The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​រោងចក្រ​សាន់​វែល​ស៊ូ ព្រម​ចូល​ធ្វើការ​វិញ​បន្ទាប់​ពី​រោងចក្រ​ទទួល​យក​លក្ខខណ្ឌ​ខ្លួន

កម្មករ​រោងចក្រ​សាន់​វែល​ស៊ូ ព្រម​ចូល​ធ្វើការ​វិញ​បន្ទាប់​ពី​រោងចក្រ​ទទួល​យក​លក្ខខណ្ឌ​ខ្លួន

កូដកម្ម​របស់​កម្មករ​រោងចក្រ​កាត់ដេរ​នៅកម្ពុជា
កូដកម្ម​របស់​កម្មករ​រោងចក្រ​កាត់ដេរ​នៅកម្ពុជា ​កន្លង​មក​តែង​ទាមទារ​លក្ខខណ្ឌ​ការងារ​ស្របច្បាប់​។ រូបថត ផា លីណា

កម្មករ​រោងចក្រ​សាន់​វែល​ស៊ូ ព្រម​ចូល​ធ្វើការ​វិញ​បន្ទាប់​ពី​រោងចក្រ​ទទួល​យក​លក្ខខណ្ឌ​ខ្លួន

ភ្នំពេញៈ កម្មករ​ជិត​មួយ​ពាន់​នាក់​នៅ​រោង​ចក្រ​ សាន់​វែល​ស៊ូ (Sun Well Shoes) ​នឹង​វិល​ចូល​ធ្វើ​ការ​វិញ​នៅ​ថ្ងៃអង្គារ​នេះ​ បន្ទាប់​​ពីពួក​គេ​​បាន​ធ្វើកូដ​កម្ម​អស់​រយៈ​ពេល​ជាង​​២​សប្តាហ៍​​ ស្រប​ពេល​គ្នា​​នឹង​មន្រ្តី​សហជីព​​រោង​ចក្រ​នេះ​​ចំ​នួន​បួន​នាក់​ត្រូវ​ចូល​​បំភ្លឺ​នៅ​សាលា​ដំបូង​រាជ​ធានី​ភ្នំ​ពេញ​ពាក់​ព័ន្ធ​នឹង​ករណី​បណ្តឹង​របស់​ក្រុម​ហ៊ុនដែល​ទទួល​បាន​ដីកា​រក្សា​ការ​ពារ​។

លោក សៀង សម្បត្តិ​ ប្រធាន​សហព័ន្ធ​សហជីព​​មិត្ត​ភាព​កម្មករ​ (WFUF) បាន​ថ្លែង​កាល​ពីម្សិល​មិញ​ថា​ ​ដំណោះ​ស្រាយ​សម្រាប់​ជម្លោះ​រយៈ​ពេលដ៏យូរ​នៅ​រោង​ចក្រ​ Sun Well Shoes ​​នេះ​​បាន​ឈាន​ដល់ព្រម​ព្រៀង​គ្នា​​ហើយបន្ទាប់​​ពី​ការ​ចរចា​គ្នា​រយៈ​ពេល​៥​ម៉ោង​រវាង​សហជីព​ តំណាង​ក្រុម​ហ៊ុន​ និង​មន្រ្តី​ក្រសួង​ការងារ​។

លោក​បន្ត​ថា​​៖ «​​កម្មករ​​យល់​ព្រម​ត្រឡប់​ចូល​ធ្វើ​ការ​វិញ​​នៅ​ថ្ងៃ​ស្អែក​ ​​ពី​ព្រោះ​ក្រុម​ហ៊ុន​​បាន​ទទួល​យក​ចំណុច​ដែល​​កម្មករ​​​បាន​ទាម​ទារ​»។

លោក សៀង​ សម្បត្តិ បាន​ថ្លែង​បន្ត​ថា​ ​ក្រុម​ហ៊ុន​យល់​ព្រម​​បើក​​ប្រាក់​ ៥០​ដុល្លារ​អាមេរិក​​ក្នុង​មួយ​ឆ្នាំ​​ សម្រាប់​​ការ​បញ្ចប់​កិច្ច​សន្យា​​ទៅ​កម្មករ​ ​ក្រុម​ហ៊ុន​នឹង​​ធ្វើ​កិច្ច​សន្យា​​ថ្មី​ជា​មួយ​កម្ម​ករ​ដោយ​រក្សា​ទុក​អតី​ត​ភាព​និង​អត្ថ​ប្រយោជន៍​ដទៃ​​ទៀត​​ដែល​ពួក​គេ​​បាន​ធ្វើ​ការ​នៅ​ក្នុង​កិច្ច​សន្យា​ចាស់ ​ហើយ​ក្រុម​ហ៊ុន​នឹង​ផ្តល់​ឧបករណ៍​សុវត្ថិ​ភាព​ដូច​ជា​ ​ស្រោម​ដៃ​ ម៉ាស់ និង​វត្ថុ​ដទៃ​ៗ​ទៀត​។

