The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​រោងចក្រ​ជូហ៊ួយ មួយ​ចំនួន​លះបង់​ការ​តវ៉ា​ស្វែង​រក​ការងារ​ថ្មី

កម្មករ​រោងចក្រ​ជូហ៊ួយ មួយ​ចំនួន​លះបង់​ការ​តវ៉ា​ស្វែង​រក​ការងារ​ថ្មី

កូដកម្ម​កម្មករ​រោងចក្រ​ជូហ៊ួយ នៅ​ខេត្ត​កំពង់ចាម ដែល​ក្រោយ​មក​ក្លាយ​ជា​ហិង្សា។
កូដកម្ម​កម្មករ​រោងចក្រ​ជូហ៊ួយ នៅ​ខេត្ត​កំពង់ចាម ដែល​ក្រោយ​មក​ក្លាយ​ជា​ហិង្សា។ រូបថត RFA

កម្មករ​រោងចក្រ​ជូហ៊ួយ មួយ​ចំនួន​លះបង់​ការ​តវ៉ា​ស្វែង​រក​ការងារ​ថ្មី

កំពង់ចាមៈ មន្រ្តី​សហជីព​បាន​និយាយ​ថា មាន​កម្មករ​ប្រមាណ​ពី ៧០០ ទៅ ៨០០ នាក់​ក្នុង​ចំណោម​កម្មករ ២០០០ នាក់​ដែល​ធ្វើ​ការ​នៅ​រោងចក្រ​ផលិត​ស្បែក​ជើង ជូហ៊ួយ ក្នុង ស្រុក​ជើង​ព្រៃ ខេត្ត​កំពង់ចាម ដែល​ត្រូវ​បាន​រោងចក្រ​បញ្ឈប់​ពី​ការងារ​បាន​សម្រេច​ចិត្ត​ស្វែង​រក​ការងារ​ធ្វើ​នៅ​រោងចក្រ​ផ្សេង​ហើយ ដោយ​មិន​បន្ត​ធ្វើ​ការ​តវ៉ា​ទៀត​ទេ។

លោក ប៊ុត ប៊ុនឈាន មន្រ្តី​ច្បាប់​នៃ​សហជីព​ស៊ីខៅឌូ បាន​និយាយ​កាល​ពី​ថ្ងៃ​ម្សិល​មិញ​ថា បន្ទាប់​ពី​អ្នក​ជាប់​ឃុំ​ត្រូវ​បាន​តុលាការ​ធ្វើ​ការ​ដោះ​លែង ខាង​សហជីព​បាន​បន្ត​ធ្វើ​ការ​ដោះ​ស្រាយ ហើយ​បាន​ដាក់​សំណើ​របស់​កម្មករ​ទៅ​កាន់​ទីផ្សារ​អន្តរជាតិ​ដើម្បី​អន្តរាគមន៍​ដោះ​ស្រាយ​ឲ្យ​ពួក​គាត់​បាន​ចូល​ធ្វើ​ការ​វិញ ដោយ​ភ្ជាប់​ជាមួយ​នឹង​លក្ខខណ្ឌ​មួយ​ចំនួន​ដែល​ពួក​គាត់​បាន​ធ្វើ​ការ​ទាមទារ​ផង​ដែរ ប៉ុន្តែ រហូត​មក​ទល់​ពេល​នេះ​មិន​ទាន់​មាន​ការ​ឆ្លើយ​តប​ណា​មួយ​ជា​ផ្លូវ​ការ​នៅ​ឡើយ​ទេ។

លោក ប៊ុនឈាន បាន​ថ្លែង​បន្ត​ថា៖ «ក្រុម​កម្មករ​ភាគ​ច្រើន​ដែល​ត្រូវ​បាន​រោងចក្រ​បញ្ឈប់ ពី​ការងារ​បាន​បង្ខំ​ចិត្ត​ទៅ​ធ្វើ​ការ​នៅ​កន្លែង​ផ្សេង ដោយ​សារ​គាត់​បាត់​បង់​ទំនុក​ចិត្ត ក៏​ដូច​ជា​អ្វី​ដែល​គាត់​ទន្ទឹង​រង់​ចាំ​ត្រូវ​បាន​អូស​បន្លាយ​យូរ ធ្វើ​ឲ្យ​គាត់​មិន​អាច​ចំណាយ​ពេល​រង់​ចាំ​បន្ត​ទៀត​បាន ទើប​សម្រេច​ចិត្ត​ឈប់​តវ៉ា និង​ងាក​ទៅ​រក​ការងារ​ផ្សេង​វិញ»។

