The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​រោងចក្រ ៣០ នាក់​នៅ​ខេត្ត​កណ្តាល​ដួល​សន្លប់




កម្មករ​រោងចក្រ ៣០ នាក់​នៅ​ខេត្ត​កណ្តាល​ដួល​សន្លប់

កម្មករ​រោងចក្រ ៣០ នាក់​នៅ​ខេត្ត​កណ្តាល​ដួល​សន្លប់

130812_07
កម្មការិនីរោងចក្រកាត់ដេរដួលសន្លប់ ដែលត្រូវគ្រូពេទ្យជួយសង្គ្រោះនាពេលកន្លងមក ហេង ជីវ័ន

កណ្តាលៈ កម្មករ-កម្មការិនី ប្រហែល ៣០ នាក់ នៅ​រោងចក្រ​កាត់ដេរ​មួយ​ក្នុង​ខេត្ត កណ្ដាល ត្រូវ​ចាត់​បញ្ជូន​ទៅ​មន្ទីរពេទ្យ​ភ្លាមៗ កាល​ពី​ថ្ងៃ​សុក្រ ក្រោយ​ពី​មាន​ការ​ដួល​សន្លប់​បន្ត​គ្នា​នៅ​ពេល​មាន​ផ្សែង​ហុយ​ចេញ​ពី​បំពង់​សម្ងួត​សម្លៀក​បំពាក់​ដែល​ធ្លាយ​ចូល​ទៅ​ដល់​បន្ទប់​ដែល​កម្មករ​ជាង ១ ពាន់​នាក់​កំពុង​ធ្វើការ។

លោក អ៊ុំ វិសាល មន្ត្រី​ផ្នែក​ច្បាប់​នៃ​សម្ព័ន្ធ​សហជីព​ប្រជាធិបតេយ្យ កម្មករ​កាត់ដេរ​កម្ពុជា (ហៅ ស៊ីខៅឌូ) បាន​ថ្លែង​ឲ្យ​ដឹង​ថា ហេតុការណ៍​នេះ​កើត​ឡើង​នៅ​ពេល​មាន​ផ្សែង​ហុយ​ចូល​ទៅ​ក្នុង​បន្ទប់​ផ្នែក អ៊ុត របស់​ក្រុមហ៊ុន Cambo Hong Xing International Knitting Co., Ltd ខណៈ​ជាង​ភ្លើង​ដែល​ធ្វើ​ការ​ជួស​ជុល​បណ្ដាល​ឲ្យ​ធ្លាយ​បំពង់​បង្ហុយ​ផ្សែង​ចេញ​មក​ក្រៅ។

លោក អ៊ុំ វិសាល បាន​បញ្ជាក់​ទៀត​ថា នៅ​មុន​ពេល​ផ្សែង​ហុយ​ចេញ​ពី​ក្នុង​បន្ទប់​អ៊ុត​បណ្ដាល​ឲ្យ​កម្មករ ប្រមាណ​ជា ៣០ នាក់​ដួល​សន្លប់​នោះ ក្រុម​ជាង​ភ្លើង​ក៏​បាន​ដួល​សន្លប់​និង​រង​របួស​មុខ​និង​ដៃ​ជើង​ផង​ដែរ ដោយ​សារ​ផ្សែង​នោះ ប៉ុន្តែ​ថា លោក​មិន​ទាន់​បាន​ជួប​ជាមួយ​នឹង​ជាង​ភ្លើង​ទាំង​នោះ​ផ្ទាល់​នៅ​ឡើយ​ទេ។

លោក វិសាល បន្ត​ឲ្យ​ដឹង​ដែរ​ថា ភ្លាមៗ​ក្រុម​កម្មករ​សល់​ពី​សន្លប់​ប្រមាណ​ជាង ១ ពាន់​នាក់ នៅ​ក្នុង​រោងចក្រ​នេះ​ត្រូវ​ថៅកែ​អនុញ្ញាត​ឲ្យ​ឈប់​សម្រាក​ការងារ​ត្រឡប់​ទៅ​ផ្ទះ​វិញ បន្ទាប់​ពី​ជួប​ឧប្បត្តិ​ហេតុ​នេះ។

អ្នក​គ្រប់​គ្រង​នៅ​ក្រុមហ៊ុន Cambo Hong Xing International Knitting និង​ក្រុម​កម្មករ​រងគ្រោះ​មិន​អាច​ទាក់​ទង​សុំ​ការ​បញ្ជាក់​បាន​ទេ កាល​ពី​ថ្ងៃ​អាទិត្យ​ម្សិលមិញ។

កាល​ពី​ចុង​ខែ​មុន​មាន​កម្មករ​ប្រហែល ៤០ នាក់​នៅ​រោងចក្រ​កាត់ដេរ TMI ក្នុង​ខេត្ត ស្វាយរៀង​បាន​ដួល​សន្លប់​នៅ​ពេល​ភាយ​ក្លិន​កាវ​ចូល​ទៅ​ក្នុង​រោងចក្រ ពេល​កម្មករ​ចូល​ធ្វើ​ការ​បន្ទាប់​ពី​ហូប​បាយ​ថ្ងៃ​ត្រង់​រួច៕ PN

អត្ថបទគួរចាប់អារម្មណ៍