The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​រោង​ចក្រ​យ៉ុងវ៉ា​ទទួល​បាន​ប្រាក់​ខែ




កម្មករ​រោង​ចក្រ​យ៉ុងវ៉ា​ទទួល​បាន​ប្រាក់​ខែ

កម្មករ​រោង​ចក្រ​យ៉ុងវ៉ា​ទទួល​បាន​ប្រាក់​ខែ

130215_05
ក្រុមកម្មកររោងចក្រយ៉ុងវ៉ា នៅក្រុងតាខ្មៅ ខេត្តកណ្តាល ពេលធ្វើកូដកម្មបិទផ្លូវជាតិលេខ២១ ផា លីណា

កណ្តាលៈ កម្មករ​ជាង​៧០០០​នាក់​នៅ​រោងចក្រ​យ៉ុងវ៉ា​ដែល​មាន​ទីតាំង​នៅ​ក្រុង​តាខ្មៅ​ ខេត្ត​កណ្តាល​ដែល​បាន​ធ្វើ​ការ​តវ៉ា ដោយ​បាន​បិទ​ផ្លូវ​លេខ​២១​បេ​រយៈ​ពេល​២​ថ្ងៃ​មក​ហើយ​នោះ​ បាន​យល់​ព្រម​បើក​ផ្លូវ​ឲ្យ​ធ្វើ​ចរាចរ​ជា​ធម្មតា​វិញ​ហើយ​កាល​ពី​ព្រឹក​ ម្សិលមិញ​​នេះ​ បន្ទាប់​ពី​ពួក​គេ​ទទួល​ព័ត៌មាន​ថា​ប្រាក់​ខែ​សម្រាប់​ខែ​មករា​ នឹង​ត្រូវ​បាន​បើក​នៅ​ថ្ងៃ​សុក្រ​នេះ។

លោក អ៊ុំ វិសាល មន្រ្តី​ដោះស្រាយ​វិវាទ​នៃ​សហជីព​ស៊ីខៅឌូ​បាន​មាន​ប្រសាសន៍​ថា កម្មករ​បាន​ដើរ​ចេញ​ពី​លើ​ផ្លូវ​ហើយ​ បន្ទាប់​ពី​មន្រ្តី​មន្ទីរ​ការងារ​បាន​ប្រាប់​ពួក​គេ​ថា​ ប្រាក់​ខែ​ប្រចាំ​ខែ​មករា​នឹង​ត្រូវ​បើក​នៅ​ថ្ងៃ​សុក្រ នេះ​តែ​ម្តង​។​

លោក បាន​បន្ថែម​ថា​៖ «មន្ត្រី​ការ​ងារ​បាន​និយាយ​ថា​ រាជរដ្ឋាភិបាល​បាន​រៀបចំ​ថវិកា​សម្រាប់​កម្មករ​ហើយ ហើយ​ពួក​គេ​អាច​នឹង​ទទួល​បាន​នៅ​ថ្ងៃ​ស្អែក​នេះ »។

លោក​បាន​បន្ត​ថា ខណៈ​ពេល​នេះ​ដែរ គណៈ​កម្មការ​ចម្រុះ​ក៏​កំពុង​ចុះ​មក​ពិនិត្យ​មើល​សម្ភារ​នៅ​ក្នុង​រោង​ចក្រ និង​ធ្វើ​ការ​គិត​មើល​ទៅ​លើ​តម្លៃ​របស់​វា មុន​ពេល​ដាក់​លក់​ឡៃ​ឡុង។

លោក អ៊ុំ វិសាល​បាន​បន្ថែម​ថា​៖​ «សម្ភារ និង​ផលិតផល​ដែល​បន្សល់​នៅ​ក្នុង​រោង​ចក្រ​មាន​ប្រហែល​ជា​៥០%​តែ​ប៉ុណ្ណោះ»។

អ្នក​នាង​សុខ ផល្លា​ តំណាង​កម្មករ​ បាន​និយាយ​ថា​ កម្មករ​យល់​ព្រម​ទទួល​យក​ប្រាក់​ខែ​របស់​គេ​ដែល​ផ្តល់​ដោយ​រាជរដ្ឋាភិបាល​នេះ​ដោយ​មិន​អស់​ចិត្ត​ ព្រោះ​ពួក​គេ​មិន​ចង់​បាន​លុយ​ពី​រដ្ឋាភិបាល​ទេ គេ​ចង់​បាន​លុយ​របស់​ថៅ​កែ​រោងចក្រ។

អ្នក​នាង សុខ ផល្លា​បាន​បន្ត​ថា​៖​ «កម្មករ​រអ៊ូថា​ ពួក​គេ​ខំ​ប្រឹង​ធ្វើ​ការ​ឲ្យ​ថៅ​កែ​ ចុះ​ហេតុអី​បាន​ជា​រាជរដ្ឋាភិបាល​ជា​អ្នក​ចេញ​លុយ​ ជំនួស​ថៅកែ​ទៅ​វិញ»។

អ្នក​នាង​បន្ថែម​ថា​ កម្មករ​ព្រម​ទទួល​យក​ដោយ​បង្ខំ​ទេ​ ដោយ​សារ​តែ​ពួក​គេ​ត្រូវ​ការ​ចំណាយ​សម្រាប់​ជីវភាព​ និង​ថ្លៃ​លើ​ការ​ចំណាយ​ឲ្យ​ផ្ទះ​ជួល​ និង​ឡាន។​

អ្នក​ស្រី ផល្លា​ ថា ជា​ជំហាន​បន្ទាប់​ក្រុម​កម្មករ​នឹង​បន្ត​ធ្វើ​ការ​ទាម​ទារ​នូវ​ប្រាក់​អត្ថប្រយោជន៍​ផ្សេងៗ​ទៀត។

សូម​រំឭក​ថា​ កាល​ពី​ថ្ងៃ​ទី​១២ ខែ​កុម្ភៈ ឆ្នាំ​២០១៣ កម្មករ​ប្រមាណ​៧០០០​នាក់​ បាន​នាំ​គ្នា​សម្រេច បិទ​ផ្លូវ​ជាតិ​លេខ​២១​ បេ ដើម្បី​ធ្វើ​ការ​តវ៉ា​ទាមទារ​ប្រាក់​ខែ​របស់​ពួក​គេ​ពី​ថៅកែ​រោង ចក្រ​ដែល​ពុំ​បាន​បើក​ចាប់​តាំងពី​ខែ​មករា កន្លង​មក​៕

អត្ថបទគួរចាប់អារម្មណ៍