ភ្នំពេញៈ កម្មករជាង២ពាន់នាក់នៅរោងចក្រកាត់ដេរ Hung Wah I (Cambodia) បានតវ៉ានៅមុខរោងចក្រក្នុងសង្កាត់ចោមចៅ ខណ្ឌពោធិ៍សែនជ័យដើម្បីទាមទារប្រាក់ផ្តាច់កិច្ចសន្យា។
អ្នកស្រី ទូច សារ ប្រធានសហជីពសេរីកម្មករ ប្រចាំនៅរោងចក្រ Hung Wah I បានឲ្យដឹងកាលពីថ្ងៃម្សិលមិញថា ការចរចារវាងសហជីព និងក្រុមហ៊ុន ដែលមានការសម្របសម្រួលដោយក្រសួងសង្គមកិច្ច មិនមានផ្លែផ្កាទេ។
អ្នកស្រី ថ្លែងថា៖«យើង តវ៉ាដើម្បីទាមទារតែមួយចំណុចទេគឺប្រាក់ផ្តាច់កិច្ចសន្យា។ យើងទាមទារ១៥០ដុល្លារក្នុងមួយឆ្នាំប៉ុន្តែក្រុមហ៊ុន ព្រមឲ្យត្រឹមតែ២០ដុល្លារប៉ុណ្ណោះ ក្នុងមួយឆ្នាំ»។
អ្នកស្រី បញ្ជាក់ទៀតថា៖ «កម្មករខ្លះ មានវ័យពី ៥០ ទៅ៦០ឆ្នាំ ហើយពួកគាត់មិនចង់ធ្វើការទៀតទេ ត្រង់នេះហើយបានជាពួកគេទាមទារប្រាក់អតីតភាពនៅពេលដែលពួកគេឈប់»។ អ្នកស្រីឲ្យដឹងទៀតថា កម្មករភាគច្រើន បានធ្វើការបម្រើក្រុមហ៊ុនជាង៥ឆ្នាំ ប៉ុន្តែកម្មករមួយចំនួនមិនត្រូវបានក្រុមហ៊ុនផ្តល់កិច្ចសន្យាទេដោយទុកឲ្យពួកគេ ស្ថិតក្នុងភាពមិនប្រាកដប្រជា។ អ្នកស្រី ទូច សារ បានបន្តថា កម្មករនឹងបន្តតវ៉ារហូតដល់ការទាមទារត្រូវបានគេផ្តល់ឲ្យ។
អ្នកគ្រប់គ្រងរោងចក្រ Hung Wah I មិនអាចទាក់ទងធ្វើអត្ថាធិប្បាយបានទេពីម្សិលមិញ៕ NR
