The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​រោងចក្រ Jiun Ye នៅ កំពង់ឆ្នាំង ធ្វើ​បាតុកម្ម​បិទ​ផ្លូវ ៤ ម៉ោង

កម្មករ​រោងចក្រ Jiun Ye នៅ កំពង់ឆ្នាំង ធ្វើ​បាតុកម្ម​បិទ​ផ្លូវ ៤ ម៉ោង

ក្រុម​កម្មករ​រោងចក្រ​កាត់ដេរ​ធ្វើ​បាតុកម្ម​តវ៉ា​បិទ​ផ្លូវ​មិន​ឲ្យ​ធ្វើ​ចរាចរណ៍​កន្លង​មក។
ក្រុម​កម្មករ​រោងចក្រ​កាត់ដេរ​ធ្វើ​បាតុកម្ម​តវ៉ា​បិទ​ផ្លូវ​មិន​ឲ្យ​ធ្វើ​ចរាចរណ៍​កន្លង​មក។ ផា លីណា

កម្មករ​រោងចក្រ Jiun Ye នៅ កំពង់ឆ្នាំង ធ្វើ​បាតុកម្ម​បិទ​ផ្លូវ ៤ ម៉ោង

ភ្នំពេញៈ កម្មករ​រាប់​រយ​នាក់​នៅ​រោងចក្រ​កាត់​ដេរ​មួយ​ក្នុង ខេត្ត​កំពង់ឆ្នាំង បាន​ធ្វើ​កូដកម្ម​បិទ​ផ្លូវ​ជាតិ​លេខ ៥ ប្រមាណ ៤ ម៉ោង​កាល​ពី​ម្សិល​មិញ​ដែល​បាន​នាំ​ឲ្យ​មាន​ការ​ប្រឈម​ជាមួយ​កម្លាំង​នគរបាល។

លោក សួស សុខា អគ្គ​លេខាធិការ​រង​នៃ​សហព័ន្ធ​សហជីព​ស្មារតី​កម្មករ​ខ្មែរ​បាន​ថ្លែង​ថា វា​ជា​ថ្ងៃ​ទី​ពីរ​ដែល​កម្មករ​នៅ​រោងចក្រ Jiun Ye Garment បាន​ចេញ​ធ្វើ​ការ​តវ៉ា​នៅ​ផ្លូវ​ជាតិ​ក្នុង ស្រុក​សាមគ្គី​មាន​ជ័យ ដើម្បី​ទាម​ទារ​លក្ខខណ្ឌ​ការងារ​ប្រសើរ​ឡើង​រួម​ទាំង​ប្រាក់​រង្វាន់​ការងារ​ទៀង​ទាត់ ១៥ ដុល្លារ​ក្នុង​មួយ​ខែ។

លោក​បន្ត​ឲ្យ​ដឹង​ថា៖ «កម្មករ​បាន​ធ្វើ​ការ​បិទ​ផ្លូវ​តាំង​ពី​ម៉ោង​ប្រហែល ៨​ព្រឹក ដោយ​យក​គ្រែ​តូប​តូចៗ​ដែល​ពួក​គេ​ជួល​មក​ដាក់​នៅ​កណ្តាល​ផ្លូវ​មិន​អាច​ឲ្យ​ធ្វើ​ចរាចរណ៍​ឆ្លង​កាត់​បាន»។

លោក សួស សុខា បាន​ថ្លែង​ថា កម្មករ​បាន​ធ្វើ​ការ​តវ៉ា​តាំង​ពី​សប្តាហ៍​មុន ប៉ុន្តែ ពួក​គេ​គ្រាន់​តវ៉ា​នៅ​មុខ​រោងចក្រ​ហើយ​បន្ទាប់​មក​ពួក​គេ​ដាក់​លិខិត​ទៅ​សហជីព​របស់​លោក​សុំ​អន្តរាគមន៍​ដើម្បី​ជួយ​ពួក​គេ​ដោយ​សារ​សហជីព​បី​នៅ​ក្នុង​រោងចក្រ​មិន​បាន​ជួយ​ពួក​គេ។

