The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​រោងចក្រ SL ១ ពាន់​នាក់​ធ្វើ​កូដកម្ម

កម្មករ​រោងចក្រ SL ១ ពាន់​នាក់​ធ្វើ​កូដកម្ម

កម្មករ​រោងចក្រ SL ១ ពាន់​នាក់​ធ្វើ​កូដកម្ម

130820_06b
កម្មកររោងចក្រ SL ផ្តុំគ្នាធ្វើកូដកម្មតវ៉ាមុខរោងចក្រកន្លងមក ម៉ៃ វីរៈ

ភ្នំពេញៈ កម្មករ​ប្រមាណ ១ ពាន់​នាក់​នៅ​រោងចក្រ​មួយ​ក្នុង​ចំណោម​រោងចក្រ​ធំ​បំផុត​នៅ​អាស៊ី បាន​ចូល​រួម​ជាមួយ​កម្មករ​ជាង ៤ ពាន់​នាក់​ដែល​បាន​ចាប់​ផ្តើម​ធ្វើ​កូដកម្ម​កាល​ពី​សប្តាហ៍​មុន​ហើយ​សហជីព​បាន​ទាមទារ​ឲ្យ​រោងចក្រ​នេះ​បំពេញ​លក្ខខណ្ឌ ៩ ចំណុច រួម​ទាំង​ការ​កាត់​ម្ចាស់​ភាគ​ហ៊ុន​មួយ​ចេញ​ផង។

លោក ស៊ុត សៀម តំណាង​នៅ​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា ហៅ​កាត់ ស៊ីខៅឌូ ដែល​តំណាង​ឲ្យ​កម្មករ​រាប់​ពាន់​នាក់​នៅ​រោងចក្រ SL.1 និង SL.2 បាន​ថ្លែង​ថា កម្មករ​នៅ​រោងចក្រ SL.2 បាន​ដើរ​ចេញ​ពី​ការងារ​កាល​ពី​ម្សិលមិញ ហើយ​មក​ចូល​រួម​ជាមួយ​កម្មករ​នៅ​រោងចក្រ SL.1 ដែល​បាន​ផ្តើម​ធ្វើ​កូដកម្ម​រយៈ​មួយ​សប្តាហ៍​កន្លង​ទៅ។

លោក ស៊ុត សៀម បាន​បន្ត​ថា៖ «យើង​បាន​ទាមទារ​ប្រាក់​ឈ្នួល​អប្បបរមា​ចំនួន ១៥០ ដុល្លារ ទាមទារ​ប្រាក់ ៣ ដុល្លារ​សម្រាប់​ថ្លៃ​បាយ ហើយ​ទាមទារ​ឲ្យ​ក្រុមហ៊ុន បណ្តេញ​ម្ចាស់​ភាគ​ហ៊ុន​ឈ្មោះ មាស សុថា»។

សមាជិក​សហជីព ស៊ីខៅឌូ ដែល​ធ្វើ​ការ​នៅ​រោងចក្រ SL បាន​ចោទ​ប្រកាន់​ថា ទង្វើ​របស់​លោក មាស សុថា ដែល​នាំ​កង​រាជ​អាវុធហត្ថ​មក​ឈរ​យាម​នៅ​ក្នុង​រោងចក្រ​អស់​រយៈ​ពេល ៣ សប្តាហ៍​កន្លង​មក គឺជា​ការ​ព្យាយាម​បំភិត​បំភ័យ​ដល់​មន្រ្តី​សហជីព​របស់​ខ្លួន។

ទាំង លោក មាស សុថា និង លោក ឈិន សៅ អ្នក​គ្រប់​គ្រង​រដ្ឋបាល​នៅ​រោងចក្រ SL.2 បាន​ថ្លែង​ថា ក្រុម​មន្រ្តី​សហជីព​បាន​នាំ​គ្នា​បង្ខំ​កម្មករ​ឲ្យ​ចាក​ចេញ​ពី​ការងារ​ហើយ​អះអាង​ថា កូដកម្ម​ដែល​កំពុង​ធ្វើ​នេះ គឺជា​កូដកម្ម​ខុស​ច្បាប់។

លោក ឈិន សៅ បាន​ថ្លែង​បន្ត​ថា៖ «ពួក​គេ​បាន​ធ្វើ​ការ​តវ៉ា​ដោយ​មិន​ដាក់​លិខិត​ជម្រាប​មក​យើង​ឲ្យ​ដឹង​ជា​មុន។ វា​ជា​កូដកម្ម​ដែល​ខុស​ច្បាប់»៕ PS

អត្ថបទគួរចាប់អារម្មណ៍