The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​រាប់​ម៉ឺន​នាក់​ចូល​រួម​យុទ្ធនាការ​ទាម​ទារ​ប្រាក់​ខែ $១៧៧

កម្មករ​រាប់​ម៉ឺន​នាក់​ចូល​រួម​យុទ្ធនាការ​ទាម​ទារ​ប្រាក់​ខែ $១៧៧

កម្មករ-កម្មការិនី ជាច្រើន​នាក់ ចូល​រួម​ក្នុង​យុទ្ធនាការ​ទាមទារ​ប្រាក់​ខែ ១៧៧ ដុល្លារ​កាល​ពី​ថ្ងៃ​ម្សិល​មិញ។
កម្មករ-កម្មការិនី ជាច្រើន​នាក់ ចូល​រួម​ក្នុង​យុទ្ធនាការ​ទាមទារ​ប្រាក់​ខែ ១៧៧ ដុល្លារ​កាល​ពី​ថ្ងៃ​ម្សិល​មិញ។ ហុង មិនា

កម្មករ​រាប់​ម៉ឺន​នាក់​ចូល​រួម​យុទ្ធនាការ​ទាម​ទារ​ប្រាក់​ខែ $១៧៧

ភ្នំពេញៈ ខណៈ​ដែល​កម្មករ​រាប់​ម៉ឺន​នាក់ បាន​ចូល​រួម​យុទ្ធនាការ​ទាមទារ​ដំឡើង​ប្រាក់​ឈ្នួល ១៧៧ ដុល្លារ រដ្ឋ​មន្ត្រី​ក្រសួង​ការងារ លោក អ៊ិត សំហេង បាន​គូស​បញ្ជាក់​ថា ការ​ដំឡើង​ប្រាក់​ខែ​អាច​ធ្វើ​ទៅ​បាន តែ​ក្នុង​ករណី​ដែល​គ្រប់​ភាគី​ទាំង​អស់​ធ្វើ​ការ​រួម​គ្នា ហើយ​កំណត់​នូវ​ចំណុច​រួម​មួយ​ប៉ុណ្ណោះ ជាមួយ​នឹង​ការ​ព្រមាន​ថា ការ​ដំឡើង​ប្រាក់​ខែ​ខ្ពស់​ពេក អាច​នឹង​ធ្វើ​ឲ្យ​មាន​ហានិភ័យ​ទាំង​ថៅកែ និង​កម្មករ។

យុទ្ធនាការ​ទាមទារ​ដំឡើង​ប្រាក់​ឈ្នួល​អប្បបរមា ១៧៧ ដុល្លារ​ដែល​ដឹក​នាំ​ដោយ​សហជីព​ធំៗ​ចំនួន ១៨ នៅ​ទូទាំង​រាជធានី ខេត្ត ត្រូវ​បាន​ធ្វើ​ឡើង​កាល​ពី​ម្សិល​មិញ ដោយ​មាន​ការ​ចូល​រួម​យ៉ាង​ច្រើន​កុះករ​ពី​កម្មករ។ នេះ​បើ​តាម​មេ​ដឹក​នាំ​សហជីព។ ដូច​ការ​គ្រោង​ទុក នៅ​ម៉ោង​ជិត ១២ ថ្ងៃ​ត្រង់ ស្រប​ពេល​ដែល​កម្មករ​សម្រាក​ពី​ការងារ​នៅ​តាម​បណ្តា​រោងចក្រ​នីមួយៗ ថ្នាក់​ដឹក​នាំ​សហជីព និង​កម្មករ​រាប់​ពាន់​នាក់​បាន​ចាប់​ផ្តើម​យុទ្ធនាការ​របស់​ខ្លួន ដោយ​មាន​ការ​ប្រមូល​ផ្តុំ លើក​បដា​ស្រែក​ទាមទារ និង​ពាក់​អាវ​ពណ៌​ទឹក​ក្រូច​ដែល​សរសេរ​អក្សរ​ថា «យើង​ត្រូវ​ការ​ប្រាក់​ឈ្នួល ១៧៧ ដុល្លារ» ភ្ជាប់​ជាមួយ​នឹង​រូប​សញ្ញា​ក្រុម​ហ៊ុន​បញ្ជា​ទិញ​ធំៗ ដូច​ជា H&M, PUMA, GAP និង ADIDAS ជា​សារ​ទៅ​កាន់​ថៅកែ​រោងចក្រ និង​អ្នក​បញ្ជា​ទិញ ក៏​ដូច​ជា រដ្ឋាភិបាល​ពី​គោល​បំណង​នៃ​យុទ្ធនាការ​នេះ។

