The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​រោងចក្រ​យ៉ុងវ៉ា​បន្ត​ធ្វើ​កូដកម្ម​បិទផ្លូវ




កម្មករ​រោងចក្រ​យ៉ុងវ៉ា​បន្ត​ធ្វើ​កូដកម្ម​បិទផ្លូវ

កម្មករ​រោងចក្រ​យ៉ុងវ៉ា​បន្ត​ធ្វើ​កូដកម្ម​បិទផ្លូវ

130219_07
កូដកម្មបិទផ្លូវជាតិ ២១ របស់កម្មកររោងចក្រយ៉ុងវ៉ា១និង២ ពីសប្តាហ៍មុន

កណ្តាលៈ កម្មករ​រាប់ពាន់​នាក់​នៅ​រោងចក្រ​យ៉ុងវ៉ា១ និង​២ បាន​ចាប់​ផ្តើម​បិទ​ផ្លូវ​លេខ​២១ សាជាថ្មី​ម្តង​ទៀត កាល​ពី​ព្រឹក​ម្សិលមិញ​នេះ ដើម្បី​ទាមទារ​ឲ្យ​ថៅកែ​បើក​ប្រាក់​អតីត​ភាព​ការ​ងារ និង​ប្រាក់​អត្ថប្រយោជន៍​ផ្សេងៗ​ទៀត បន្ទាប់​ពី​ថៅកែ​បាន​រត់​ចោល​ដោយ​មិន​បាន​ធ្វើ​ការ​ដោះស្រាយ។

កម្មករ សយ សុខជា បាន​ឲ្យ​ដឹង​ថា កម្មករ​បាន​ចាប់​ផ្តើម​បិទ​ផ្លូវ​តាំង​ពី​ម៉ោង​៦ព្រឹក ដោយ​នាំ​គ្នា​មក​ឈរ​នៅ​ចម្ងាយ​ប្រមាណ​ជា​១គីឡូម៉ែត្រ ពី​ផ្ទះ​លោក​នាយក​រដ្ឋ​មន្រ្តី ហ៊ុន សែន ក្នុង​ក្រុង​តាខ្មៅ ខេត្ត​កណ្តាល​ដើម្បី​ឲ្យ​លោក​នាយក​រដ្ឋ​មន្រ្តី និង​អាជ្ញាធរ​ពាក់ព័ន្ធ​បាន​ឃើញ​ពី​កូដកម្ម​ទាមទារ​របស់​ពួក គេ។

លោក​ឲ្យ​ដឹង​បន្ត​ថា​៖ «មាន​សមត្ថកិច្ច​ជាច្រើន​បាន​មក​ឈរ​ការពារ​សណ្តាប់​ធ្នាប់ និង​សុវត្ថិភាព​នៅ​កន្លែង​កូដករ ខ្លាច​ពួក​យើង​មាន​ការ​ប្រទូសរ៉ាយ​ណា​មួយ​កើត​ឡើង ប៉ុន្តែ​ពួក​យើង​ធ្វើ​ការ​តវ៉ា​នេះ​ដោយ​អហិង្សា​តែ​ប៉ុណ្ណោះ»។

លោក សុខជា បាន​បញ្ជាក់​ថា ក៏មាន​ឡាន​ទឹក​ពីរ​គ្រឿង​បញ្ឈរ​នៅ​កណ្តាល​ផ្លូវ ត្រៀម​សម្រាប់​បង្រ្កាប​ក្រុម​កូដករ​ដែរ។

សូម បញ្ជាក់​ថា កម្មករ​ជាង​៧ពាន់​នាក់ នៅ​រោងចក្រ​នេះ​បាន​ធ្វើ​ការ​តវ៉ា​តាំង​ពី​ដើម​សប្តាហ៍​​មុន​ទាមទារ​បើក​ប្រាក់ ឈ្នួល​ខែ​មករា​ដែល​ទើប​ទទួល​បាន បន្ទាប់​ពី​ថៅកែ​រត់​បាត់​កាល​ពី​ចុង​ខែ​ធ្នូ​ឆ្នាំ​មុន​ដោយ​បាន រដ្ឋាភិបាល​ជួយ​អន្តរាគមន៍ បើក​ប្រាក់​ខែ​មករា​ឲ្យ​ពួក​គេ​កាលពី​ថ្ងៃ​សុក្រ​កន្លង​ទៅ​។ ប៉ុន្តែ​កម្មករ​នៅ​តែ​បន្ត​ធ្វើ​ការ​តវ៉ា​ទៀត ដោយ​សារ​ប្រាក់​អត្ថប្រយោជន៍ និង​ប្រាក់​អតីត​ភាព​ការងារ​ពួក​គេ​នៅ​មិន​ទាន់​បាន​បើក​នៅ​ឡើយ​។

កម្មការិនី សុខ ផល្លា តំណាង​កម្មករ​បាន​ឲ្យ​ដឹង​ដែរ​ថា កម្មករ​អស់​ជម្រើស​ហើយ ព្រោះ​ពួក​គេ​ត្រូវ​ការ​លុយ​ដើម្បី​ជួយ​ដល់​ជីវភាព​ក្រុម​គ្រួសារ ដូច​នេះ​បាន​ជា​គេ​មិន​អាច​បញ្ឈប់​ធ្វើ​កូដកម្ម​នេះ។

