The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​រោងចក្រ SL ដែល​បណ្តេញ​ចេញ​ត្រឡប់​ធ្វើ​ការ​វិញ

កម្មករ​រោងចក្រ SL ដែល​បណ្តេញ​ចេញ​ត្រឡប់​ធ្វើ​ការ​វិញ

កម្មករ​រោងចក្រ SL ដែល​បណ្តេញ​ចេញ​ត្រឡប់​ធ្វើ​ការ​វិញ

130906_01
កម្មករ-កម្មការិនីរោងចក្រ SL ដើរតវ៉ាមកសាលារាជធានីភ្នំពេញ កាលពីថ្ងៃព្រហស្បតិ៍ម្សិលមិញ ដើម្បីទាមទារឲ្យក្រុមហ៊ុនផ្ដល់ប្រាក់៥ចំណុចដល់ពួកគេ ផា លីណា

ភ្នំពេញៈ ជា​លើក​ទីពីរ​ក្នុង​រយៈ​ពេល​ពីរ​សប្តាហ៍​កម្មករ​រោងចក្រ SL កំពុង​ត្រឡប់​ចូល​ធ្វើ​ការ​វិញ​បន្ទាប់​ពី​ការ​ធ្វើ​បាតុកម្ម​ទ្រង់​ទ្រាយ ធំ​មួយ​ក្នុង​រាជធានី​ភ្នំពេញ។

ឈិន សៅ អ្នក​គ្រប់​គ្រង​រដ្ឋបាល​នៅ​រោងចក្រ SL បាន​ថ្លែង​ថា៖ «យើង​នឹង​អនុញ្ញាត​ឲ្យ​កម្មករ​ដែល​ត្រូវ​បាន​បណ្តេញ​ត្រឡប់​ចូល​ធ្វើ​ការ​វិញ​នៅ​ថ្ងៃ​នេះ។ ប្រសិន​បើ​ពួក​គេ​ត្រឡប់​មក​ធ្វើ​ការ​វិញ ប៉ុន្តែ​បើ​មិន​ធ្វើ​ការងារ​យើង​នឹង​បណ្តេញ​ពួក​គេ​ចេញ​ម្តង​ទៀត»។

បាតុកម្ម​ដែល​មាន​កម្មករ​ចំនួន​ប្រមាណ​ជា ៤០០០ នាក់​នៅ​មុខ​សាលា​រាជធានី​ភ្នំពេញ ពី​ម្សិលមិញ​បាន​ធ្វើ​ឲ្យ​ស្ទះ​ចរាចរណ៍​នៅ​លើ​មហាវិថី ព្រះមុនីវង្ស ខណៈ​ដែល​កម្មករ​រោងចក្រ SL ឈរ​ពាស​ពេញ​ផ្លូវ។

កម្មករ​បាន​នាំ​គ្នា​ស្រែក​ឲ្យ​មាន​ដំណោះស្រាយ​ចន្លោះ​ពី​សាលា​រាជធានី​ភ្នំពេញ​និង​សណ្ឋាគារ ឡឺរ៉ូយ៉ាល់​ដែល​ជា​កន្លែង​តំណាង​ម៉ាក​សម្លៀកបំពាក់​ចំនួន ២៥ បាន​មក​ជួប​ប្រជុំ​គ្នា​ដើម្បី​ពិភាក្សា​បញ្ហា​ឧស្សាហកម្ម​នេះ រួម​ទាំង​បញ្ហា​ប្រាក់​ឈ្នួល​និង​បញ្ហា​កូដកម្ម។

ការ​តវ៉ា​កាល​ពី​ម្សិលមិញ​បាន​ធ្វើ​ឡើង​បន្ទាប់​ពី​មាន​ការ​ប្រកាស​មួយ​ពី​អ្នក​គ្រប់​គ្រង​រោងចក្រ SL ថា កម្មករ​ជាង ៧០០ នាក់​ត្រូវ​បាន​បណ្តេញ​ចេញ ក្នុង​រយៈ​ពេល​មិន​ដល់​មួយ​សប្តាហ៍​បន្ទាប់​ពី​កម្មករ​ទាំង​នោះ​បាន​ត្រឡប់​ចូល​ធ្វើ​ការ​វិញ​ក្រោយ​ពី​កូដកម្ម​រយៈ​ពេល​ពីរ​សប្តាហ៍។ រោងចក្រ SL ជា​រោងចក្រ​ផ្គត់​ផ្គង់​សម្លៀក​បំពាក់​ឲ្យ​អ្នក​បញ្ជា​ទិញ Gap, Levis និង H&M។

លោក អាត់ ធន់ ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា ហៅ​កាត់​ថា ស៊ីខៅឌូ បាន​ថ្លែង​ថា រោងចក្រ SL បាន​បណ្តេញ​កម្មករ​តែ ៧២០ នាក់​ដើម្បី​ជា​ការ​បំភិត​បំភ័យ​កម្មករ​ខណៈ​សមាជិក​សហជីព​កំពុង​ប្រមូល​ផ្តុំ​ក្រុម​កម្មករ​តវ៉ា​ជាមួយ​នឹង ការ​និយាយ​ពី​ឧបករណ៍​បំពង​សំឡេង​ដែល​ចង​នៅ​លើ​រឺម៉ក​កង់​បី​នៅ​កណ្តាល​ផ្លូវ។

លោក អាត់ ធន់ បាន​ថ្លែង​មុន​ពេល​ដើរ​ចូល​ទៅ​ក្នុង​សាលា​រាជធានី​ភ្នំពេញ​ដើម្បី​ការ​ចរចា​ថា៖ «ពួគេ​ចង់​ឲ្យ​កម្មករ​មាន​អារម្មណ៍​ភ័យ​ខ្លាច»។