លោក អាត់ ធន់ ប្រធាន​សហភាព​ការងារ​កម្ពុជា បាន​ថ្លែង​នៅ​ក្នុង​បរិវេណ​សួន​ឧស្សាហកម្ម កាណាឌីយ៉ា ដែល​ជា​ទី​តាំង​មាន​ការ​ប៉ះ​ទង្គិច​គ្នា​ដ៏​បង្ហូរ​ឈាម​រវាង​កម្មករ និង​អាជ្ញាធរ ក្នុង​គ្រា​ដែល​កម្មករ​បាន​ធ្វើ​បាតុកម្ម​ទាមទារ​ដំឡើង​ប្រាក់​ឈ្នួល ១៦០ ដុល្លារ នៅ​ដើម​ឆ្នាំ​នេះ​ថា យុទ្ធនាការ​នេះ​គឺជា​ការ​ទាមទារ​ដោយ​សន្តិវិធី និង​ជា​ការ​ផ្ញើ​សារ​ទៅ​កាន់​ក្រុម​អ្នក​បញ្ជា​ទិញ ពី​តម្រូវ​ការ​របស់​កម្មករ​ដើម្បី​ជីវភាព​រស់​នៅ​សមរម្យ។

លោក​ឲ្យ​ដឹង​ថា យុទ្ធនាការ​នេះ មាន​ការ​ប្រមូល​ផ្តុំ​ប្រមាណ ២០០ កន្លែង​ដោយ​មាន​ការ​ចូល​រួម​ពី​កម្មករ​រាប់​ម៉ឺន​នាក់ និង​បាន​ដំណើរ​ការ​យ៉ាង​រលូន។ លោក អាត់ ធន់ ជឿ​ជាក់​ថា អ្នក​បញ្ជា​ទិញ​អាច​ដាក់​សម្ពាធ​លើ​រដ្ឋាភិបាល និង​ថៅកែ​រោងចក្រ​ឲ្យ​ដំឡើង​ប្រាក់​ឈ្នួល​ដល់​កម្មករ​បាន​តាម​រយៈ​ការ​បញ្ជា​ទិញ​របស់​ពួក​គេ។

លោក អាត់ ធន់ បញ្ជាក់​ថា៖ «យើង​រំពឹង​ថា អ្នក​បញ្ជា​ទិញ នឹង​ចេញ​មុខ​គាំទ្រ»។

ចំណែក លោក ប៉ាវ ស៊ីណា ប្រធាន​សហជីព​ចលនា​កម្មករ ដែល​បាន​រៀបចំ​យុទ្ធនាការ​ប្រមូល​ផ្តុំ​កម្មករ​ជិត ២ ពាន់​នាក់​នៅ​ម្តុំ សង្កាត់​ចោមចៅ ខណ្ឌ​ពោធិ៍​សែន​ជ័យ បាន​ឲ្យ​ដឹង​ថា ការ​ប្រមូល​ផ្តុំ​នេះ មិន​មាន​ការ​ប៉ះ​ទង្គិច​ណា​មួយ​កើត​ឡើង​ឡើយ បើ​ទោះ​បី​ជា​មាន​ការ​ដាក់​សមត្ថកិច្ច​មួយ​ចំនួន​ចាំ​ឃ្លាំ​មើល​ក្តី។

