The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​រោងចក្រ​តេយ៉ុង​ប៉ះ​ទង្គិច​គ្នា​របួស​៥​នាក់

កម្មករ​រោងចក្រ​តេយ៉ុង​ប៉ះ​ទង្គិច​គ្នា​របួស​៥​នាក់

កម្មករ​រោងចក្រ​តេយ៉ុង​ប៉ះ​ទង្គិច​គ្នា​របួស​៥​នាក់

កណ្តាលៈ យ៉ាង​ហោច​មាន​កម្មករ​ប្រមាណ​ជា ៥ នាក់​រង​របួស ដែល​ម្នាក់​មាន​ផ្ទៃ​ពោះ​ផង នៅ​ក្នុង​ការ​ប៉ះ​ទង្គិច​គ្នា​រវាង​កម្មករ​តវ៉ា​និង​កម្មករ​ចូល​ធ្វើ​ការ នៅ​រោងចក្រ តេយ៉ុង នៅ​ក្នុង ស្រុក​អង្គស្នួល ខេត្ត​កណ្តាល កាល​ពី​ថ្ងៃ​ពុធ​កន្លង​មក។

លោក សៀង រិទ្ធី ប្រធាន​សហព័ន្ធ​សហជីព​សាមគ្គីភាព​ការងារ​កម្ពុជា បាន​ប្រាប់​ថា កម្មករ​ប្រមាណ ៥០០ បាន​តវ៉ា​ជា​ច្រើន​ថ្ងៃ​មក​ហើយ​ទាមទារ​ឲ្យ​រោងចក្រ​ទទួល​យក​តំណាង​សហជីព​ចំនួន ៦ នាក់​ចូល​ធ្វើ​ការ​វិញ ឲ្យ​បញ្ឈប់​មន្រ្តី​ក្រុម​ហ៊ុន​ពីរ​នាក់ ឈប់​បង្ខំ​កម្មករ​ឲ្យ​ធ្វើ​ការ​ថែម​ម៉ោង និង​ទាម​ទារ​លក្ខខណ្ឌ​មួយ​ចំនួន​ទៀត។

លោក សៀង រិទ្ធី បន្ត​ថា៖ «ការ​តវ៉ា​មាន​ការ​ប្រទូស្តរាយ​គ្នា​រហូត​ឈាន​ដល់​មាន​អ្នក​របួស ប៉ុន្តែ មិន​ធ្ងន់​ធ្ងរ​ទេ។ ក្រុម​ហ៊ុន​បាន​ជួល​ជើង​កាង​មក​ពី​ខាង​ក្រៅ​មក​បង្ក​បញ្ហា​ជាមួយ​នឹង​កម្មករ​ដែល​កំពុង​តវ៉ា បន្ទាប់​មក​ពួក​គេ​បាន​រត់​ចូល​ទៅ​ក្នុង​រោងចក្រ​វិញ»។

លោក​ឲ្យ​ដឹង​ទៀត​ថា កម្មករ​នៅ​តែ​បន្ត​តវ៉ា​រហូត​មាន​ដំណោះ​ស្រាយ ដោយ​សារ​កម្មករ​បារម្ភ​ពី​ការ​រំលោភ​សិទ្ធិ និង​ការ​គាប​សង្កត់​ពី​រោងចក្រ​ពេល​ពួក​គេ​ចូល​ធ្វើ​ការ​វិញ​ដោយ​សារ​តែ​គ្មាន​តំណាង​នៅ​ធ្វើ​ការ​ជាមួយ។

លោក ឡោ សុភ័ក្រ អនុ​ប្រធាន​សហជីព​នេះ​ដែល​ដឹក​នាំ​កម្មករ​ទៅ​តវ៉ា​ឲ្យ​ក្រសួង​ការងារ​អន្តរាគមន៍ កាល​ពី​ម្សិល​មិញ​បាន​ឲ្យ​ដឹង​ថា លទ្ធផល​ជា​ផ្លែ​ផ្កា​មិន​ទាន់​ទទួល​បាន​ទេ ប៉ុន្តែ​ខាង​មន្រ្តី​ផ្នែក​ដោះ​ស្រាយ​បាតុកម្ម កូដកម្ម​ថា នឹង​រាយការណ៍​ទៅ​រដ្ឋ​មន្រ្តី​ឲ្យ​ជួយ​អន្តរាគមន៍។

