The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​រោងចក្រ​យ៉ុងវ៉ា​បន្ត​ធ្វើ​កូដកម្ម




កម្មករ​រោងចក្រ​យ៉ុងវ៉ា​បន្ត​ធ្វើ​កូដកម្ម

កម្មករ​រោងចក្រ​យ៉ុងវ៉ា​បន្ត​ធ្វើ​កូដកម្ម

130218_08
កូដកម្មបិទផ្លូវជាតិ២១ របស់ក្រុមកម្មករនៅរោងចក្រយ៉ុងវ៉ា ១ និង ២ កាលពីសប្តាហ៍មុន ផា លីណា

កណ្តាលៈ កម្មករ​នៅ​រោងចក្រ យ៉ុងវ៉ា១ និង២ ក្នុង​ក្រុង​តាខ្មៅ ខេត្ត​កណ្តាល​ដែល​បាន​បិទ​ទ្វារ​នោះ​នឹង​បន្ត​ធ្វើ​កូដកម្ម​នៅ​ថ្ងៃ​នេះ បើ​ទោះ​ជា​រដ្ឋាភិបាល​យល់​ព្រម​បង់​ប្រាក់​ខែ​មករា​ឲ្យ​ពួក​គេ​ដោយ​ប្រើប្រាស់​ប្រាក់​បុរេ​ប្រទាន​ឲ្យ​ហើយ​ក៏​ដោយ។

លោក សយ សុខជា កម្មករ​រោង​ចក្រ បាន​ឲ្យ​ដឹង​ពី​ម្សិលមិញ​ថា កម្មករ​បាន​ទទួល​ប្រាក់​ខែ​សម្រាប់​ខែ​មករា​រួច​ហើយ ប៉ុន្តែ ពួក​គេ​នឹង​បន្ត​ទាមទារ​ប្រាក់​អត្ថប្រយោជន៍ និង​ប្រាក់​អតីត​ភាព​ការងារ។

លោក​ថ្លែង​បន្ត​ថា៖ «​យើង​សូម​ថ្លែង​អំណរ​គុណ​រដ្ឋាភិបាល ប៉ុន្តែ​ យើង​ត្រូវ​ការ​អត្ថប្រយោជន៍​... ព្រោះ​យើង​ធ្វើ​ការ​នៅ​រោងចក្រ​នេះ​ជា​ច្រើន​ឆ្នាំ​មក​ហើយ»។

លោក សុខជា បាន​បញ្ជាក់​ថា ៖ «​ខ្ញុំ​បាន​ធ្វើ​ការ​នៅ​ទី​នេះ​ ៨ ឆ្នាំ​មក​ហើយ ហើយ​តាម​ដែល​ខ្ញុំ​គណនា​លើ​អត្ថ​ប្រយោជន៍ និង​អតីត​ភាព​ការ​ងារ​ ខ្ញុំ​ត្រូវ​មាន​ប្រាក់​ជាង​១ពាន់​ដុល្លារ​អាមេរិក​។ វា​ច្រើន​ចំពោះ​ខ្ញុំ​។ យើង​ដេក​នៅ​មុខ​រោងចក្រ​រាល់​យប់ ដើម្បី​ការពារ​គ្រឿង​បរិក្ខារ​ ក្រែង​លោ និយោជក​យក​វា​ចេញ​ស្ងាត់ៗ»។

លោក អ៊ុំ វិសាល មន្រ្តី​ដោះ​ស្រាយ​វិវាទ​ការ​ងារ​នៅ​សម្ព័ន្ធភាព​សហជីព​ប្រជាធិបតេយ្យកម្មករ​កាត់​ដេរ​កម្ពុជា (ស៊ីខៅឌូ) និង​ជា​សមាជិក​គណៈកម្មាធិការ​ត្រួត​ពិនិត្យ បាន​ថ្លែងថា កម្មករ​មិន​បាន​ទាមទារ​ឲ្យ​រដ្ឋាភិបាល​លក់​រោងចក្រ ឬ​គ្រឿង​បរិក្ខារ​ក្នុង​រោងចក្រ ដើម្បី​បង់​ឲ្យ​ពួក​គេ​ទេ ប៉ុនែ្ត​ទាមទារ​ឲ្យ​យក​ប្រាក់​បុរេ​ប្រទាន ដែល​ក្រុមហ៊ុន​តម្កល់​មុន​ធ្វើ​អាជីវកម្ម ឬ​ក៏​រាជរដ្ឋាភិបាល​ត្រូវ​នាំ​និយោជក​មក​ដោះស្រាយ​ជាមួយ​នឹង ក្រុម​កម្មករ។

រោងចក្រ​នៅ​តែ​បិទ​ទ្វារ ចាប់​តាំង​ពី​ចុង​ខែ​ធ្នូ ​នៅ​ពេល​ម្ចាស់​រោង​ចក្រ​បាន​គេច​ខ្លួន​ដោយ​គ្មាន​សេចក្តី​ប្រកាស។

ក្រសួង​សង្គមកិច្ច​បាន​ប្រកាស កាល​ពី​ថ្ងៃ​សុក្រ​ថា ​រដ្ឋាភិបាល​នឹង​បង់​ប្រាក់​ប្រមាណ​ជា​៩​ម៉ឺន​ដុល្លារ​អាមេរិក​ជា​ប្រាក់ បុរេប្រទាន​របស់​ក្រុម​ហ៊ុន​តម្កល់​បើក​ឲ្យ​កម្មករ​ជាង​៧ពាន់​នាក់​។ ​

ទន្ទឹម​នឹង​នេះ កម្មករ​ជាង​៥០០ នាក់​នៅ​រោង​ចក្រ Hi Fashion ក្នុង​ខណ្ឌ​សែន​សុខ ​រាជ​ធានី​ភ្នំពេញ​នឹង​ធ្វើ​កូដកម្ម​ទាមទារ​ប្រាក់​ឈ្នួល​ខែ​មករា​របស់ ខ្លួន​នៅ​ថ្ងៃ​ចន្ទ​នេះ​ដែរ។

លោក វាន់ សេងលី មន្រ្តី​សហជីព​សេរីកម្មករ​បាន​ថ្លែង​កាល​ពី​ម្សិលមិញ​ថា កម្មករ​ប្រហែល ៥០០ នាក់ ក្នុង​នោះ​មាន​អ្នក​បើក​ឡាន ៤ នាក់ នឹង​ប្រមូល​ផ្តុំ​គ្នា​នៅ​មុខ​រោងចក្រ​ដើម្បី​ទាម​ទារ​ប្រាក់​ឈ្នួល​។

លោក​បន្ត​ថា៖ «​កម្មករ​មិន​ទទួល​បាន​ប្រាក់​ឈ្នួល​ខែ​មករា​នៅ​ឡើយ​ ហើយ​អ្នក​បើកបរ​៤នាក់ មិន​ទទួល​បាន​ប្រាក់​ឈ្នួល ចាប់​តាំង​ពី​ខែ​តុលា រហូត​ដល់​ពេល​នេះ​។ ពួក​គេ​ត្រូវ​ការ​ប្រាក់​ឈ្នួល​ខ្លាំង​ណាស់ ដើម្បី​ផ្គត់​ផ្គង់​ជីវភាព​រស់​នៅ៕ TK

អត្ថបទគួរចាប់អារម្មណ៍