The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​ពីរ​រោងចក្រ​ផ្ទុះ​ការ​តវ៉ា​រឿង​លក្ខខណ្ឌ​ការងារ

កម្មករ​ពីរ​រោងចក្រ​ផ្ទុះ​ការ​តវ៉ា​រឿង​លក្ខខណ្ឌ​ការងារ

កម្មករ​រោងចក្រ​បាន​នាំ​គ្នា​ធ្វើ​ការ​តវ៉ា​លក្ខខណ្ឌ​ការងារ​កាល​ពី​ម្សិល​មិញ។
កម្មករ​រោងចក្រ​បាន​នាំ​គ្នា​ធ្វើ​ការ​តវ៉ា​លក្ខខណ្ឌ​ការងារ​កាល​ពី​ម្សិល​មិញ។ រូបថត សហការី

កម្មករ​ពីរ​រោងចក្រ​ផ្ទុះ​ការ​តវ៉ា​រឿង​លក្ខខណ្ឌ​ការងារ

ភ្នំពេញៈ កម្មករ​ប្រមាណ​ជាង ២០០០ នាក់​នៅ​រោងចក្រ​ចំនួន​ពីរ​ក្នុង ទីក្រុង​ភ្នំពេញ និង ខេត្ត​កណ្តាល បាន​ធ្វើ​ការ​តវ៉ា​ទាម​ទារ​ប្រាក់​អត្ថ​ប្រយោជន៍ និង​លក្ខខណ្ឌ​ការងារ​កាល​ពី​ថ្ងៃ​ចន្ទ​ម្សិល​មិញ​នេះ ប៉ុន្តែ​រោងចក្រ​មួយ​ត្រូវ​បាន​សម្រប​សម្រួល​សម្រេច​បាន​លទ្ធផល ហើយ​កម្មករ​ក៏​ត្រឡប់​ចូល​ធ្វើ​ការ​វិញ​ដែរ នៅ​ថ្ងៃ​ដដែល​នោះ។

លោក រី សិទ្ធីណែត មន្រ្តី​សហជីព​សេរី​កម្មករ​ដែល​បាន​ចុះ​ធ្វើ​អន្តរាគមន៍​នៅ​រោងចក្រ​យូអេសឌី (USD) ក្នុង ខណ្ឌ​ឫស្សីកែវ បាន​និយាយ​កាល​ពី​ថ្ងៃ​ម្សិល​មិញ​ថា កម្មករ​ទាមទារ​ឲ្យ​ខាង​រោងចក្រ​ទទួល​យក​ថ្នាក់​ដឹក​នាំ​សហជីព​សេរី​កម្មករ​ចំនួន ៣ នាក់​ប្រចាំ​រោងចក្រ យូអេសឌី ចូល​ធ្វើ​ការ​វិញ បន្ទាប់​ពី​ពួក​គាត់​ត្រូវ​បាន​ក្រុម​ហ៊ុន​បញ្ឈប់​កាល​ពី​សប្តាហ៍​មុន និង​ទាម​ទារ​នូវ​ប្រាក់​អត្ថ​ប្រយោជន៍​ផ្សេងៗ​មួយ​ចំនួន​ទៀត។

លោក​បាន​ថ្លែង​ថា៖ «កម្មករ​បាន​យល់​ព្រម​ចូល​ធ្វើ​ការ​វិញ​ហើយ បន្ទាប់​ពី​ខាង​រោងចក្រ​ព្រម​ទទួល​យក​ថ្នាក់​ដឹក​នាំ​សហជីព​ចូល​ធ្វើ​ការ​វិញ​និង​ព្រម​កាត់​ថ្ងៃ​តវ៉ា​ទុក​កាត់​ថ្ងៃ​ឈប់​សម្រាក​ប្រចាំ​ឆ្នាំ​វិញ ចំណែក​ចំណុច​ទាម​ទារ​ផ្សេង​ទៀត ភាគី​ទាំង​ពីរ​ព្រម​ព្រៀង​យក​ទៅ​ធ្វើ​ការ​ផ្សះ​ផ្សា​នៅ​ក្រសួង​ការងារ»។

