The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​រោង​ចក្រ​ SL Gament ដួ​ល​សន្លប់​ពី​រថ្ងៃ​ជាប់​​​​គ្នា​




កម្មករ​រោង​ចក្រ​ SL Gament ដួ​ល​សន្លប់​ពី​រថ្ងៃ​ជាប់​​​​គ្នា​

កម្មករ​រោង​ចក្រ​ SL Gament ដួ​ល​សន្លប់​ពី​រថ្ងៃ​ជាប់​​​​គ្នា​

130325_07
កម្មការិនីរោងចក្រកាត់ដេរដែលដួលសន្លប់ក្នុងរោងចក្រពេលនាំមកសង្គ្រោះពេលកន្លងមក ហុង មិនា

ភ្នំពេញៈ កម្មករ​កាត់​ដេរ​​ជាង​៩០​នាក់​នៅ​ឯ​រោង​ចក្រ​ SL Garment Processing (Cambodia) នៅ​ខណ្ឌ​មាន​ជ័យ រាជ​ធានី​ភ្នំពេញ​ បាន​ដួល​សន្លប់​​ពី​រថ្ងៃ​ជាប់​គ្នា​នា​ចុង​សប្តាហ៍​មុន ដោយ​​មន្រ្តី​សហ​ជីពនិងក្រុមហ៊ុន​បានអះអាង​​ខុស​គ្នាពី​មូលហេតុ​សន្លប់​នេះ​។​

លោក អ៊ុំ វិសាល​ មន្រ្តី​ដោះ​ស្រាយ​វិវាទ​ការងារ​នៃ​សម្ព័ន្ធ​សហ​ជីព​ប្រជា​ធិបតេយ្យ​កម្មករ​កាត់​ដេរ​កម្ពុជា ហៅ​​ ស៊ី​ខៅ​ឌូ ​បានឲ្យ​ដឹង​​ថា មាន​កម្មករ​២០​នាក់​​ដួល​សន្លប់​ពី​ថ្ងៃ​សុក្រ ហើយ​ជាង​​៧០​នាក់​ទៀតសន្លប់​នៅ​ថ្ងៃ​សៅរ៍​។

លោកបន្ត​ថា​៖ «​ខ្ញុំបាន​​ចុះ​ទៅ​រោង​​ចក្រ​នេះ​ពី​ថ្ងៃ​ម្សិល​មិញ នៅ​ពេល​ដែល​កម្មករ​សន្លប់។ ខ្ញុំធុំក្លិន​មិន​​ល្អ ទោះ​​ខ្ញុំ​ឈរ​នៅ​មុខ​រោងចក្រ​​ក៏​ដោយ។ វាពិបាក​ដក​​ដង្ហើម ហើយ​ឈឺ​ក្បាល​ណាស់​»​។

លោក អ៊ុំ វិសាល ​​​ប្រាប់​ថា​៖«​​​តាម​ការ​សន្និដ្ឋាន​បឋម​របស់​យើង​​​មូល​ហេតុ​ដែល​នាំ​ឲ្យ​កម្មករ​សន្លប់​គឺ​ក្រុម​ហ៊ុន បាន​ដាក់​ថ្នាំ​គីមី​ក្នុង​ទឹក​​ធ្វើឲ្យទឹក​ថ្លា​សម្រាប់​ឲ្យ​កម្មករ​លាង​ដៃ លុប​មុខ និងបឺត​ចូល​ក្នុង​កង្ហារ​ធ្វើ​ឲ្យ​វា​ត្រជាក់​នៅ​​កន្លែង​ធ្វើ​ការ​ ប៉ុន្តែ​មិនមែន​​​សម្រាប់​ផឹក​ទេ​។ ក្លិន​អាក្រក់​នេះ ​​ចេញ​ពី​កង្ហា​​រទឹក​ទើប​​បណ្តាល​ឲ្យ​កម្មករ​ឈឺ​ក្បាល ក្អួត ហើយ​ខ្លះ​សន្លប់»​។

