The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​រោងចក្រ Grand Twins នឹង​តវ៉ា​ជាថ្មី

កម្មករ​រោងចក្រ Grand Twins នឹង​តវ៉ា​ជាថ្មី

កម្មករ កម្មការិនី ធ្វើ​ការ​ទាម​ទារ​ដំឡើង​ប្រាក់​ឈ្នួល​កន្លង​មក។
កម្មករ កម្មការិនី ធ្វើ​ការ​ទាម​ទារ​ដំឡើង​ប្រាក់​ឈ្នួល​កន្លង​មក។ ហុង មិនា

កម្មករ​រោងចក្រ Grand Twins នឹង​តវ៉ា​ជាថ្មី

ភ្នំពេញៈ កម្មករ​ប្រមាណ​ជា ៥០០០ នាក់​ធ្វើ​ការ​នៅ​រោងចក្រ Grand Twins នៅ សង្កាត់​ចោមចៅ ខណ្ឌ​ពោធិ៍​សែន​ជ័យ នឹង​បន្ត​ធ្វើ​ការ​តវ៉ា​បន្ត​ទៀត​នៅ​ថ្ងៃ​អង្គារ​ស្អែក​នេះ ដោយ​សារ​ចំណុច​ដែល​ពួក​គេ​ទាម​ទារ​មិន​ទាន់​បាន​ទទួល។

តំណាង​កម្មករ​អ្នក​នាង កៅ វណ្ណេត អាយុ ២៦​ឆ្នាំ បាន​និយាយ​ថា កម្មករ​នឹង​បន្ត​តវ៉ា​ទៀត​នៅ​ថ្ងៃ​អង្គារ​ទៀត ព្រោះ​អ្វី​ដែល​ពួក​កម្មករ​ទាមទារ​មិន​ទាន់​បាន​ផ្លែ​ផ្កា​តាម​អ្វី​ដែល​ពួក​គេ​ចង់​បាន។ អ្នក​នាង​បាន​បន្ត​ថា៖ «ការ​តវ៉ា​នឹង​កើត​ឡើង​នៅ​ខាង​មុខ​រោងចក្រ​ដដែល​ហើយ​ការ​តវ៉ា​នេះ​ធ្វើ​លុះ​ត្រា​តែ​មាន​លទ្ធផល​ដែល​ពួក​យើង​អាច​ទទួល​យក​បាន​ទើប​បញ្ចប់»។

លោក នួន នី ប្រធាន​សហជីព​គាំទ្រ​កម្មករ​កម្ពុជា ថ្លែង​ថា លោក​មិន​ទាន់​បាន​ទទួល​ព័ត៌មាន​ណា​មួយ​ពី​កម្មករ​ធ្វើ​ការ​តវ៉ា​នៅ​ថ្ងៃ​អង្គារ​នេះ​ទេ ប៉ុន្តែ​សហជីព​លោក​នៅ​តែ​បន្ត​ការ​គាំទ្រ​កម្មករ​រហូត​ដរាប​ណា​កម្មករ​នៅ​ត្រូវ​ការ​សហជីព​លោក។

លោក​ថា៖ «ខ្ញុំ​នឹង​ទៅ​ចរចា​ជាមួយ​នឹង​ក្រុម​ហ៊ុន​បន្ត​ទៀត ប្រសិន​បើ​ក្រុម​ហ៊ុន​ពិត​ជា​មាន​ជំហរ និង​ឆន្ទៈ​ក្នុង​ការ​ដោះ​ស្រាយ​បញ្ចប់​បញ្ហា​មែន។ យើង​ចង់​ដោះ​ស្រាយ​ការ​ទាមទារ​ឲ្យ​បង​ប្អូន​កម្មករ​ដើម្បី​បាន​ពួក​គេ​ចូល​ធ្វើ​ការ​វិញ។ យើង​មិន​ដែល​ធ្វើ​ការ​បដិសេធ​ចំពោះ​ការ​ចរចា​ណា​មួយ​ជាមួយ​ក្រុម​ហ៊ុន​ទេ ប៉ុន្តែ​អ្វី​ដែល​យើង​មិន​អាច​ទទួល​យក​បាន​គឺ ដំណោះ​ស្រាយ​មិន​មាន​ចំណុច​សម​ស្រប​ណា​មួយ​ដែល​កម្មករ​អាច​ទទួល​យក​បាន»។

