The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​រោងចក្រ ៤​ពាន់​នាក់​នៅ​កំពង់ចាម​ប្តេជ្ញា​បន្ត​ធ្វើ​កូដកម្ម




កម្មករ​រោងចក្រ ៤​ពាន់​នាក់​នៅ​កំពង់ចាម​ប្តេជ្ញា​បន្ត​ធ្វើ​កូដកម្ម

កម្មករ​រោងចក្រ ៤​ពាន់​នាក់​នៅ​កំពង់ចាម​ប្តេជ្ញា​បន្ត​ធ្វើ​កូដកម្ម

6_story_1
កម្មករ កម្មការិនីរាប់រយនាក់ កំពុងតវ៉ានៅមុខរោងចក្រ Juhui Footwear កាលពីម្សិលមិញ សហការី

កំពង់ចាមៈ កម្មករ​ជាង ៤០០០ នាក់នៅ​រោងចក្រ​ផលិត​ស្បែក​ជើង​ក្នុង​ខេត្ត កំពង់ចាម កាល​ពី​ម្សិលមិញ​បាន​ប្តេជ្ញា បន្ត​ធ្វើ​កូដកម្ម ជា​បន្ត​ទៅ​ទៀត​រហូត​មាន​ដំណោះ​ស្រាយ បន្ទាប់​ពី​មន្រ្តី​ក្រុមហ៊ុន​បាន​បដិសេធ​មិន​បំពេញ​តាម​ការ​ទាមទារ ទាំង​អស់​របស់​ពួកគេ។

លោក គង់ អាទិត្យ អនុ​ប្រធាន​សម្ព័ន្ធ​សហជីព​កម្មករ​កាត់​ដេរ​កម្ពុជា (ស៊ីខៅឌូ) បាន​ថ្លែង​ថា កម្មករ​នៅ​រោងចក្រ Juhui Footwear ដែល​ជា​របស់​ចិន បាន​ដើរ​ចេញ​ពី​រោងចក្រ​នៅ​ថ្ងៃ​សុក្រ​ដោយ​លើក​មូលហេតុ​លក្ខខណ្ឌ​ការងារ​មិន​ល្អ​នៅ​ទី​នោះ។

លោក បាន​ឲ្យ​ដឹង​កាល​ពី​ម្សិលមិញ​ថា៖ «ខ្ញុំ​គិត​ថា [រោងចក្រ Juhui] មាន​លក្ខខណ្ឌ​ការងារ​អាក្រក់​ជាង​រោងចក្រ​ដទៃ​ទៀត​នៅ​ក្នុង​ទីក្រុង។ ជា​ធម្មតា ពេល​គេ​បង្កើត​ក្រុមហ៊ុន​នៅ​ខេត្ត គេ​គិត​ថា គេ​អាច​កេង​ប្រយោជន៍​លើ​កម្មករ»។

មន្រ្តី​រោងចក្រ Juhui បាន​ព្រមព្រៀង​កាល​ពី​ថ្ងៃ​សៅរ៍​ថា នឹង​បំពេញ​ការ​ទាមទារ ១៥ ចំណុច​នៃ​ការ​ទាមទារ​សរុប ១៨ ចំណុច ចំណែក​ឯ​ចំណុច​បី​ផ្សេង​ទៀត គឺ​មន្រ្តី​រោងចក្រ​បដិសេធ។ ចំណុច​ទាំង​នោះ​រួម​មាន​ការ​ទាមទារ​ប្រាក់​បន្ថែម ៣ ដុល្លារ សម្រាប់​ថ្លៃ​ធ្វើ​ដំណើរ (កម្មករ​បច្ចុប្បន្ន​ទទួល​បាន ៧ ដុល្លារ​ក្នុង​មួយ​ខែ) ការ​ទាមទារ ៥ ដុល្លារ​ក្នុង​មួយ​ខែ​ថ្លៃ​ថែទាំ​សុខភាព និង​ការ​ទាមទារ​ឲ្យ​កាត់​ប្រាក់​រង្វាន់​ធ្វើ​ការ​ទៀង​ទាត់ សមាមាត្រ​នឹង​ចំនួន​ពេល​វេលា​ដែល​កម្មករ​ឈប់ (ជា​ជាង​បាត់​បង់​ប្រាក់​រង្វាន់​នេះ​ទាំង​អស់)។

លោក ម៉េង លីក អ្នក​គ្រប់​គ្រង​រដ្ឋបាល​នៅ​រោងចក្រ Juhui បាន​បដិសេធ​មិន​ផ្តល់​ការ​អត្ថាធិប្បាយ​ទេ កាល​ពី​ម្សិលមិញ។

នៅ​ពេល​ធ្វើ​បាតុកម្ម​នៅ​មុខ​រោងចក្រ​កាល​ពី​ម្សិលមិញ កម្មការិនី​ឈ្មោះ ភោគ សាវឿន អាយុ ១៨ ឆ្នាំ បាន​ថ្លែង​ថា កម្មករ​បាន​ធ្វើ​បាតុកម្ម ចាប់​តាំង​ពី​ល្ងាច​ថ្ងៃ​សុក្រ ដើម្បី​ទាមទារ​លក្ខខណ្ឌ​ការងារ​កាន់​តែ​ប្រសើរ​និង​សេរីភាព។

កញ្ញា ថ្លែង​ថា៖ «តំណាង​របស់​យើង​បាន​ចរចា​ជាមួយ​នឹង​ក្រុមហ៊ុន​ដើម្បី​ទាមទារ​ចំណុច ទាំង​អស់​កាល​ពី​ថ្ងៃ​សៅរ៍​ប៉ុន្តែ​ក្រុមហ៊ុន​មិន​បាន​ឯកភាព​ចំពោះ​ការ​ទាមទារ​របស់​យើង​ទាំង​អស់​ទេ»។

លោក ខេន លូ អគ្គ​លេខាធិការ​នៃ​សមាគម​រោងចក្រ​កាត់​ដេរ​នៅ​កម្ពុជា បាន​រិះគន់​ការ​ធ្វើ​កូដកម្ម​នេះ ដោយ​ថ្លែង​ថា កម្មករ​គួរ​ធ្វើ​ការ​ជាមួយ​នឹង​រោងចក្រ Juhui ជា​ជាង​ធ្វើ​កូដកម្ម ដើម្បី​ទទួល​ប្រាក់​បន្ថែម​លើ​ថ្លៃ​ដឹក​ជញ្ជូន និង​ការ​ថែទាំ​សុខភាព។ លោក លូ បន្ត​ថា៖ «យើង​មិន​ដែល​គាំទ្រ​កម្មករ ដែល​ធ្វើ​កូដកម្ម និង​ទាមទារ​ប្រាក់​បែប​នោះ​ទេ»៕ TK

អត្ថបទគួរចាប់អារម្មណ៍