ភ្នំពេញៈ កម្មការិនីពីរនាក់នៅរោងចក្រ Nex-t Apparel ក្នុងខណ្ឌដង្កោ រាជធានីភ្នំពេញត្រូវខាងរោងចក្របញ្ឈប់ពីការងារភ្លាមៗ ព្រោះតែពួកគេរៃលុយយកទៅទិញទឹកសុទ្ធឲ្យកម្មករនៅរោងចក្រ SL ដែលកំពុងធ្វើការតវ៉ាក្រោមកម្តៅថ្ងៃ។
កម្មការិនី យិន ផាន់ណា វ័យ២១ឆ្នាំ ដែលត្រូវបញ្ឈប់ពីការងារកាលពីល្ងាចថ្ងៃពុធ បានឲ្យដឹងថា កម្មករប្រហែល១ពាន់នាក់នៅរោងចក្រ Nex-t Apparel បាននាំគ្នាតវ៉ាឲ្យនាងនិងមិត្តរួមការងារ ចាន់ ស្រីមុំ អាយុ ២៣ ឆ្នាំ ឲ្យថៅកែទទួលឲ្យបានចូលធ្វើការវិញ។
កញ្ញា ផាន់ណា និយាយថា៖« មន្ត្រីរោងចក្របានឃើញលិខិតដែលខ្ញុំសរសេរសុំឲ្យកម្មករបរិច្ចាគ លុយខ្លះ ដើម្បីជួយដល់អ្នកតវ៉ានៅរោងចក្រ SL។ បន្ទាប់មកមន្ត្រីក្រុមហ៊ុនបីនាក់ បានហៅយើងចូលក្នុងបន្ទប់គេ បង្ខំស៊ីញ៉េលើលិខិតបណ្ដេញចេញ ទោះខំអង្វរក៏គេមិនព្រម»។
កញ្ញា ផាន់ណា បន្ថែមថា នាងឃើញកម្មករនៅរោងចក្រ SL ឈរនៅខាងក្រៅរោងចក្រតវ៉ាជាច្រើនថ្ងៃហើយក្រោមកម្តៅថ្ងៃហែង។ នាងក៏មានគំនិតសុំប្រាក់ខ្លះៗ តាមលិខិតថា «សូមជួយជាថវិកាដើម្បីជួយកម្មករនៅរោងចក្រ SL1-SL2»។
ផាន់ណា អះអាងថា៖«ខ្ញុំប្រមូលបានប្រាក់ ៤៥.៦០០ រៀល ខ្ញុំចំណាយខ្លះទិញទឹកសុទ្ធបានបីយួរ ហើយបានផ្តល់ទឹកនិងលុយនៅសល់នោះឲ្យទៅកម្មករនៅរោងចក្រ SL។ បន្ទាប់មកខ្ញុំ និងមិត្តរួមការងារ ស្រីមុំ ក៏ត្រូវគេបណ្ដេញចេញភ្លាមៗតែម្តង។ វាមិនយុត្តិធម៌ទេ យើងគ្មានកំហុសទេ វាគឺជាសន្ដានចិត្តរបស់ពួកយើងចំពោះកម្មករដូចគ្នា»។
នាង បន្តថា ពួកនាងបានសុំទោសអ្នកគ្រប់គ្រងដែរតែពួកគេមិនស្ដាប់ទេ ហើយគេបង្ខំឲ្យចុះហត្ថលេខាលើលិខិតបញ្ឈប់នេះ និងបើកប្រាក់ខែចំនួន២០ថ្ងៃ ក្នុងខែថ្មីនេះឲ្យនាង។
កញ្ញា ផាន់ណា និយាយថា៖« កម្មករទាំងអស់មិនអាចទទួលយកនូវអ្វីដែលក្រុមហ៊ុនបានធ្វើលើ ខ្ញុំនេះឡើយ ទើបពួកគេដើរចេញពីការងារធ្វើការតវ៉ានៅក្រៅរោងចក្រនេះទាមទារ ឲ្យក្រុមហ៊ុនទទួលយកពួកយើងពីរនាក់ចូលធ្វើការវិញ»។
