The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​រោងចក្រ Jiun Ye ប្រឈម​នឹង​ការ​បណ្តេញ​ចេញ​បើ​មិន​ព្រម​ចូល​ធ្វើ​ការ

កម្មករ​រោងចក្រ Jiun Ye ប្រឈម​នឹង​ការ​បណ្តេញ​ចេញ​បើ​មិន​ព្រម​ចូល​ធ្វើ​ការ

កម្មករ​រោងចក្រ Jiun Ye ប្រឈម​នឹង​ការ​បណ្តេញ​ចេញ​បើ​មិន​ព្រម​ចូល​ធ្វើ​ការ

ភ្នំពេញៈ កម្មករ​នៅ​រោងចក្រ​កាត់​ដេរ​មួយ​នៅ​ក្នុង ខេត្ត​កំពង់ឆ្នាំង ដែល​នៅ​បន្ត​ធ្វើ​កូដកម្ម​តវ៉ា​នៅ​ថ្ងៃ​នេះ នឹង​ត្រូវ​រង​ការ​បណ្តេញ​ចេញ​ពី​ការងារ។ នេះ​បើ​តាម​អ្នក​គ្រប់​គ្រង​រោងចក្រ​ដែល​បាន​ថ្លែង​អះអាង​កាលពី​ម្សិលមិញ​ខណៈ​ក្រុម​កូដករ​បាន​លើក​គ្នា​មក​ដាក់​ញត្តិ​តវ៉ា​នៅ​ក្រសួង​ការងារ នៅ​ក្នុង​រាជធានី​ភ្នំពេញ។

ក្រុម​កម្មករ​ប្រហែល ១០០ នាក់​ដែល​ធ្វើ​ការ​នៅ​រោង​ចក្រ​កាត់​ដេរ Jiun Ye Garment បាន​ធ្វើ​ដំណើរ​មក​កាន់​រាជធានី​ភ្នំពេញ តាម​រថយន្ត​ឈ្នួល​និង​រ៉ឺម៉ក​ម៉ូតូ​កាល​ពី​ម្សិល​មិញ។ សកម្មភាព​កូដកម្ម​តវ៉ា​នេះ​បាន​ធ្វើ​ឡើង បើ​ទោះ​បី​ជា​សាលា​ដំបូង​ខេត្ត​ចេញ​ដីកា​កាល​ពី​ថ្ងៃ​ពុធ​សប្តាហ៍​មុន បញ្ជា​ឲ្យ​កម្មករ​ដែល​ធ្វើ​កូដកម្ម​អស់​រយៈ​ពេល​ប្រហែល​បី​សប្តាហ៍​កន្លង​មក​នោះ វិល​ត្រឡប់​ចូល​ធ្វើ​ការងារ​ក្នុង​រយៈ​ពេល ៤៨ ម៉ោង​វិញ​ជា​កំហិត​ក៏​ដោយ។

កម្មការិនី យិន ជិនរឿន ដែល​ជា​តំណាង​កម្មករ​ដែល​មក​តវ៉ា​ទាម​ទារ​លក្ខខណ្ឌ​ការងារ​មួយ​ចំនួន រួម​មាន ទាំង​ប្រាក់​រង្វាន់​ការងារ​ទៀង​ទាត់ ១៥ ដុល្លារ​ផង បាន​និយាយ​ថា៖ «យើង​មិន​អាច​រង់​ចាំ​និយោជក​របស់​យើង​ចរចា​ជាមួយ​យើង​ទៀត​ទេ»។

កម្មការិនី​រូប​នេះ​បន្ត​ទៀត​ថា៖ «អ្នក​គ្រប់​គ្រង​រោងចក្រ​ពុំ​មាន​បំណង​បញ្ចប់​វិវាទ​រវាង​កម្មករ​និង​រោងចក្រ​ទេ»។

ទោះ​យ៉ាង​ណា​ក្តី លោក ង៉ែត រស្មី អ្នក​គ្រប់​គ្រង​រដ្ឋបាល​នៅ​រោងចក្រ Jiun Ye បាន​អះអាង​តប​ថា តំណាង​អ្នក​គ្រប់​គ្រង​រោងចក្រ​បាន​មក​អង្គុយ​ជជែក​ជាមួយ​តំណាង​និយោជិត​បី​លើក​រួច​មក​ហើយ ហើយ​លទ្ធផល​បាន​ត្រឹម​តែ​ខាង​តំណាង​កម្មករ​បដិសេធ និង​ដើរ​ចេញ​ពីការ​ចរចា​តែ​ប៉ុណ្ណោះ។

លោក ង៉ែត រស្មី បាន​បញ្ជាក់​បន្ថែម​ថា ក្រុម​ប្រឹក្សា​អាជ្ញា​កណ្តាល​នឹង​បិទ​សំណុំ​រឿង​រោងចក្រ​នេះ​មិន​ដោះ​ស្រាយ​ទេ ប្រសិន​បើ​ក្រុម​កម្មករ​មិន​វិល​ត្រឡប់​មក​ធ្វើ​ការងារ​វិញ​នៅ​ថ្ងៃ​អង្គារ​នេះ៕

អត្ថបទគួរចាប់អារម្មណ៍