លោក​បន្ត​ឲ្យ​ដឹង​ទៀត​ថា ក្រុម​កម្មករ​ដែល​មិន​អាច​បន្ត​ការ​ទន្ទឹង​រង់​ចាំ​ទៀត​បាន​នោះ បាន​ទៅ​បើក​លុយ​ពី​រោងចក្រ​ដែល​ទទួល​បាន​ប្រមាណ​ជា ១០ ទៅ ២០ ដុល្លារ​ដើម្បី​បន្ត​ស្វែង​រក​ការងារ​នៅ​ខាង​ក្រៅ​ទៅ​តាម​អ្វី​ដែល​គាត់​ចង់​បាន។ ចំណែក​ខាង​សហជីព​ក៏​នៅ​តែ​បន្ត​ធ្វើ​ការ​ជជែក​ជាមួយ​ក្រុម​ហ៊ុន ដោយ​សារ​តែ​ក្រុម​ហ៊ុន​នៅ​តែ​និយាយ​ថា ខ្លួន​ធ្វើ​តាម​ដីកា​របស់​តុលាការ​ដែល​ចោទ​ថា កម្មករ​បាន​បោះ​បង់​ការងារ​ដោយ​ខ្លួន​ឯង។

លោក ប៊ុត ប៊ុនឈាន បាន​បញ្ជាក់​ទៀត​ថា នៅ​មាន​កម្មករ​មួយ​ចំនួន​ទៀត ប្រមាណ​ជា ៣០០ នាក់​នៅ​តែ​បន្ត​រង់​ចាំ​ការ​ដោះ​ស្រាយ​ពី​សហជីព​លោក​នៅ​ឡើយ ប៉ុន្តែ​ពួក​គេ​មិន​បាន​ធ្វើ​ការ​តវ៉ា​នៅ​ខាង​មុខ​រោងចក្រ​បន្ត​ទៀត​ទេ។

លោក​បាន​និយាយ​ដែរ​ថា៖ «ខ្ញុំ​ពិត​ជា​សោក​ស្តាយ​ខ្លាំង​ណាស់​នូវ​អ្វី​ដែល​បាន​កើត​មាន​ឡើង​ចំពោះ​កម្មករ​ទាំង​នោះ ដោយ​សារ​តែ​ការ​តវ៉ា​ដើម្បី​សិទ្ធិ​សេរីភាព និង​អត្ថ​ប្រយោជន៍​មួយ​ចំនួន​សោះ តែ​ត្រូវ​បាន​គេ​ធ្វើ​បាប និង​បញ្ឈប់​ការងារ​ពួក​គេ​ទៀត​ផង។ ពួក​គាត់​មិន​មែន​ជា​ជន​ល្មើស​នោះ​ទេ គ្រាន់​តែ​ជា​កម្មករ​ប៉ុណ្ណោះ តែ​ក៏​នៅ​ត្រូវ​បាន​ទទួល​រង​នូវ​ភាព​អយុត្តិធម៌​ដែរ»។

កញ្ញា ស៊ត គន្ធា អតីត​កម្មករ​នៅ​រោងចក្រ​ផលិត​ស្បែក​ជើង​ជូហ៊ួយ បាន​និយាយ​ថា នាង​បាន​សម្រេច​ចិត្ត​ឈប់​ធ្វើ​ការ​តវ៉ា​ទៀត​ហើយ ហើយ​ទៅ​ធ្វើ​ការ​នៅ​រោងចក្រ​ផ្សេង​វិញ ដោយ​សារ​តែ​នាង​ត្រូវ​ការ​ថវិកា​ដើម្បី​ផ្គត់​ផ្គង់​ក្រុម​គ្រួសារ។