លោក ណី ប៊ុនធឿន មន្ត្រី សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខៅឌូ) បានឲ្យដឹងថា កម្មករនៅរោងចក្រ Nex-t Apparel បានស្នើឲ្យសហជីពស៊ីខៅឌូជួយធ្វើអន្តរាគមន៍ដល់កម្មករពីរនាក់ដែល ត្រូវបណ្ដេញចេញនេះ។
លោក ប៊ុនធឿន ឲ្យដឹងថា៖«ពួកគេបាន ផ្ញើលិខិតទៅសហជីពស៊ីខៅឌូសុំឲ្យជួយអន្តរាគមន៍ដល់ពួកគេ។ កម្មករនៅរោងចក្រ SL មិនពេញចិត្តនឹងអ្វីដែលរោងចក្រ Nex-t Apparel បានបណ្ដេញកម្មករពីរនាក់នេះទេ និងបានធ្វើការតវ៉ាផងដែរ»។
លោក ណី ប៊ុនធឿន បញ្ជាក់ថា ទង្វើរបស់កញ្ញា ផាន់ណា និងស្រីមុំ មិនបានរំខានចង្វាក់ផលិតកម្មរបស់រោងចក្រឬរំខានការងារ របស់កម្មករផ្សេងឡើយ ពួកគេគ្រាន់តែមានប្រអប់មួយ រួចបញ្ជូនតៗគ្នាពីម្នាក់ទៅម្នាក់ដើម្បីដាក់លុយក្នុង ប្រអប់។
លោក ប៊ុនធឿន បានអះអាងថា៖«ពួកគេមិនដើរចុះឡើងនៅក្នុងពេលធ្វើការដែល នាំឲ្យរំខានដល់ការងារអ្នកផ្សេងឡើយ។ ខ្ញុំគិតថា អ្វីដែលខាងរោងចក្រ Nex-t Apparel បានធ្វើនេះហាក់ដូចជារើសអើង និងជាការគំរាមដល់កម្មករនៅពេលពួកគេគ្រាន់តែជួយគ្នាតែប៉ុណ្ណោះ»។
បន្ទាប់ពីជួបអ្នកតំណាងក្រុមហ៊ុននិង មន្ត្រីសហជីពអស់ជាច្រើនម៉ោង ខាងរោងចក្រ Nex-t Apparel បានយល់ព្រមទទួលកម្មការិនីទាំងពីរនាក់ឲ្យចូលធ្វើការងារវិញ តែកម្មករទាមទារលក្ខខណ្ឌ១០ចំណុចទៀត រួមមានឲ្យបណ្ដេញប្រធានផ្នែកជនជាតិចិនម្នាក់ចេញ និងទារប្រាក់បាយថ្ងៃត្រង់ ជាដើម។
ភ្នំពេញ ប៉ុស្តិ៍ បានព្យាយាមទាក់ទងទៅក្រុមហ៊ុន Nex-t Apparel តាមលេខទូរស័ព្ទនៅលើគេហទំព័ររោងចក្រ ប៉ុន្តែស្ត្រីម្នាក់បានឆ្លើយតបមកថា នាងមិនបានធ្វើការនៅរោងចក្រនេះទេ ហើយក៏បិទទូរស័ព្ទវិញ។
ជាមួយគ្នាផងដែរ កម្មករនៅរោងចក្រ SL បាននាំគ្នាបិទផ្លូវលេខ៣៧១ និងចាក់ចម្រៀងរាំលេងនៅពេលអ្នកតំណាងនិងមន្ត្រីក្រុម ហ៊ុននឹងបន្តជួបគ្នាម្ដងទៀត នៅក្រសួងសង្គមកិច្ចនៅ ថ្ងៃសុក្រនេះ៕ PN