កម្មករ​បាន​ទាមទារ​លក្ខខណ្ឌ​ការងារ​ចំនួន ១៧ ចំណុច ប៉ុន្តែ​ចំណុច​អាទិភាព​មួយ​ចំនួន​ដើម្បី​ឲ្យ​ពួក​គេ​ចូល​ធ្វើ​ការ​វិញ​គឺ​លុះ​ត្រា​តែ​និយោជក​ទទួល​យក​ដូច​ជា​ប្រាក់​ការងារ​ទៀង​ទាត់ ១៥ ដុល្លារ​ក្នុង​មួយ​ខែ​ប្រាក់​ថ្លៃ​បាយ​សម្រាប់​ការងារ​ថែម​ម៉ោង ១ ដុល្លារ​ក្នុង​មួយ​ថ្ងៃ និង​មិន​កាត់​ប្រាក់​ឈ្នួល​ក្នុង​អំឡុង​កូដកម្ម​ផ្តល់​ប្រាក់​ខែ​បី​ខែ​មុន ដល់​កម្មការិនី​មាន​ផ្ទៃ​ពោះ។

លោក សួស សុខា បាន​ថ្លែង​ថា មាន​សមត្ថកិច្ច​នគរបាល​ប្រមាណ ១០០ នាក់ បាន​មក​អន្តរាគមន៍​ហើយ​បាន​រុញ​ច្រាន​កម្មករ​ចេញ​ពី​ផ្លូវ​រហូត​ដល់​មាន​ជម្លោះ​បន្តិច​បន្តួច​រវាង​កង​កម្លាំង​នគរបាល​និង​ក្រុម​កម្មករ ប៉ុន្តែ ក្នុង​ហេតុ​ការណ៍​នោះ​គ្មាន​នរណា​ម្នាក់​រង​របួស​ទេ។

លោក សួស សុខា បាន​ថ្លែង​បន្ត​ថា៖ «មន្រ្តី​រោងចក្រ​បាន​អាន​ដីកា​រក្សា​ការពារ​កាល​ព្រឹក​មិញ​ដោយ​តម្រូវ​ឲ្យ​កម្មករ​ឈប់​ធ្វើ​កូដកម្ម​ភ្លាម និង​ត្រឡប់​ចូល​ធ្វើ​ការ​វិញ​ក្នុង​រយៈ​ពេល ៤៨ ម៉ោង។ ជំហរ​របស់​យើង​គឺ​បន្ត​ការ​តវ៉ា​រហូត​កម្មករ​ទទួល​បាន​ការ​ទាម​ទារ​របស់​ខ្លួន»។

កម្មការិនី យិន ជិនរឿន តំណាង​កម្មករ​បាន​ថ្លែង​កាល​ម្សិល​មិញ​ថា កម្មករ​សម្រេច​បើក​ផ្លូវ​នៅ​ម៉ោង ១១ ព្រឹក ប៉ុន្តែ​ពួក​គេ​នឹង​ត្រឡប់​មក​វិញ​ម្តង​ទៀត​នៅ​ថ្ងៃ​នេះ​បើ​មិន​ទទួល​បាន​ដំណោះ​ស្រាយ។

អ្នក​នាង​បន្ត​ថា៖ «យើង​នឹង​បិទ​ផ្លូវ​នេះ​ម្តង​ទៀត ប្រសិន​បើ​យើង​មិន​ទទួល​បាន​ដំណោះ​ស្រាយ»។

អ្នក​នាង យិន ជិនរឿន បាន​ថ្លែង​បន្ត​ថា កម្មករ​ដែល​តវ៉ា​មាន​ការ​ខឹង​សម្បា​នឹង​រោងចក្រ​ដែល​រំខាន​ពួក​គេ​ដោយ​ចាក់​ធុង​បាស់​ហើយ​ថា ទង្វើ​របស់​រោងចក្រ​បែប​នេះ​គឺ​មិន​ត្រឹម​ត្រូវ​ទេ។