ចំណែក​លោក ផេង ហុង អាយុ ៣៥​ឆ្នាំ ដែល​ត្រូវ​បាន​រោងចក្រ​បញ្ឈប់​ដែរ​នោះ​ក៏​កំពុង​តែ​ស្វែង​រក​ការងារ​តាម​រោងចក្រ​ផ្សេងៗ​ដែរ ប៉ុន្តែ​ហាក់​មាន​ការ​ពិបាក​ក្នុង​ការ​ទទួល​បាន​ការងារ​ថ្មី​នេះ​ណាស់។

លោក​និយាយ​ថា៖ «រោងចក្រ​ភាគ​ច្រើន​មិន​ត្រូវ​ការ​កម្មករ​ជា​បុរស​ទេ ដោយ​សារ​តែ​ប្រុសៗ​តែង​តែ​នាំ​គ្នា​ធ្វើ​កូដកម្ម ដែល​នេះ​ជា​អ្វី​ដែល​ពិបាក​រក​ការងារ​សម្រាប់​ប្រុសៗ ប៉ុន្តែ​ខ្ញុំ​នៅ​តែ​ស្វះ​ស្វែង​រក​ជា​បន្ត​ទៀត»។

អ្នក​នាង ខាន់ កុលាប ដែល​ជា​តំណាង​កម្មករ ហើយ​ត្រូវ​បាន​គេច​ខ្លួន​ជាច្រើន​ថ្ងៃ​បន្ទាប់​ពី​មាន​ការ​ផ្ទុះ​ហិង្សា​រវាង​កម្មករ​អ្នក​តវ៉ា និង​សមត្ថកិច្ច ស្រុក​ជើង​ព្រៃ ដែល​ធ្វើ​ឲ្យ​មាន​កម្មករ​យ៉ាង​ហោច​ណាស់ ៣០ នាក់​និង​នគរបាល ៩ នាក់​រង​របួស​បាន​និយាយ​កាល​ពី​ម្សិល​មិញ​ថា អ្នក​នាង​បាន​វិល​ត្រឡប់​មក​កាន់​គេហដ្ឋាន​វិញ​ហើយ បន្ទាប់​ពី​បាន​គេច​ទៅ​លាក់​ខ្លួន​អស់​ជាច្រើន​សប្តាហ៍។

អ្នក​នាង​បាន​និយាយ​ទៀត​ថា៖ «ខ្ញុំ​មិន​ហ៊ាន​ទៅ​កាន់​រោងចក្រ​ទេ ដោយ​សារ​ខ្លាច​មាន​អ្វី​មួយ​កើត​ឡើង​ចំពោះ​រូប​ខ្ញុំ តែ​សមត្ថកិច្ច​មិន​បាន​មក​សួរ​នាំ​ខ្ញុំ​ទេ តាំង​តែ​ពី​ខ្ញុំ​វិល​ត្រឡប់​មក​ផ្ទះ​វិញ»។

កម្មការិនី ខាន់ កុលាប អះអាង​ថា បច្ចុប្បន្ន​នាង​ក៏​កំពុង​តែ​ស្វែង​រក​ការងារ​ថ្មី​ធ្វើ​ផង​ដែរ ប៉ុន្តែ អ្នក​នាង​ប្រហែល​ជា​មិន​វិល​ទៅ​រក​ការងារ​ធ្វើ​ជា​កម្មករ​រោងចក្រ​ជា​ថ្មី​ទៀត​នោះ​ទេ គឺ​ប្រហែល​ជា​ងាក​មក​រក​ស៊ី​ម៉ៅការ​គ្រាប់​ស្វាយ​ចន្ទី​តាម​ចម្ការ​អ្នក​ភូមិ​វិញ។

មន្រ្តី​រោងចក្រ​ជូហ៊ួយ មិន​អាច​សុំ​ការ​អធិប្បាយ​បាន​ទេ កាល​ពី​ម្សិល​មិញ​នេះ ដោយ​សារ​តែ​ទូរស័ព្ទ​មិន​អាច​ទាក់​ទង​បាន៕

អត្ថបទគួរចាប់អារម្មណ៍