The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​រោងចក្រ USA តវ៉ា ទាមទារ​ប្រាក់​បំណាច់​នៅ​ពេល​រោងចក្រ​បិទ​ទ្វារ

កម្មករ​រោងចក្រ USA តវ៉ា ទាមទារ​ប្រាក់​បំណាច់​នៅ​ពេល​រោងចក្រ​បិទ​ទ្វារ

កម្មករ​រោងចក្រ USA តវ៉ា ទាមទារ​ប្រាក់​បំណាច់​នៅ​ពេល​រោងចក្រ​បិទ​ទ្វារ

131217_06a
កម្មករតវ៉ាមុខរោងចក្រកន្លងមក

ភ្នំពេញៈ កម្មករ​រោងចក្រ​មួយ ដែល​បាន​បិទ​ទ្វារ​ឈប់​ដំណើរការ​បាន​ព្យាយាម​ធ្វើ​ការ​តវ៉ា ដើម្បី​ទាមទារ​ឲ្យ​រោងចក្រ​ទូទាត់​ប្រាក់​បំណាច់​ការងារ​ដល់​ពួក​គេ។

អ្នក​នាង ប៊ូ ណារិទ្ធិ អាយុ ៣២ឆ្នាំ បាន​ថ្លែង​តាម​ទូរស័ព្ទ​កាល​ពី​ម្សិលមិញ​ថា៖ «យើង​កំពុង​រក្សា​ភាព​ស្ងប់​ស្ងាត់​និង​កំពុង​រង់ចាំ​មន្រ្តី​សហជីព​និង​មន្រ្តី​រដ្ឋាភិបាល ស្វែង​រក​ដំណោះស្រាយ​ឲ្យ​យើង»។ «ប៉ុន្តែ​ភាព​អត់​ធ្មត់​របស់​យើង​មាន​កម្រិត យើង​មិន​អាច​នៅ​តែ​អត់​ធ្មត់​រហូត​បាន​ទេ»។

លោក វង្ស សុវណ្ណ អគ្គ​លេខាធិការ​រង​នៃ​គណៈកម្មការ​ដោះស្រាយ​បញ្ហា​កូដកម្ម បាតុកម្ម​នៅ​គ្រប់​មុខ​សញ្ញា​របស់​ក្រសួង ការងារ បាន​ថ្លែង​ថា មន្រ្តី​រដ្ឋាភិបាល​នៅ​ព្រឹក​នេះ​នឹង​ជួប​ប្រជុំ​ជាមួយ​តំណាង​កម្មករ និង​តំណាង​ក្រុមហ៊ុន USA Fully Field (Cambodia) Garment ដែល​កម្មករ​និយាយ​ថា បាន​បិទ​ទ្វារ​រោងចក្រ​ដោយ​មិន​បើក​ប្រាក់​ខែ​ដែល​ជំពាក់​កម្មករ។

វិវាទ​នេះ​បាន​ចាប់​ផ្តើម​ឡើង​នៅ​ពេល​កម្មករ​ចំនួន ២៧ នាក់​ពី​រោងចក្រ USA Garment រួម​ទាំង​អ្នក​នាង ណារិទ្ធិ បាន​ប្តឹង​ថា រោងចក្រ​នេះ ត្រូវ​បាន​លក់​ហើយ​អតីត​ម្ចាស់​រោងចក្រ​នេះ មិន​បាន​ទូទាត់​ប្រាក់​បំណាច់​ទៅ​តាម​ការ​ចែង​នៅ​ក្នុង​កិច្ច​សន្យា​របស់​ពួក​គេ។