បើ​តាម លោក អាត់ ធន់ យុទ្ធនាការ​នេះ គឺជា​ជំហាន ទី១ ក្នុង​ការ​ទាម​ទារ ខណៈ​ដែល​កិច្ច​ប្រជុំ​ស្ដី​ពី​ប្រាក់​ឈ្នួល​នឹង​ត្រូវ​បន្ត​ធ្វើ​ឡើង​នៅ​ដើម ខែ​តុលា ការ​ខាង​មុខ។ លោក​បន្ត​ថា ជំហាន ទី២ គឺ​សហជីព នឹង​ដាក់​ញត្តិ​ទៅ​កាន់​ស្ថានទូត​ប្រទេស​មហា​អំណាច​ដើម្បី​សុំ​ឲ្យ​ពួក​គេ​ជួយ​ជំរុញ​ទៅ​រដ្ឋាភិបាល​កម្ពុជា និង​ថៅកែ​រោងចក្រ​ឲ្យ​ដំឡើង​ប្រាក់​ឈ្នួល​សមរម្យ​ដល់​កម្មករ។

កម្មករ​ក្នុង​យុទ្ធនាការ​ទាមទារ​ដំឡើង​ប្រាក់​ខែ​នៅ​សួន​ឧស្សាហកម្ម​កាណាឌីយ៉ា​ពី​ម្សិល​មិញ។
កម្មករ​ក្នុង​យុទ្ធនាការ​ទាមទារ​ដំឡើង​ប្រាក់​ខែ​នៅ​សួន​ឧស្សាហកម្ម​កាណាឌីយ៉ា​ពី​ម្សិល​មិញ។ ហុង មិនា

ជាមួយ​គ្នា​នេះ លោក អ៊ិត សំហេង រដ្ឋ​មន្រ្តី​ក្រសួង​ការងារ បាន​ថ្លែង​នៅ​ក្នុង​សិក្ខា​សាលា​ពិគ្រោះ​យោបល់​ត្រីភាគី​ថ្នាក់​ជាតិ​ស្តីពី «លក្ខណៈ​វិនិច្ឆ័យ ផ្នែក​សង្គម និង​សេដ្ឋកិច្ច សម្រាប់​ដំណើរការ​កំណត់​ប្រាក់​ឈ្នួល​អប្បបរមា​នៅ​កម្ពុជា» ដែល​មាន​ការ​ចូល​រួម​ពី​សំណាក់​សហជីព តំណាង​និយោជក មន្រ្តី​ក្រសួង និង​អង្គការ​ស្ថាប័ន​ពាក់​ព័ន្ធ​ជាច្រើន​ទៀត​កាល​ពី​ម្សិល​មិញ​ដែរ​ថា គ្រប់​ភាគី​ទាំង​អស់ នឹង​បន្ត​ធ្វើ​ការ​រួម​គ្នា​ដើម្បី​សម្រេច​នូវ​គោលដៅ​រួម និង​ត្រូវ​ចៀស​វាង​នូវ​ការ​ទាម​ទារ​ណា​មួយ ដែល​គ្មាន​មូលដ្ឋាន​ធ្វើ​ឲ្យ​ភាគី​នីមួយៗ​មិន​អាច​ទទួល​យក​បាន។

លោក​មាន​ប្រសាសន៍​ថា៖ «ក្រោយ​ពី​ព្រឹត្តិការណ៍​ចុង ឆ្នាំ​២០១៣ និង​ដើម ឆ្នាំ​២០១៤ មក​ក្រសួង និង​រាជ​រដ្ឋាភិបាល​បាន​ខិត​ខំ​រិះរក​គ្រប់​មធ្យោបាយ​ដើម្បី​កែ​សម្រួល​នូវ​នីតិវិធី ហើយ​នឹង​រៀបចំ​សកម្មភាព​នានា​ដើម្បី​ធ្វើ​ឲ្យ​មាន​កិច្ច​សហការ​គ្នា​កាន់​តែ​ល្អ​ប្រសើរ​ឡើង»។

លោក សំហេង បាន​ឲ្យ​ដឹង​ថា ចាប់​ពី​ឆ្នាំ​នេះ​ទៅ ប្រទេស​កម្ពុជា មាន​យន្តការ​កំណត់​ការ​ដំឡើង​ប្រាក់​ឈ្នួល​ជូន​កម្មករ​ជា​រៀង​រាល់​ឆ្នាំ។ ដូច​នេះ អ្នក​ដែល​ទៅ​ធ្វើ​បាតុកម្ម គឺ​គ្រាន់​តែ​ជា​លេស​មួយ​ប៉ុណ្ណោះ ពីព្រោះ បញ្ហា​ទាំង​ឡាយ​គួរ​តែ​យក​ដាក់​លើ​តុ​ដើម្បី​ធ្វើ​ការ​ដោះ​ស្រាយ​រួម​គ្នា។