ចំណុច​ដែល​កម្មករ​នៅ យូអេសឌី ទាមទារ​មាន​ប្រាក់​ថ្លៃ​បាយ ៤០០០ រៀល ប្រាក់​បាយ​ចំនួន ២០០០ រៀល​ក្នុង ១ ម៉ោង​ចំពោះ​កម្មករ​ស្ម័គ្រ​ចិត្ត​ថែម​ម៉ោង ធ្វើ​ការ​ថែម​ម៉ោង​តាម​គោល​ការណ៍​ស្ម័គ្រ​ចិត្ត​សុំ​ប្រាក់​បន្ថែម​ចំនួន ២៨ ដុល្លារ​ពី​លើ​ប្រាក់​ឈ្នួល​ចាស់​និង​ចំណុច​មួយ​ចំនួន​ទៀត។

ជាមួយ​គ្នា​នេះ​ដែរ មាន​កម្មករ​ប្រមាណ​ជា ១៦០០ នាក់​នៅ​រោងចក្រ នូវខប (Now Corp) ក្នុង ស្រុក​អង្គស្នួល ខេត្ត​កណ្តាល បាន​នាំ​គ្នា​តវ៉ា​នៅ​ខាង​មុខ​រោងចក្រ​កាល​ពី​ព្រឹក​ម្សិល​មិញ​នេះ​ដែរ ដោយ​ទាម​ទារ​អត្ថ​ប្រយោជន៍​ជាង ១០ ចំណុច ប៉ុន្តែ​ការ​ចរចា​មិន​ត្រូវ​បាន​ក្រុម​ហ៊ុន​ទទួល​យក​ទាំង​អស់​នោះ​ទេ ដែល​កម្មករ​ត្រូវ​ធ្វើ​ការ​តវ៉ា​បន្ត​ទៀត​នៅ​ថ្ងៃ​អង្គារ​នេះ។

លោក សៀង សម្បតិ្ត ប្រធាន​សហព័ន្ធ​សហជីព​មិត្តភាព​កម្មករ​បាន​និយាយ​ប្រាប់​កាសែត ភ្នំពេញ ប៉ុស្តិ៍ កាល​ពី​ថ្ងៃ​ម្សិល​មិញ​ថា មក​ដល់​ពេល​នេះ (ម្សិល​មិល) មាន​ការ​ដោះ​ស្រាយ​បាន​ប្រហែល​ជា ៨០ ភាគ​រយ​ហើយ ដោយ​ក្រុម​ហ៊ុន​បាន​ទទួល​យក​ជា​ច្រើន​ចំណុច​តាម​ការ​ទាម​ទារ​របស់​កម្មករ។

លោក​បាន​ថ្លែង​ឲ្យ​ដឹង​ទៀត​ថា៖ «នៅ​ប្រហែល​ជា ៤ ទៅ ៥ ចំណុច​ទៀត​ដែល​ខាង​រោងចក្រ​មិន​ទាន់​យល់​ព្រម​ដែល​ធ្វើ​ឲ្យ​កម្មករ​មិន​អាច​វិល​ត្រឡប់​ទៅ​កាន់​កន្លែង​ការងារ​របស់​ពួក​គេ​វិញ​បាន និង​សម្រេច​បន្ត​ធ្វើ​ការ​តវ៉ា​តទៅ​ទៀត»។

លោក សៀង សម្បត្តិ បាន​បន្ត​ទៀត​ថា លោក​ក៏​មាន​ការ​ព្រួយ​បារម្ភ​ពី​ការ​បង្រ្កាប​ពី​ខាង​ក្រុម​ហ៊ុន​ផង​ដែរ។ ដោយ​សារ​តែ​លោក​បាន​ទទួល​ព័ត៌មាន​ថា រោងចក្រ​នេះ​មាន​ខ្នង​ជា​អ្នក​មាន​អំណាច​នៅ​ពី​ខាង​ក្រោយ ដូច​នេះ​ការ​ធ្វើ​អ្វី​មួយ​មក​លើ​កម្មករ​វា​មិន​ពិបាក​ទេ ប៉ុន្តែ លោក​នឹង​ព្យាយាម​មិន​ឲ្យ​មាន​ហិង្សា​ណា​មួយ​កើត​មាន​បាន​នោះ​ទេ។

ចំណែក​ឯ​បុគ្គលិក​រោងចក្រ នូវខប ដែល​បាន​លើក​ទូរស័ព្ទ​បាន​ឆ្លើយ​តប​ថា អ្នក​នាង​មិន​បាន​ដឹង​អ្វី​ទេ ហើយ​ក៏​បាន​ធ្វើ​ការ​បដិសេធ​មិន​ផ្តល់​លេខ​ទាក់​ទង​ណា​មួយ​ខាង​ផ្នែក​រដ្ឋបាល​រោងចក្រ​ផង​ដែរ៕

អត្ថបទគួរចាប់អារម្មណ៍