The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​រោងចក្រ​ផាញហ្គ្រេត​រំពឹង​បាន​សំណង​មុន​ថ្ងៃ​បោះឆ្នោត

កម្មករ​រោងចក្រ​ផាញហ្គ្រេត​រំពឹង​បាន​សំណង​មុន​ថ្ងៃ​បោះឆ្នោត

កម្មករ​រោងចក្រ​ផាញហ្គ្រេត​រំពឹង​បាន​សំណង​មុន​ថ្ងៃ​បោះឆ្នោត

ភ្នំពេញៈ កម្មករ​និង​បុគ្គលិក​ប្រមាណ​៧៥០​នាក់​នៃ​រោងចក្រ​កាត់ដេរ​ផាញ ហ្គ្រេត នៅ​ក្នុង​ខណ្ឌ​មាន​ជ័យ រាជធានី​ភ្នំពេញ ដែល​ថៅកែ​គេច​ខ្លួន​ពី​កម្ពុជា​អស់​ពេល​បី​ខែ​កន្លង​មក​រំពឹង​ទទួល​បាន​ប្រាក់​សំណង​ពី​ក្រសួង​សង្គមកិច្ច​នៅ​មុន​ថ្ងៃ​បោះឆ្នោត​ជាតិ​នេះ។

តំណាង​កម្មករ​អ្នក​នាង កែវ សុខុម ពី​ម្សិលមិញ​បាន​ឲ្យ​ដឹង​ថា មន្ត្រី​ក្រសួង​សង្គមកិច្ច​បាន​ចុះ​ទៅ​ជួប​កម្មករ​នៅ​រោងចក្រ​នេះ​និង​ស្នើ​ឲ្យ​ពួកគេ​ផ្ដិត​មេដៃ​នៅ​លើ​ឯកសារ​បញ្ជាក់​ពី​ចំនួន​ប្រាក់​ខ្លួន។

សុខុម​បន្ត​ថា៖«កម្មករ​តម្រូវ​ឲ្យ​ផ្ដិត​មេដៃ​នៅ​លើ​ឯកសារ​ដែល មន្ត្រី​ក្រសួង​បាន​គណនា​អំពី​ចំនួន​ប្រាក់​កម្មករ​ម្នាក់ ហើយ​យើង​នឹង​ទទួល​ប្រាក់​ខែ​នៅ​មុន​ពេល​ថ្ងៃ​បោះឆ្នោត​ជាតិ»។

ថៅកែ​រោងចក្រ​នេះ​បាន​រត់​គេច​ខ្លួន​កាល​ពី​ខែ​មេសា​ដោយ​មិន​បាន​បើក​ប្រាក់​ខែ​ឲ្យ​កម្មករ​ឡើយ​ហើយ​ពួកគេ​មិន​ទាន់​ទទួល​បាន​អ្វី ឡើយ​រហូត​មក​ដល់​ពេល​នេះ។

កែវ សុខុម អះអាង​ថា កាល​ពី​ដើម​ខែ​ឧសភា​កម្មករ​ជាង​៧០០​នាក់ និង​បុគ្គលិក​ត្រូវ​បាន​សន្យា​ថា​នឹង​បើក​ប្រាក់​ខែ​ឲ្យ តែ​នៅ​ពេល​ពួកគេ​នាំ​គ្នា​ទៅ​ដល់​រោងចក្រ​នេះ​ទើប​ដឹង​ថា​សម្ភារ​ត្រូវ​គេ​រុះរើ ហើយ​ថៅកែ​បាន​រត់​បាត់។

កម្មការិនី សំ សុភ័ណ អាយុ​៣៨​ឆ្នាំ​ឲ្យ​ដឹង​ដែរ​ថា៖«យើង​នឹង​ទទួល​បាន​ប្រាក់​ខែ​ឆាប់ៗ​នេះ​» ហើយ​ថា នាង​បាន​ធ្វើ​ការ​ពីរ​ឆ្នាំ​ហើយ​នាង​នឹង​ទទួល​បាន​ប្រាក់​ចន្លោះ​ពី​៦០០​ដុល្លារ​ទៅ​៧០០​ដុល្លារ​ក្នុង​ការ​បើក​លើក​នេះ។

លោក ទូច សុមុត មន្ត្រី​គណៈកម្មាធិការ​ដោះស្រាយ​វិវាទ​តាម​រោងចក្រ​របស់ ក្រសួង​សង្គមកិច្ច​បាន​ឲ្យ​ដឹង​ថា បញ្ហា​រោងចក្រ ផាញ ហ្គ្រេត ខាង​គណៈកម្មាធិការ​កំពុង​ប្រឹង​ប្រែង តែ​មិន​ទាន់​សន្យា​១០០​ភាគរយ​ថា បើក​ឲ្យ​មុន​បោះឆ្នោត​ទេ ប៉ុន្តែ​យើង​នឹង​ប្រឹង​ប្រែង​ឲ្យ​អស់​ពី​លទ្ធភាព៕ PN

អត្ថបទគួរចាប់អារម្មណ៍