លោក Dave Welsh នាយក​ប្រចាំ​ប្រទេស​នៃ​មជ្ឈមណ្ឌល​អាមេរិក​ដើម្បី​សាមគ្គីភាព​កម្មករ អន្តរជាតិ (ACILS) បាន​ថ្លែង​ថា កម្មករ​ទាំង ២៧ នាក់​បាន​អំពាវនាវ​ទៅ​អង្គការ​ក្រៅ​រដ្ឋាភិបាល​ដែល​មាន​មូលដ្ឋាន​នៅ ទីក្រុង វ៉ាស៊ីនតោន ឲ្យ​ជួយ​នៅ​ពេល​ពួក​គេ​ត្រូវ​បាន​ផ្តល់​ឲ្យ​នូវ​ប្រាក់​ចំនួន ៦០០ ដុល្លារ​សម្រាប់​កម្មករ​កិច្ចសន្យា មិន​មាន​ថេរ​វេលា​កំណត់​និង ១០០ ដុល្លារ​សម្រាប់​អ្នក​មាន​កិច្ច​សន្យា​ការងារ​កំណត់។ ចំនួន​ប្រាក់​ទាំង​នេះ​គឺ​តិច​ជាង​ប្រាក់​បំណាច់​ដែល​ពួក​គេ​ត្រូវ​ទទួល​បាន។

លោក វង្ស បាន​ថ្លែង​ថា៖ «ព័ត៌មាន​ថ្មីៗ​ដែល​យើង​ឮ គឺ​ថា ម្ចាស់​ថ្មី ដែល​មាន​មូលដ្ឋាន​នៅ​ប្រទេស អ៊ីតាលី បាន​ឃើញ​ស្ថានភាព​នៅ​រោងចក្រ​មិន​ល្អ​ហើយ​បាន​ត្រឡប់​ទៅ​ស្រុក​វិញ»។

លោក បន្ត​ថា រោងចក្រ​នេះ​ដែល​ផ្គត់​ផ្គង់​ទៅ​ឲ្យ​អ្នក​បញ្ជា​ទិញ Joe Fresh ដែល​មាន​មូលដ្ឋាន​នៅ​ទីក្រុង Toronto និង​អ្នក​បញ្ជា​ទិញ LA Gear ដែល​មាន​មូលដ្ឋាន​នៅ​ទីក្រុង Los Angeles មិន​ទាន់​បិទ​ជា​ផ្លូវ​ការ​នៅ​ឡើយ​ទេ ប៉ុន្តែ​ឈប់​ដំណើរការ​ប្រហែល ៣ ខែ​ហើយ។

តំណាង​រោងចក្រ USA Garment មិន​អាច​ទាក់​ទង​សុំ​អត្ថាធិប្បាយ​បាន​ទេ កាល​ពី​ម្សិលមិញ។ អ្នក​បញ្ជា​ទិញ Joe Fresh និង LA Gear មិន​ឆ្លើយ​តប​នឹង​សំណួរ​តាម​អ៊ីមែល​ទេ។

លោក ស្រៀង ណារិទ្ធ អនុ​ប្រធាន​សហព័ន្ធ​សហជីព​សេដ្ឋកិច្ច​កម្មករ​កម្ពុជា បាន​ថ្លែង​ថា ចំនួន​ប្រាក់​អតីតភាព​និង​អត្ថ​ប្រយោជន៍​ដទៃៗ​ទៀត ដែល​រោងចក្រ​ជំពាក់​កម្មករ​ចំនួន ៤២០ នាក់​គឺ​មាន​ចំនួន​ពី ៣០០ ដុល្លារ ទៅ ៣០០០ ដុល្លារ។

លោក ណារិទ្ធ បាន​ស្នើ​សុំ​រដ្ឋាភិបាល​ឲ្យ​ចាប់​ផ្តើម​លក់​ទ្រព្យ​សម្បត្តិ​របស់​ក្រុមហ៊ុន ដើម្បី​ទូទាត់​ប្រាក់​បំណាច់​ដល់​កម្មករ ប៉ុន្តែ​លោក សុវណ្ណ បាន​ថ្លែង​ថា រដ្ឋាភិបាល​នៅ​កំពុង​ព្យាយាម​ចរចា​ជាមួយ​រោងចក្រ USA Garment ៕ PS

អត្ថបទគួរចាប់អារម្មណ៍