បើ​តាម​របាយការណ៍​នៃ​កិច្ច​ព្រម​ព្រៀង​គ្នា​ដែល​ភ្នំ​ពេញ​ប៉ុស្តិ៍​ទទួល​បាន​កាលពី​​ម្សិល​មិញ​ឲ្យ​ដឹង​ថា​ ​ក្រុម​ហ៊ុន​​នឹង​​ផ្តល់​៥០​ភាគ​រយ​នៃ​ប្រាក់​ខែ​របស់​ពួក​គេ​​និង​អត្ថ​ប្រយោជន៍​ក្នុង​អំឡុង​ពេល​កូដ​កម្ម​ ប៉ុន្តែ​​ បើ​កម្មករ​មិន​ត្រឡប់​មក​ធ្វើ​ការ​វិញ​នៅ​ថ្ងៃ​ទី​២៩​ កក្កដា ​ក្រុម​ហ៊ុន​នឹង​មិន​ផ្តល់​ឲ្យ​ពួក​គេ​ទេ​។

ទន្ទឹម​នេះ​ ​ចៅក្រម​សាលា​ដំ​បូង​រាជ​ធានី​ភ្នំ​ពេញ​ ​លោក កែវ មុនី បាន​កោះ​ហៅ​មន្រ្តី​សហ​ជីព​នេះ​​បួន​នាក់​​មក​សាក​សួរ​​នៅ​តុលាការ​ជុំ​វិញ​បណ្តឹង​របស់​រោង​ចក្រ Sun Well Shoes ​​នៅ​រសៀស​ថ្ងៃ​អង្គារ​។

លោក សៀង សម្បត្តិ បាន​ថ្លែង​ថា៖ «​ខ្ញុំ​នឹង​មក​តុលាការ​​ឲ្យ​ទាន់​ពេល​វេលា​តាម​ការ​​កោះ​ហៅ​របស់​ចៅ​ក្រម​»​។

មន្រ្តី​សហជីព​បី​នាក់​ទៀត​ដែល​តុលាការ​​កោះ​ហៅ​មាន​ លោក ម៉ៅ វណ្ណៈ អនុ​ប្រធាន​សហព័ន្ធ​សហជីព​​មិត្ត​ភាព​កម្មករ​ លោក ហេង សារឿន មន្រ្តី​សហជីព​ ​និង​ ​ប្លង់​ លក្ខណា​ លេខាធិការ​​សហជីព​។

ក្នុង​​ដីកា​កោះ​របស់​លោក កែវ មុនី ចុះ​ថ្ងៃ​ទី២៤ កក្កដា​​បាន​​បង្គាប់​ថា ​៖ «​អ្នក​ដែល​ត្រូវ​បាន​កោះ​ហៅ​ទាំង​អស់​ត្រូវ​តែ​មក​តាម​ដីកា​នេះ​ឲ្យ​ទាន់​ពេល​វេលា ​​និង​នាំ​យក​​ឯក​សារ​ពាក់​ព័ន្ធ​​ទាំង​អស់មក​​ជាមួយ​»។

លោក ហេង សារឿន ​ជា​ចុង​ចោទ​ម្នាក់​ បាន​ប្រាប់​​ថា គាត់​នឹង​​ចូល​ទៅ​តុលាការ​​ជា​មួយ​មេធាវី​​​​ បើទោះ​​ជា​គាត់​បារម្ភ​អំពី​​ការ​ប្តឹងប្ដល់​​នេះក៏​ដោយ​។

លោក​​​បន្ត​ថា ​៖ «​​ក្រុម​ហ៊ុន​បានដាក់​បណ្តឹង​នេះ​ជា​មុន ​អំពី​ដីកា​​រក្សា​​ការ​ពារ​​ទ្រព្យ​សម្បត្តិ​របស់​ពួក​គេ​ពី​ព្រោះ​គេខ្លាច​​កម្ម​ករ​​និង​សហ​ជីព​​បំ​ផ្លាញ​​ទ្រព្យ​សម្បត្តិ​របស់​រោង​ចក្រ​​ នៅ​ក្នុង​អំឡុង​ពេល​ធ្វើ​កូដ​កម្ម​»។

មន្រ្តី​រោង​ចក្រ​ Sun Well Shoes មិន​អាច​ទាក់​ទង​សុំ​ការអត្ថា​​ធិប្បាយ​បាន​ទេ កាល​ពីម្សិល​មិញ៕

អត្ថបទគួរចាប់អារម្មណ៍