លោក គង់ អាទិត្យ អនុ​ប្រធាន ស៊ីខៅឌូ បាន​ថ្លែង​ថា កម្មករ​នៅ​រោងចក្រ SL ត្រូវ​បាន​បណ្តេញ​ចេញ​នៅ​ថ្ងៃ​ពុធ។ លោក​បន្ត​ថា កម្មករ​មួយ​ចំនួន​ដែល​បាន​ត្រឡប់​ទៅ​ធ្វើ​ការ​វិញ​កាល​ពី​ថ្ងៃ​សុក្រ សប្តាហ៍​មុន បាន​ឃើញ​ថា កន្លែង​ធ្វើ​ការងារ​របស់​ពួក​គេ​មិន​អាច​ធ្វើ​ការងារ​បាន​ឬ​គ្មាន ភ្លើង​អគ្គិសនី ហើយ​បន្ទាប់​មក​ពួក​គេ​ត្រូវ​បាន​បណ្តេញ​មិន​ឲ្យ​ធ្វើ​ការងារ​តាម តួនាទី​របស់​ពួក​គេ។

សៅ បាន​បដិសេធ​ចំពោះ​ការ​ចោទ​ប្រកាន់​នេះ ដោយ​អះអាង​ថា កម្មករ​បាន​មក​បង្ហាញ​តែ​ខ្លួន ប៉ុន្តែ​មិន​ព្រម​ធ្វើ​ការ។

នៅ​ពេល​រោងចក្រ SL ប្រកាស​បណ្តេញ​កម្មករ​ចេញ ពួក​គេ​បាន​និយាយ​ថា កម្មករ​នឹង​ទទួល​បាន​តែ​ប្រាក់​ខែ​ចុង​ក្រោយ​របស់​ខ្លួន​និង​ប្រាក់​បំណាច់​ឆ្នាំ។

អ្នក​នាង ធាន ស្រីភក្រ្ត អាយុ ១៨ ឆ្នាំ ជា​កម្មករ​នៅ​រោងចក្រ SL ដែល​ត្រូវ​បាន​បណ្តេញ​ចេញ បាន​ថ្លែង​នៅ​ពេល​តវ៉ា​នោះ​ថា៖ «និយោជក​ចាត់​ទុក​យើង​ជា​ទាសករ​សម្រាប់​ពួក​គេ។ ពួក​គេ​ប្រើ​យើង​នៅ​ពេល​ពួក​គេ​ចង់​ប្រើ​យើង ប៉ុន្តែ​បន្ទាប់​មក​ពួក​គេ​ទាត់​យើង​ចេញ»។

លោក អាត់ ធន់ បាន​ថ្លែង​ថា អ្នក​គ្រប់​គ្រង​មាន​សិទ្ធិ​គ្រប់​យ៉ាង​ក្នុង​ការ​បណ្តេញ​កម្មករ​តាម ចិត្ត​របស់​ខ្លួន ប៉ុន្តែ​ពួក​គេ​ត្រូវ​ផ្តល់​សំណង​ទៅ​កម្មករ​ដែល​បណ្តេញ​ចេញ​នោះ​ឲ្យ​សម​ស្រប។

លោក David Welsh នាយក​ប្រចាំ​ប្រទេស នៃ​មជ្ឈមណ្ឌល​អាមេរិក ដើម្បី​សាមគ្គីភាព​ការងារ​អន្តរជាតិ​បាន​ថ្លែង​ថា ការ​ដក​ពាក្យ​បណ្តេញ​កម្មករ​ចេញ អាច​បញ្ចៀស​ហានិភ័យ​របស់​រោងចក្រ SL ដែល​អាច​ធ្វើ​ឲ្យ​អ្នក​បញ្ជា​ទិញ​អន្តរជាតិ​ឈប់​បញ្ជា​ទិញ​ពី​រោងចក្រ​របស់​ខ្លួន។ លោក​បន្ត​ថា ប៉ុន្តែ​ប្រសិន​បើ​ពួកគេ​បន្ត​ទិច​និក​ដៃ​ធ្ងន់​នេះ ហើយ​មិន​ព្រម​ធ្វើ​ការ​ចរចា​ជាមួយ​សហជីព ភាព​ចលាចល​នៅ​ក្រុមហ៊ុន​នេះ​ទំនង​នឹង​នៅ​បន្ត​មាន។

លោក David Welsh បាន​ថ្លែង​កាល​ពី​ម្សិលមិញ​ថា៖ «ខ្ញុំ​សង្ស័យ​ថា ប្រសិន​បើ​មិន​មាន​កិច្ច​ខិត​ខំ​ប្រឹង​ប្រែង​ចរចា​ដោយ​ស្មោះ​ត្រង់ វា​នឹង​មិន​មាន​ការ​ផ្លាស់​ប្តូរ​នោះ​ទេ»។

លោក ខេន លូ អគ្គ​លេខាធិការ​សមាគម​រោងចក្រ​កាត់ដេរ​នៅ​កម្ពុជា​បាន​ថ្លែង​ថា អ្នក​គ្រប់​គ្រង​រោងចក្រ SL នឹង​ចូល​មក​ជជែក​ជាមួយ ស៊ីខៅឌូ។

លោក បាន​ថ្លែង​បន្ត​ថា៖ «វា​នឹង​មាន​ការ​ចរចា​បន្ត​កិច្ច​ប្រជុំ​បន្ត ហើយ​យើង​នឹង​ឃើញ​ថា​តើ​កិច្ច​ប្រជុំ​នេះ​អាច​នឹង​ឈាន​ដំណោះស្រាយ​ណា​មួយ​ឬ​អត់?»។ PS

អត្ថបទគួរចាប់អារម្មណ៍