លោក​រដ្ឋ​មន្ត្រី បាន​គូស​បញ្ជាក់​ទៀត​ថា៖ «ទាំង​សហជីព និង​និយោជក កំពុង​តែ​មាន​យុទ្ធនាការ​ទាំង​សង​ខាង ដោយ​ខាង​និយោជក​បាន​បង្ហាញ​ពី​ការ​ធ្លាក់​ចុះ ពី​ការ​បញ្ជា​ទិញ នៅ​ពេល​ដែល​មាន​ការ​ជជែក​ពី​ប្រាក់​ឈ្នួល។ ខ្ញុំ​មិន​បន្ទោស​ចំពោះ​សហជីព​ក្នុង​ប្រទេស​ដែល​ធ្វើ​យុទ្ធនាការ​នេះ​ទេ ដោយ​សារ​នេះ​ជា​យុទ្ធនាការ​អន្តរជាតិ។ នេះ​ជា​រឿង​ធម្មតា​ទេ»។

ជាមួយ​គ្នា​នេះ លោក អ៊ិត សំហេង ក៏​បាន​ព្រមាន​ដែរ​ថា៖ «ការ​ដំឡើង​ប្រាក់​ឈ្នួល​ខ្ពស់​ពេក​ធ្វើ​ឲ្យ​មាន​ហានិភ័យ ដែល​ធ្វើ​ឲ្យ​អ្នក​វិនិយោគ គ្មាន​លទ្ធភាព​ផ្តល់​ជូន រោងចក្រ​បិទ និង​កម្មករ​បាត់​បង់​ការងារ»។ ប៉ុន្តែ​យ៉ាង​ណា​ក៏​ដោយ លោក​បញ្ជាក់​ថា ប្រសិន​បើ​ការ​ដំឡើង​ប្រាក់​ឈ្នួល​ទាប​ពេក ក៏​បណ្តាល​ឲ្យ​មាន​ហានិភ័យ​ដែរ​គឺ​កម្មករ មិន​អាច​ទទួល​យក​បាន មិន​អាច​រស់​នៅ​បាន​សមរម្យ ហើយ​ផលិតកម្ម​មិន​អាច​ដំណើរ​ការ​ទៅ​បាន​ដែរ។ «ដូច​នេះ ប្រាក់​ឈ្នួល​ត្រូវ​តែ​សម​ស្រប»។

កម្មការិនី ណុប សាវ៉េត អាយុ ៣៣​ឆ្នាំ ដែល​បាន​ចូល​រួម​យុទ្ធនាការ​កាល​ពី​ម្សិល​មិញ​បាន​ឲ្យ​ដឹង​ថា ប្រាក់​ឈ្នួល​ដែល​នាង​ទទួល​បាន ១០០ ដុល្លារ​សព្វ​ថ្ងៃ មិន​អាច​ផ្គត់​ផ្គង់​ជីវភាព​ប្រចាំ​ថ្ងៃ​បាន​ឡើយ បើ​ទោះ​បី​ជា​ចាយ​សំចៃ​យ៉ាង​ណា​ក្តី។

សាវ៉េត គាំទ្រ​ទាំង​ស្រុង ចំពោះ​យុទ្ធនាការ​នេះ ដោយ​និយាយ​ថា៖ «ខ្ញុំ​តែង​ចូល​រួម​រាល់​ការ​ទាមទារ​ដំឡើង​ប្រាក់​ឈ្នួល​នេះ តាំង​ពី​ឆ្នាំ​មុន​មក​ម៉្លេះ ខ្ញុំ​ខ្លាច​ការ​ប៉ះ​ទង្គិច​គ្នា តែ​ខ្ញុំ​គ្មាន​វិធី​អ្វី​ផ្សេង​នោះ​ទេ ក្រៅ​ពី​ការ​ចូល​រួម​តវ៉ា​នេះ»៕

អត្ថបទគួរចាប់អារម្មណ៍