លោក នួន នី បាន​ឲ្យ​ដឹង​ទៀត​ថា ចំណុច​បី​ដែល​កម្មករ​ចង់​បាន​បំផុត​នោះ​គឺ ក្រុម​ហ៊ុន​ផ្តល់​លុយ​អតីតភាព​ការងារ​តាំង​ពី ឆ្នាំ​១៩៩៧ ដល់ ឆ្នាំ​២០០៦-២០០៧ ដែល​ក្រុម​ហ៊ុន​បាន​ប្តូរ​ឈ្មោះ រក្សា​ប្រាក់​ទៀង​ទាត់​ជូន​ពួក​គាត់​នៅ​ដដែល និង​បញ្ឈប់​ការ​រើស​អើង និង​ទទួល​យក​សហជីព​របស់​លោក​ចូល​ក្នុង​រោងចក្រ។

លោក​ថា៖ «ខ្ញុំ​សូម​អំពាវនាវ​ដល់​ស្ថាប័ន​ពាក់​ព័ន្ធ និង​អ្នក​បញ្ជា​ទិញ​មាន addidas និង Walmart ឲ្យ​ជួយ​អន្តរាគមន៍​លើ​បញ្ហា​របស់​កម្មករ​រោងចក្រ Grand Twins នេះ»។

អ្នក​ស្រី សន សុខា មន្រ្តី​នៃ​មជ្ឈមណ្ឌល​អប់រំ​ច្បាប់​សម្រាប់​សហគមន៍ បាន​ឲ្យ​ដឹង​ថា កម្មករ​ដែល​តវ៉ា​ហាក់​ដូច​ជា​ពិបាក​ក្នុង​ការ​ទទួល​បាន​ជោគ​ជ័យ​ពី​ការ​តវ៉ា ដោយ​សារ​ច្បាប់​មិន​មាន​ចែង​ឲ្យ​ថៅកែ​បញ្ឈប់​ទូទាត់​លុយ​ជូន​ពួក​គាត់។ ដូច​នេះ​ពួក​គេ​មាន​ការ​ពិបាក​បន្តិច។

អ្នក​ស្រី​ថា៖ «ខ្ញុំ​គិត​ថា រោងចក្រ ហ្គ្រេនធ្វីន មិន​អាច​ផ្តល់​ជូន​កម្មករ​តាម​អ្វី​ដែល​ពួក​គេ​ទាម​ទារ​ទេ ដោយ​សារ​យើង​មិន​មាន​ច្បាប់​កំណត់​ជូន​កម្មករ​ថា ក្រុម​ហ៊ុន​ត្រូវ​តែ​ទូទាត់​ជូន​កម្មករ​បាន​ប៉ុន្មាន​ឆ្នាំ ឬ​ត្រូវ​ទូទាត់​ម្តង​ប៉ុន្មាន​ឆ្នាំ។ ខ្ញុំ​គិត​ថា ក្រុម​ហ៊ុន​ប្រាកដ​ជា​មិន​ធ្វើ​ការ​ទូទាត់​ទេ ដោយ​សារ​តែ​ចំនួន​ទឹក​ប្រាក់​ច្រើន»។

អ្នក​ស្រី​បាន​គូស​បញ្ជាក់​ថា រដ្ឋាភិបាល និយោជក និង​និយោជិត គួរ​តែ​បង្កើត​នូវ​ដំណោះ​ស្រាយ​ថ្នាក់​ជាតិ​មួយ ដោយ​គួរ​តែ​កំណត់​កិច្ច​ព្រម​ព្រៀង​មួយ ដោយ​ចែង​កំណត់​ឲ្យ​កម្មករ​ដែល​ធ្វើ​ការ​លើស​ពី ១០ ឆ្នាំ​ឡើង​ទៅ និយោជក​គួរ​តែ​ទូទាត់​អត្ថ​ប្រយោជន៍​ជូន​ម្តង ឬ​ត្រូវ​មាន​អត្ថ​ប្រយោជន៍​អ្វី​ខ្លះ​សម្រាប់​កម្មករ​ដែល​ចង់​ឈប់​ពី​ការងារ​ជាដើម៕

អត្ថបទគួរចាប់អារម្មណ៍