The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​រោងចក្រ ជីង ខូ តវ៉ា​បិទ​ផ្លូវ​ដើម្បី​រក​ដំណោះស្រាយ




កម្មករ​រោងចក្រ ជីង ខូ តវ៉ា​បិទ​ផ្លូវ​ដើម្បី​រក​ដំណោះស្រាយ

កម្មករ​រោងចក្រ ជីង ខូ តវ៉ា​បិទ​ផ្លូវ​ដើម្បី​រក​ដំណោះស្រាយ

131129_05
កម្មករកម្មការិនីរោងចក្រនាំគ្នាលើកគ្រែបិទផ្លូវដើម្បីស្វែងរកដំណោះស្រាយ សហការី

ស្វាយរៀងៈ កម្មករ​ជាង ១០០០ នាក់​របស់​រោងចក្រ ជីង ខូ ខេមបូឌា បាន​នាំគ្នា​តវ៉ា​ដោយ​ធ្វើ​ការ​បិទ​ផ្លូវ​ជាតិ​លេខ ១ ស្ថិត​ក្នុង​ក្រុង បាវិត ខេត្ត ស្វាយរៀង កាល​ពី​ព្រឹក​ថ្ងៃ​ព្រហស្បតិ៍​ម្សិលមិញ​ដើម្បី​ទាមទារ ឲ្យ​មាន​ការ​ដោះស្រាយ​នូវ​លក្ខខណ្ឌ​មួយ​ចំណុច។

លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ​បាន​និយាយ​កាល​ពី​ព្រឹក​ថ្ងៃ ព្រហស្បតិ៍​ខណៈ​ពេល​ដែល​លោក​កំពុង​ធ្វើ​ដំណើរ​ទៅ​ដោះស្រាយ​ជូន​កម្មករ​ថា កម្មករ​បាន​ធ្វើ​ការ​តវ៉ា​ជាង ១០ ថ្ងៃ​មក​ហើយ ដោយ​គ្មាន​អ្នក​ណា​យក​ចិត្ត​ទុក​ដាក់​ចំពោះ​ពួក​គេ ទើប​ពួក​គេ​សម្រេច​បិទ​ផ្លូវ​នេះ។

លោក​បាន​ថ្លែង​ថា៖ «អ្វី​ដែល​ពួក​គេ​ទាមទារ​មិន​មាន​អី​ធ្ងន់​ធ្ងរ​ដែល​មិន​អាច​ដោះស្រាយ បាន​នោះ​ទេ តែ​មិន​មាន​មន្រ្តី​ណា​អើពើ​ចំពោះ​ពួក​គេ»។

លោក​បាន​និយាយ​ថា កម្មករ​ទាមទារ​ចំនួន ៣ ចំណុច តែ​ត្រូវ​បាន​ដោះស្រាយ​ពីរ​ចំណុច​រួច​ហើយ នៅ​តែ​មួយ​ចំណុច​ពាក់​ព័ន្ធ​នឹង​ការ​ទាមទារ​មិន​ឲ្យ​មាន​ការ​កាត់​ប្រាក់​ឈ្នួល និង​ប្រាក់​រង្វាន់​ទៀង​ទាត់​ក្នុង​ថ្ងៃ​ដែល​ពួក​គេ​ធ្វើ​ការ​តវ៉ា។

លោក ទួន សារ៉ែន មន្រ្តី​ដោះស្រាយ​វិវាទ​ការងារ​នៃ​សម្ព័ន្ធ​សហជីព​ចលនា​កម្មករ​ប្រចាំ ខេត្ត ស្វាយរៀង បាន​និយាយ​ថា កម្មករ​បាន​បិទ​ផ្លូវ​ជាតិ​លេខ ១ នេះ​តាំង​ពី​ម៉ោង​ជិត ៨ ព្រឹក រហូត​មក​ដល់​ម៉ោង ១០ ទើប​ពួក​គេ​យល់​ព្រម​បើក​ផ្លូវ​ដោយ​មាន​ការ​អន្តរាគមន៍ ពី​លោក​អភិបាល​ខេត្ត។ លោក​បាន​ថ្លែង​ថា៖ «កម្មករ​បាន​ព្រម​បើក​ផ្លូវ​វិញ​ហើយ ដោយ​លោក​អភិបាល​ខេត្ត​សន្យា​ថា នឹង​ដោះស្រាយ​ជូន​ពួក​គេ»។

លោក​ថា ការ​បិទ​ផ្លូវ​នេះ​ធ្វើ​ឲ្យ​ចរាចរណ៍​មាន​ការ​កកស្ទះ​ប្រមាណ​ជា ៦ គីឡូម៉ែត្រ។

តំណាង​ក្រុមហ៊ុន​បាន​ឲ្យ​ដឹង​ថា ការ​ចរចា​ត្រូវ​បាន​លើក​ពេល​ទៅ​ថ្ងៃ​ចន្ទ​សប្តាហ៍​ក្រោយ​វិញ​ដោយសារ​ថៅកែ​រោងចក្រ​មាន​ការ​រវល់​មិន​អាច​មក​ជួប​ជាមួយ​មន្រ្តី​សហជីព និង​មន្រ្តី​សាលា​ខេត្ត​បាន​ទេ។

ការ​លើក​ពេល​នៃ​ការ​ចរចា​នេះ​ធ្វើ​ឲ្យ​មាន​ការ​ព្រួយ​បារម្ភ​ថា កម្មករ​អាច​ធ្វើ​ការ​បិទ​ផ្លូវ​ជា​ថ្មី​ម្តង​ទៀត​នៅ​ថ្ងៃ​នេះ៕

អត្ថបទគួរចាប់អារម្មណ៍