The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​និង​ថៅកែ​ជា​សះ​គ្នា​បន្ទាប់​ពី​មាន​ការ​វាយ​អ្នក​តវ៉ា

កម្មករ​និង​ថៅកែ​ជា​សះ​គ្នា​បន្ទាប់​ពី​មាន​ការ​វាយ​អ្នក​តវ៉ា

កម្មករ​និង​ថៅកែ​ជា​សះ​គ្នា​បន្ទាប់​ពី​មាន​ការ​វាយ​អ្នក​តវ៉ា

កណ្តាលៈ កម្មករ​ប្រាំ​នាក់​បាន​រង​របួស​ស្រាល​ដោយ​សារ​តែ​ក្រុម​ជន​ទំនើង​បាន​វាយ​ពួក​គេ​នៅ​ពេល​ពួក​គេ​កំពុង​តវ៉ា​នៅ​មុខ​រោងចក្រ Indochine Apparel (Cambodia) Ltd ក្នុង ស្រុក​ខ្សាច់​កណ្តាល កាល​ព្រឹក​ថ្ងៃ​អង្គារ ខណៈ​កូដកម្ម​នេះ​បាន​ធ្វើ​ឡើង​អស់​រយៈ​ពេល​ប្រហែល​មួយ​សប្តាហ៍​ហើយ​ភាគី​ទាំង​ពីរ​បាន​ឈាន​ដល់​ដំណោះ​ស្រាយ​កាល​ពី​ម្សិល​មិញ។

លោក ប៉ៃ បូរ៉ា មន្ត្រី​សហព័ន្ធ​សហជីព​សាមគ្គី​ការងារ​កម្ពុជា (CLSUF) ថ្លែង​ថា កម្មករ​បាន​ធ្វើ​ការ​តវ៉ា​ដើម្បី​ទាមទារ​អត្ថ​ប្រយោជន៍​មួយ​ចំនួន និង​លក្ខខណ្ឌ​ដទៃៗ​ទៀត​តាំង​ពី​សប្តាហ៍​មុន ប៉ុន្តែ​មាន​ក្រុម​ជន​ទំនើង​ប្រហែល ១០ នាក់​មក​វាយ​ទៅ​លើ​កម្មករ។

លោក​បន្ត​ថា៖ «ពួក​គេ​ជិះ​ឡាន និង​មួយ​ចំនួន​ទៀត​ជិះ​ម៉ូតូ​មក​យក​ឧបករណ៍​របស់​កូដករ​ដូច​ជា​អាគុយ និង​ធុង​បាស់​ដែល​កម្មករ​ប្រើ​សម្រាប់​ការ​តវ៉ា​នៅ​មុខ​រោងចក្រ។ នៅ​ពេល​កម្មករ​ព្យាយាម​យក​របស់​ទាំង​នោះ​មក​វិញ ក្រុម​ទំនើង​បាន​វាយ​ធ្វើ​ឲ្យ​របួស ៥​នាក់»។

លោក បូរ៉ា បាន​ថ្លែង​ថា កម្មករ​ប្រហែល ១៧០០ នាក់​បាន​តវ៉ា​ទាមទារ​ប្រាក់​អាហារ​ថ្ងៃ​ត្រង់ ២៦ ដុល្លារ​ក្នុង​មួយ​ខែ ប្រាក់​ថ្លៃ​បាយ​ថែម​ម៉ោង ៤០០០ រៀល​សម្រាប់​អ្នក​ធ្វើ​ការងារ​ថែម​ម៉ោង ២ ម៉ោង​និង​សុំ​ឲ្យ​ឈប់​រើស​អើង​សហជីព។ «យើង​មិន​ដឹង​ថា តើ​ក្រុម​ទំនើង​នោះ​ជួល​ដោយ​ក្រុមហ៊ុន​ឬ​មក​ពី​កន្លែង​ណា​ទេ​ដោយ​សារ​យើង​មិន​បាន​ចាប់​ពួក​គេ»។

