ភ្នំពេញៈ ក្រុមកម្មករនៅរោងចក្រ Pine Great (Cambodian) Garment នៅក្នុងខណ្ឌមានជ័យរាជធានីភ្នំពេញបាននាំគ្នាធ្វើកូដកម្មបិទផ្លូវបីថ្ងៃមកហើយបន្ទាប់ពីភាគីក្រុមហ៊ុនបានក្បត់សន្យាមិនព្រមបើកប្រាក់ខែឲ្យតាំងតែពីថៅកែបានរត់គេចខ្លួនកាលពីដើមខែនេះ។
អ្នកស្រី ផៃ តារា ជាមន្ត្រីសហជីពសេរីកម្មករនៅរោងចក្រកាត់ដេរ Pine Great បានឲ្យដឹងពីម្សិលមិញថា ក្រុមកម្មករបានប្រមូលផ្ដុំនៅរោងចក្រកាលពីថ្ងៃសុក្ររង់ចាំបើកប្រាក់ឈ្នួលរបស់ខ្លួនដែលតំណាងក្រុមហ៊ុនបានសន្យាថា នឹងបើកឲ្យពួកគេ តែកម្មករបានខកចិត្តជាខ្លាំងដោយសារពុំមានអ្នកមកបើកប្រាក់ឲ្យហើយក៏នាំគ្នាធ្វើកូដកម្មបិទផ្លូវភ្លាមៗ។
អ្នកស្រីបន្តថា៖ «កម្មករបានព្រមព្រៀងគ្នាបើកផ្លូវឲ្យមានចរាចរណ៍ឡើងវិញនៅម៉ោង១១ព្រឹកមិញនេះ នៅពេលដែលតំណាងក្រុមហ៊ុនមកប្រាប់ពួកយើងថា នឹងទទួលបានប្រាក់ខែក្នុងពេលឆាប់ៗអាចនៅក្នុងសប្ដាហ៍នេះ»។
អ្នកស្រី ផៃ តារា លើកឡើងថា ក្រុមកម្មករជឿទុកចិត្តមន្ត្រីទាំងនេះព្រោះគេបានធ្វើបញ្ជីឈ្មោះនិងស្រង់រយៈពេលកម្មករធ្វើការនៅក្នុងរោងចក្រនេះរួចហើយ។
អ្នកស្រីអះអាងថា៖«យើងទាមទារឲ្យគេផ្ដល់ប្រាក់ខែនិងប្រាក់អត្ថប្រយោជន៍ផ្សេងៗទៀត ចំនួន៥ចំណុច។ យើងគ្មានជម្រើសអ្វីក្រៅតែពីបិទផ្លូវដើម្បីទាមទារទេព្រោះយើងគិតថា រដ្ឋាភិបាលនឹងស្ដាប់ឮពីបញ្ហាពួកយើងហើយពួកយើងនឹងទទួលបានដំណោះស្រាយភ្លាមៗ»។
ក្រុមកម្មករបានចូលធ្វើការនៅក្នុងរោងចក្រ Pine Great (Cambodian) Garment នេះ ចន្លោះពី៦ខែដល់១០ខែ។
លោក ផល សុធា អ្នកគ្រប់គ្រងរដ្ឋបាលរោងចក្រ Pine Great មិនអាចទាក់ទងសុំការបំភ្លឺបានទេកាលពីម្សិលមិញ។ រីឯក្រុមកម្មករនៅតែបន្តយាមការពារនៅខាងមុខរោងចក្រ ខ្លាចក្រែងមានអ្នកលួចដឹកសម្ភារនៅក្នុងរោងចក្រយកចេញ៕ PN
