The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​ថា សន្តិសុខ​រោងចក្រ SL គប់​ពួក​គេ​របួស

កម្មករ​ថា សន្តិសុខ​រោងចក្រ SL គប់​ពួក​គេ​របួស

កម្មករ​ថា សន្តិសុខ​រោងចក្រ SL គប់​ពួក​គេ​របួស

131025_09
កម្មកររោងចក្រ SL បានចងតង់អង្គុយតវ៉ាតាមផ្លូវនៅខាងមុខរោងចក្រ កាលពីព្រឹកម្សិលមិញ ផា លីណា

ភ្នំពេញៈ កម្មករ រោងចក្រ SL ប្រមាណ ១០ នាក់​បាន​រង​របួស ដោយ​សារ​តែ​សន្តិសុខ និង​អង្គរក្ស​របស់​ថៅកែ​រោងចក្រ​បាន​គប់​ដុំ​ថ្ម និង​បាញ់​ចម្ពាម​កៅស៊ូ មក​លើ​ពួក​គេ​ខណៈ​ដែល​កម្មករ​ប្រមាណ ៣០០ នាក់ បាន​ធ្វើ​ការ​តវ៉ា​ដោយ​បិទ​កំណាត់​ផ្លូវ​នៅ​ខាង​មុខ​រោងចក្រ កាល​ពី​ព្រឹក​ថ្ងៃ​ព្រហស្បតិ៍​ម្សិលមិញ។

អ្នក​នាង សៀន សុផល តំណាង​កម្មករ​បាន​ឲ្យ​ដឹង​កាល​ពី​ម្សិលមិញ​ថា កម្មករ​ប្រមាណ ៣០០ នាក់ បាន​បិទ​កំណាត់​ផ្លូវ ៣៧១ ខាង​មុខ​រោងចក្រ​ដើម្បី​ទាមទារ​លក្ខខណ្ឌ​មួយ​ចំនួន​ពី​រោងចក្រ ដោយ​សារ​តែ​ការ​តវ៉ា​ជិត ៣ ខែ​មក​ហើយ តែ​នៅ​តែ​គ្មាន​ដំណោះស្រាយ​។ អ្នក​នាង​បាន​ថ្លែង​ថា៖ «សន្តិសុខ និង​អង្គរក្ស​របស់​ក្រុមហ៊ុន បាន​គប់​ដុំ​ថ្ម​កម្ទេច​អំបែង​ដប​ស្រាបៀរ អង្គរ និង​បាញ់​ចម្ពាម​កៅស៊ូ សំដៅ​មក​លើ​កម្មករ​ធ្វើ​ឲ្យ​កម្មករ​រង​របួស​ស្រាល​ប្រមាណ ១០ នាក់។ អ្នក​រង​របួស​ត្រូវ​បាន​ទៅ​ព្យាបាល​នៅ​គ្លីនិក​ឯកជន​និង​អ្នក​ខ្លះ​បាន​ត្រឡប់​ទៅ​ផ្ទះ»។

កម្មករ យិន វណ្ណា អាយុ ២២ ឆ្នាំ​ដែល​រង​របួស​ចំ​ទ្រូង ជើង និង​ក្បាល​បាន​និយាយ​ថា រូប​គេ​និង​កម្មករ​ផ្សេង​ទៀត​កំពុង​នៅ​ខាង​មុខ​រោងចក្រ ស្រាប់​តែ​មាន​កម្ទេច​អំបែង និង​ដុំ​ថ្ម​បាន​ហោះ​ចេញ​ពី​រោងចក្រ។ លោក វណ្ណា បាន​ថ្លែង​ថា៖ «លោក​មិន​ទៅ​ណា​ទេ ទោះ​បី​ជា​លោក​រង​របួស​ក៏​ដោយ គឺ​នៅ​តវ៉ា​រហូត​ទាល់​តែ​បាន​សម្រេច»។

ប៉ុន្តែ លោក លឹម ចាន់ដារ៉ា ជំនួយការ​ប្រធាន​ក្រុមហ៊ុន SL បាន​បដិសេធ​ការ​ចោទ​ប្រកាន់​ពី សំណាក់​ក្រុម​កម្មករ​។ លោក​បាន​ថ្លែង​ថា៖ «អ្វី​ដែល​កម្មករ​បាន​ចោទ​ប្រកាន់​ថា សន្តិសុខ​របស់​រោងចក្រ​យើង​បាន​ប្រើ​ហិង្សា​ទៅ​លើ​ពួក​គេ​នោះ គឺ​មិន​ពិត​ទេ តែ​ពួក​កម្មករ​ទាំង​នោះ​ទៅ​វិញ​ទេ​ដែល​បាន​គប់​ដុំ​ថ្ម និង​អំបែង​ដប​មក​ក្នុង​រោងចក្រ ធ្វើ​ឲ្យ​សន្តិសុខ​របស់​ខ្ញុំ​រង​របួស ២ នាក់​ដែល​ពួក​គាត់​សុទ្ធ​តែ​ជា​ជន​ពិការ​ទៀត​ផង»។ លោក ចាន់ដារ៉ា បាន​អះអាង​ថា កម្មករ​តែង​តែ​បង្ក​បញ្ហា​មក​លើ​រោងចក្រ​ស្ទើរ​តែ​រាល់​ថ្ងៃ។

ដោយសារ​តែ​ការ​តវ៉ា​នៅ​ខាង​មុខ​រោងចក្រ ជិត ៣ ខែ​មក​ហើយ មិន​ទទួល​បាន​ដំណោះស្រាយ​កម្មករ​រោងចក្រ SL រាប់​រយ​នាក់ កាល​ពី​ថ្ងៃ​ចន្ទ បាន​នាំ​គ្នា​មក​តវ៉ា នៅ​ខាង​មុខ​ភូមិគ្រឹះ​លោក​នាយក​រដ្ឋ​មន្ត្រី ហ៊ុន សែន ក្បែរ​វិមាន​ឯករាជ្យ​ដើម្បី​សូម​ឲ្យ​លោក​នាយក​រដ្ឋ​មន្ត្រី ជួយ​ធ្វើ​អន្តរាគមន៍ ប៉ុន្តែ​ក្នុង​ការ​តវ៉ា​នោះ មាន​ការ​ប៉ះ​ទង្គិច​គ្នា​មួយ​ប្រាវ ជាមួយ​កង​កម្លាំង​សមត្ថកិច្ច​ដែល​បាន​ធ្វើ​ឲ្យ​កម្មករ​ប្រមាណ​ជាង ១០ នាក់ រង​របួស​ស្រាល​ផង​ដែរ៕

អត្ថបទគួរចាប់អារម្មណ៍