លោក ម៉ៅ ផល្លា ទីប្រឹក្សា​ប្រធាន​រដ្ឋបាល​រោងចក្រ តេយ៉ុង ដែល​កម្មករ​ទាម​ទារ​ឲ្យ​ក្រុម​ហ៊ុន​បញ្ឈប់​បាន​និយាយ​ថា ការ​ទាមទារ​របស់​សហជីព​មួយ​នេះ ខាង​រោងចក្រ​មិន​អាច​ទទួល​យក​បាន​ទេ។

លោក​និយាយ​ថា៖ «យើង​បាន​សម្រេច​បញ្ឈប់​ពួក​គេ​ពី​ការងារ​មក​ពី​ពួក​គេ​មិន​គោរព​គោល​ការណ៍​ក្រុម​ហ៊ុន មិន​មក​ធ្វើ​ការ និង​បង្ក​ហិង្សា​ធ្វើ​ឲ្យ​ខូច​ខាត​ទ្រព្យ​សម្បត្តិ​របស់​រោងចក្រ​ទៀត​ផង»។

លោក ម៉ៅ ផល្លា បន្ត​ថា មុន​នឹង​ក្រុម​ហ៊ុន​ធ្វើ​ការ​បញ្ឈប់​ពួក​គេ​ពី​ការងារ លោក​បាន​ណែនាំ​ពួក​គេ​ជាច្រើន​លើក​ច្រើន​សា​ឲ្យ​ពួក​គេ​មក​ធ្វើ​ការ និង​គោរព​ថ្នាក់​ដឹក​នាំ​ក្រុម​ហ៊ុន ប៉ុន្តែ​ពួក​គេ​មិន​ព្រម​ស្តាប់​ទេ ហើយ​ថែម​ទាំង​បង្ក​បញ្ហា​ដល់​ក្រុម​ហ៊ុន​រហូត។

លោក ម៉ៅ ផល្លា បាន​បញ្ជាក់​ថា៖ «មិន​មែន​មាន​តែ​សហជីព​មួយ​ឬ​ពីរ​ទេ តែ​មាន​សហជីព​រហូត​ដល់​ទៅ ១១ សហជីព ប៉ុន្តែ សហជីព​មួយ​ចំនួន​បាន​ស្តាប់​តាម​ការ​ណែនាំ​របស់​ក្រុម​ហ៊ុន ប៉ុន្តែ​មាន​សហជីព​ខ្លះ​មិន​ធ្វើ​តាម​ការ​ណែ​នាំ​ទេ។ ប្រសិន​បើ​តុលាការ​បង្គាប់​ឲ្យ​ពួក​គេ​ចូល​ធ្វើ​ការ​វិញ នោះ​យើង​នឹង​ធ្វើ​តាម ប៉ុន្តែ តុលាការ​បាន​ចោទ​ប្រកាន់​ពួក​គេ​រួច​ទៅ ហើយ ដូច​នេះ​ការ​ទទួល​យក​វិញ មិន​អាច​ទៅ​រួច​ទេ»។

លោក ម៉ៅ ផល្លា បន្ថែម​ថា ក្រុម​ហ៊ុន​មិន​ហាម​ឃាត់​ការ​តវ៉ា​របស់​កម្មករ​ទេ ប៉ុន្តែ​សុំ​ឲ្យ​ពួក​គេ​ត្រូវ​គោរព​ច្បាប់ និង​មិន​ត្រូវ​ប្រើ​ហិង្សា​ដល់​កម្មករ​ដែល​ព្រម​ចូល​ធ្វើ​ការ​ឡើយ៕

អត្ថបទគួរចាប់អារម្មណ៍