដំឡើង​ប្រាក់​បៀវត្សរ៍​អប្ប​បរមា​ ប្រាក់​សម្រាប់​អាហារ​ថ្ងៃ​ត្រង់​ ផ្ដល់​អាហារ​ពេល​ព្រឹក ​ដល់​កម្មករ​ទាំង​អស់ មិន​ត្រូវ​កាត់​លុយ នៅពេល​កម្មករ​មក​យឺត​ មិន​ត្រូវ​កាត់​លុយ​នៅ​ថ្ងៃ​ដែល​ពួកគេ​តវ៉ា​ និង​មិន​ត្រូវ​បណ្ដេញ​កម្មករ​ ដោយ​គ្មាន​មូលហេតុ​ជាដើម​។

លោក រី សិទ្ធីណែត បាន​បញ្ជាក់​ថា៖« ថៅកែ​រោង​ចក្រ បាន​យល់​ព្រម​បន្ថែម​ប្រាក់​ ១០ ​ដុល្លារ ពី​លើ​ប្រាក់​បៀវត្សរ៍​អប្បបរមា​របស់​ពួក​គេ​។ ប្រាក់​ ១ ពាន់​រៀល​ សម្រាប់​អាហារ​​ថ្ងៃត្រង់​ ហើយ​ពួក​គេ មិន​កាត់​ប្រាក់របស់​កម្មករ​ណា​ដែល​ចូល​រួម​ តវ៉ា​រយៈ​ពេល​ពីរ​ថ្ងៃ​នោះ​ទេ​»។

ជាមួយ​គ្នា​នេះដែរ លោក រី សិទ្ធីណែត ​និង​សមាជិក សហជីព បាន​រង​របួស​ស្រាល ​នៅ​ក្នុង​ការ​តវ៉ា​រវាង​កម្មករ​ផ្សេង​ទៀត​ ដែល​មក​ពី​សហ​ជីព​ផ្សេង នៅ​ក្នុង​រោងចក្រ​នេះ។ លោក​បាន​លើក​ឡើង​ថា៖ «​ពួក​គេ បាន​ចោទ​ខ្ញុំ​ថា​បាន​យក​លុយពី​ក្រុម​ហ៊ុន​ចំនួន ៥ ​ពាន់​ដុល្លារ​ ហើយ​ខ្ញុំ​គ្រាន់​តែ​ចង់​ដឹង​មុខ​ថា អ្នក​ណា​ ជា​អ្នក​និយាយ​ដូច្នោះ ហើយ​បន្ទាប់​មក​ យើង​បាន​រុញ​គ្នា​ទៅ​វិញទៅមក​ ហើយ​ពួក​គេ​បាន​ជាន់​ជើង​ខ្ញុំ​ និង​មិត្ត​ខ្ញុំ​បណ្ដាល​ឲ្យ​របួស​ស្រាល»។​

មន្ត្រី ​រដ្ឋ​បាល​រោងចក្រ Sixplus Industrial ​ដែល​សុំ​មិន​ប្រាប់​ឈ្មោះ​ បាន​និយាយ​ថា ពួកគេ​ បាន​យល់​ព្រម​ជាមួយ​គ្នា​ ហើយ​បាន​ស្នើ​សុំ​កម្មករ​ឲ្យ​ដោះស្រាយ​បញ្ហា​តាម​ផ្លូវ​ច្បាប់​ ជា​ជាង​ការ​ធ្វើ​បាតុកម្ម។ មន្ត្រី​ដដែល​រូប​នេះ​ បាន​បន្ថែម​ថា៖ «​អ្វី​គ្រប់​យ៉ាង ​បាន​ចប់​សព្វ​គ្រប់​អស់​ហើយ​ ហើយ​យើង ចង់​ឲ្យ​ពួក​គេ​ ដោះស្រាយ​បញ្ហា​តាម​ផ្លូវ​ច្បាប់​ ដោយ​ជូន​ដំណឹង​ប្រាប់​ក្រុម​ហ៊ុន​ ពី​គោល​បំណង​របស់​ពួក​គេ ពីព្រោះ​ក្រុមហ៊ុន​ តែង​តែ​គោរព​ច្បាប់​ការងារ​ជានិច្ច»។

កម្មករ​ បាន​ចាប់​ផ្តើម​ធ្វើ​ការ​តវ៉ា កាល​​ពី​ថ្ងៃ​ចន្ទ​ ហើយ​ទើប​តែ​បាន​ជួប​ចរចា​គ្នា​កាល​​ពីម្សិល​មិញ​ ក៏​មាន​​ការ​ព្រម​ព្រៀង​ស្រុះ​ស្រួល​គ្នា​បញ្ចប់​ការ​តវ៉ា៕ PN

អត្ថបទគួរចាប់អារម្មណ៍