កម្មការិនី​ម្នាក់​ឈ្មោះ ហួត គឹមអៀង អាយុ ៣៨​ឆ្នាំ ដែល​រង​របួស​ធ្ងន់​ត្រង់​ជង្គង់​ថ្លែង​ថា៖ «ពួក​គេ​ចង់​វៃ​មុខ​ខ្ញុំ ប៉ុន្តែ​ខ្ញុំ​បាន​គេច បន្ទាប់​មក​ពួក​គេ​ព្យាយាម​យក​អាគុយ​ពី​ខ្ញុំ។ ខ្ញុំ​បាន​យក​វា​ត្រឡប់​មក​វិញ ដូច្នេះ​ពួក​គេ​បាន​ទម្លាក់​អាគុយ​មក​លើ​ជង្គង់​របស់​ខ្ញុំ​ធ្វើ​ឲ្យ​ខ្ញុំ​របួស»។ គឹមអៀង មិន​ទាន់​ប្រាកដ​ថា តើ​នាង​នឹង​ដាក់​ពាក្យ​បណ្តឹង​ឬ​អត់​នោះ​ទេ។ «ខ្ញុំ​មិន​ដឹង​ថា តើ​ជន​ទំនើង​ទាំង​នោះ​មក​ពី​ណា​ទេ។ ពួក​គេ​បាន​រត់​ចេញ​នៅ​ពេល​កម្មករ​ដទៃៗ​ទៀត​និង​ក្រុម​មន្រ្តី​សហជីព​មក​ជួយ»។

លោក សុខា អ្នក​គ្រប់​គ្រង​ផ្នែក​រដ្ឋបាល​នៅ​រោងចក្រ Indochine Apparel (Cambodia) Ltd បាន​ថ្លែង​ថា កម្មករ​បាន​ត្រឡប់​ចូល​ធ្វើ​ការ​វិញ​ហើយ​កាល​ល្ងាច​ម្សិល​មិញ​បន្ទាប់​ពី​ក្រុម​ហ៊ុន​ទទួល​យក​ចំណុច​មួយ​ចំនួន​ក្នុង​ចំណោម​ចំណុច​ទាម​ទារ​របស់​ពួក​គេ។

សុខា បន្ត​ថា៖ «កម្មករ​ត្រឡប់​ចូល​ធ្វើ​ការ​វិញ​ហើយ ហើយ​ចំពោះ​អំពើ​ហិង្សា​នៅ​មុខ​រោងចក្រ​កាល​ម្សិល​មិញ ខ្ញុំ​មិន​ដឹង​ទេ។ វា​មិន​ពាក់​ព័ន្ធ​នឹង​រោងចក្រ​ទេ»។ «ជន​ទំនើង​ទាំង​នោះ​មិន​មែន​ជា​មនុស្ស​របស់​រោងចក្រ​ទេ។ យើង​មិន​មាន​លុយ​ជួល​ពួក​គេ​មក​វាយ​កម្មករ​ទេ ហើយ​ក្រុម​ហ៊ុន​របស់​យើង​តែង​តែ​គោរព​ច្បាប់​ការងារ»។

លោក ប៉ៃ បូរ៉ា បាន​ថ្លែង​ថា ក្រុម​ហ៊ុន​បាន​យល់​ព្រម​ផ្តល់​ប្រាក់​អាហារ​ថ្ងៃ​ត្រង់ ១១,៥ ដុល្លារ​ក្នុង​មួយ​ខែ និង​ប្រាក់​ថ្លៃ​បាយ​ថែម​ម៉ោង ២៥០០ រៀល​សម្រាប់​អ្នក​ធ្វើ​ការងារ​ថែម​ម៉ោង ២ ម៉ោង​និង​លក្ខខណ្ឌ​ដទៃៗ៕

អត្ថបទគួរចាប់អារម្មណ៍