សុខ ផល្លា បាន​បន្ថែម​ថា​៖ «កម្មករ​មាន​បំណង​ហែ​ក្បួន​ទៅ​គេហដ្ឋាន​របស់​សម្តេច ហ៊ុន សែន តែ​ខ្ញុំ​បាន​ពន្យល់​ពួក​គេ​ឲ្យ​នៅ​ស្ងៀម​សិន រង់ចាំ​មើល​ការ​ជួយ​អន្តរាគមន៍​ពី​មន្រ្តី​ពាក់ព័ន្ធ»។

សុខ ផល្លា បាន​បន្ត​ថា មាន​ការ​ប៉ះ​ទង្គិច​គ្នា​មួយ​ប្រាវ​ផង​ដែរ​ រវាង​សមត្ថកិច្ច និង​ក្រុម​កម្មករ ប៉ុន្តែ មិន​មាន​ការ​រងរបួស​អី​ធ្ងន់ធ្ងរ​នោះ​ទេ។

លោក សាត សាមុត រដ្ឋ​លេខាធិការ​នៃ​ក្រសួង​ការងារ​ បាន​មាន​ប្រសាសន៍​កាល​ពី​ថ្ងៃ​ម្សិល​មិញ​ថា ក្រុម​ការងារ ក្រសួង​នេះ​កំពុង​តែ​ធ្វើ​ការ​លើ​រឿង​នេះ​ជូន​កម្មករ ហើយ​ថា ក្រុម​ការងារ​កំពុង​តែ​ធ្វើ​ការ​វាយ​តម្លៃ​លើ​សម្ភារ​នៅ​ក្នុង​រោងចក្រ​ជា​មុន ឲ្យ​រួច​រាល់​សិន​។

លោក​បាន​បន្ថែម​ថា​ ៖ «​នៅ​ពេល​ដែល​ក្រុម​ការងារ​ធ្វើ​ការ​វាយ​តម្លៃ​បាន​ហើយ គេ​នឹង​ផ្តល់​ជូន​ទៅ​តុលាការ ដើម្បី​ធ្វើ​ការ​សម្រេច។ តុលាការ​នឹង​ចេញ​លិខិត​មួយ​មក​រាជរដ្ឋាភិបាល ដើម្បី​យល់​ព្រម​ក្នុង​ការ​យក​សម្ភារ​លក់​ឡាយ​ឡុង​យក​លុយ​ផ្តល់​ជូន កម្មករ ប៉ុន្តែ នៅ​ពេល​នេះ​យើង​មិន​ទាន់​ដឹង​ថា របស់​របរ​ទាំង​នោះ​មាន​តម្លៃ​ប៉ុន្មាន​នៅ​ឡើយ​ទេ»។

លោក សាត សាមុត បាន​បន្ត​ទៀត​ថា លោក​មិន​អាច​ប្រាប់​ពី​ចំនួន​ទឹក​ប្រាក់​ដែល​នឹង​ត្រូវ​ចំណាយ​លើ​ប្រាក់​អត្ថប្រយោជន៍ និង​ប្រាក់​អតីត​ភាព​ការងារ​របស់​កម្មករ​បាន​ទេ ព្រោះ​លោក​ខ្លាច​អ្វី​ដែល​លោក​ប្រាប់​មុន វា​ផ្ទុយ​នឹង​អ្វី​ដែល​ក្រុម​ការងារ​បាន​វាយ​តម្លៃ​ឃើញ។

លោក​បាន​ស្នើ​ថា​៖​ «សូម​ឲ្យ​កម្មករ​រង់ចាំ​បន្តិច​សិន រាជរដ្ឋាភិបាល​មិន​ធ្វើ​ឲ្យ​បង​ប្អូន​បាត់​ប្រាក់​អត្ថប្រយោជន៍​នោះ​ទេ​។ យើង​ចាំ​ជួយ​ពួក​គេ​រហូត»។

តាម​ព័ត៌មាន​របស់​សហជីព​ស៊ីខៅឌូ​បាន​ឲ្យ​ដឹង​ថា កម្មករ-កម្មការិនី​រោងចក្រ​យ៉ុងវ៉ា ចាប់​ចូល​ធ្វើ​ការងារ​តំាង​ពី​ឆ្នាំ ១៩៩៨ កម្មករ​ភាគ​ច្រើន​សុទ្ធ​តែ​ធ្វើ​ការ​ចាប់​ពី ៨ ទៅ ១០​ឆ្នាំ។ ប្រសិន​ បើ​គិត​ពី​ប្រាក់​អតីត​ភាព​និង​ប្រាក់​អត្ថប្រយោជន៍​ផ្សេងៗ ថៅកែ​រោងចក្រ​ត្រូវ​ចំណាយ​មិន​តិច​ជាង ៧ ទៅ ៨ លាន​ដុល្លារ​អាមេរិក​ទេ សម្រាប់​កម្មករ​ទំាងអស់​នោះ៕

អត្ថបទគួរចាប់អារម្មណ៍