អ្នក​នាង យិន ជិនរឿន បាន​ថ្លែង​បន្ត​ថា៖ «យើង​មិន​ចង់​ធ្វើ​ដូច​នេះ​ទេ ប៉ុន្តែ​និយោជក​បាន​បង្ខំ​យើង។ ប្រសិន​បើ​ពួក​គេ​ចរចា​ជាមួយ​យើង យើង​នឹង​ត្រឡប់​ចូល​ធ្វើ​ការ​វិញ បើ​ទោះ​បី​ជា​យើង​មិន​ទទួល​បាន​គ្រប់​ចំណុច​ទាំង​អស់​ដែល​យើង​ទាម​ទារ​ក៏​ដោយ»។

មន្រ្តី​រោងចក្រ Jiun Ye Garment មិន​អាច​ទាក់​ទង​សុំ​អត្ថាធិប្បាយ​បាន​កាល​ម្សិល​មិញ។

អធិការ​នគរបាល ស្រុក​សាមគ្គី​មាន​ជ័យ លោក ដួង ហុង បាន​ថ្លែង​កាល​ពី​ម្សិល​មិញ​ថា កម្លាំង​របស់​លោក​បាន​ចុះ​ទៅ​ការពារ​សន្តិសុខ​ឲ្យ​កម្មករ​ក្រែង​កើត​មាន​អំពើ​ហិង្សា​រវាង​កម្មករ​និង​កម្មករ​ពីព្រោះ​កម្មករ​ខ្លះ​មិន​ចូល​រួម​កូដកម្ម​តវ៉ា​នេះ​ទេ។

លោក​បន្ត​ថា៖ «មិន​មាន​ការ​រាយការណ៍​មក​ខ្ញុំ​ថា មន្រ្តី​របស់​ខ្ញុំ​រង​របួស​ទេ ហើយ​ថ្ងៃ​ស្អែក​ខ្ញុំ​នឹង​ចូល​រួម​ការ​ចរចា​នៅ​រោងចក្រ​ដើម្បី​បញ្ចប់​វិវាទ​នេះ»។

ទន្ទឹម​គ្នា​នេះ រដ្ឋ​មន្រ្តី​ក្រសួង​ការងារ​បាន​អញ្ជើញ​សហជីព​ដែល​ជា​សមាជិក​គណៈ​កម្មការ​ប្រឹក្សា​ការងារ​ចូល​រួម​ប្រជុំ​ទ្វេ​ភាគី​ជាមួយ​រដ្ឋាភិបាល​នៅ​ថ្ងៃ​សុក្រ។ លិខិត​អញ្ជើញ​ដែល​ចុះ​ហត្ថលេខា​ដោយ​លោក អ៊ិត សំហេង រដ្ឋ​មន្ត្រី​ក្រសួង​ការងារ​ដែល ភ្នំពេញ ប៉ុស្តិ៍ ទទួល​បាន​បញ្ជាក់​ថា៖ «សូម​អញ្ជើញ​ចូល​រួម​កិច្ច​ប្រជុំ​ទ្វេ​ភាគី​ជាមួយ​រដ្ឋាភិបាល​នៅ​ថ្ងៃ ទី២២ សីហា វេលា​ម៉ោង ២:៣០ នាទី​នៅ​ក្រសួង ដើម្បី​ពិភាក្សា​អំពី​ទិន្នន័យ​មួយ​ចំនួន​ដើម្បី​យក​ជា​ផ្នែក​នៃ​ការ​កំណត់​ប្រាក់​ឈ្នួល​អប្បបរមា​សម្រាប់​ឧស្សាហកម្ម​កាត់​ដេរ​សម្លៀក​បំពាក់​និង​ស្បែក​ជើង»៕

អត្ថបទគួរចាប់អារម្មណ៍