លោក​បន្ត​​ថា ការ​សន្លប់​នេះ កើត​ឡើង​លើ​កម្មករ​កាត់​ដេរ​ជា​ច្រើនលើកច្រើនសា ដែល​ជា​ក្តី​បារម្ភ​ដល់កម្មករ​ ​និងចាំបាច់​តម្រូវ​ឲ្យ​រដ្ឋា​ភិបាល និង​ក្រុម​ហ៊ុន​​​យក​ចិត្ត​ទុក​ដាក់ជា​មួយ​នឹង​​រឿង​នេះ​ដើម្បី​ជួយសុខ​ភាព​របស់​គេ​។

នាង ថុល សាវ៉ាន វ័យ ​២១​ឆ្នាំ បាន​ចេញ​ពី​​ពេទ្យ​កាល​ពី​ម្សិល​​មិញ​ ប៉ុន្តែ​សុខភាពនាងមិន​ទាន់​បាន​ស្រួល​ខ្លួន​នៅ​ឡើយ​ទេ​។

នាងអះ​អាង​ថា​៖«​ខ្ញុំអស់​កម្លាំង​ណាស់ ហើយ​ឈឺ​ក្បាល​ទៀត​។ ខ្ញុំ ក្អួត មុន​​ពេល​ខ្ញុំសន្លប់​ កាល​ពី​ថ្ងៃ​សៅរ៍​នៅ​ក្នុង​​រោង​​ចក្រ​»​។ នាងបញ្ជាក់​ថា កាល​ពី​ថ្ងៃ​សុក្រ នាង​ឃើញ​មិត្ត​រួម​ការ​ងារ​​​​​សន្លប់​​នៅ​កន្លែង​ធ្វើ​ការ ហើយ​ប្តីនាង ​ឃាត់កុំ​​ឲ្យ​ទៅ​ធ្វើ​ការ​ពីថ្ងៃ​​​​សៅ​រ៍​​ប៉ុន្តែ​​នាង​​មិន​​​ស្តាប់​​ប្តី​​ទេ​។

នាង​បញ្ជាក់​ថា តាម​ស្ថាន​ភាព​សុខ​ភាព​ នាងនឹង​​ទៅ​ធ្វើ​ការ​វិញ​នៅ​ថ្ងៃ​​​ចន្ទ ប៉ុន្តែ​ មិន​ដឹងថា​តើ ក្លិន​នោះបាត់​​ឬ​នៅធុំនៅ​ឡើយ​​ទេ​​។

អ្នកនាង សួង សោភ័ណ្ឌ មន្រ្តី​រដ្ឋ​បាល​រោងចក្រ SL Garment Processing បាន​ឲ្យ​ដឹង​ពី​ថ្ងៃ​ម្សិល​មិញ​ថា កម្មករ​ត្រូវ​តែមក​ធ្វើ​ការ​ ប៉ុន្តែ​នឹង​អនុញ្ញាត​ឲ្យ​ទៅ​ផ្ទះ​វិញ បើ​សុខ​ភាព​មិន​ទាន់​ល្អ​។

នាងបញ្ជាក់​ថា​៖ «​យើងនឹង​ពិនិត្យ​​មើល​ស្ថា​ន​ភាព​ពិត​​ចំពោះ​សុខ​ភាព​របស់​កម្មករ​ ប្រសិនពួក​គេ​មិន​អាច​ធ្វើ​ការ​បាន​ យើងនឹង​​អនុ​ញ្ញាត​ឲ្យ​​​គេ​ទៅ​ផ្ទះ​វិញ​។ យើង មិន​បង្ខំ​ឲ្យ​ពួក​គេ​ធ្វើ​ការ​ទេ​»​។ នាង សួង សោភ័ណ្ឌ ​ថ្លែង​ថា មូល​ហេតុ​ដែល​​បណ្តាល​ឲ្យ​​កម្មករ​សន្លប់ មិន​មែន​មក​ពី​រោង​ចក្រ​ទេ ប៉ុន្តែ​​ គឺមកពីកម្មករ​ខ្លួន​ឯង​។

នាងអះអាង​ថា​៖ «​ក្រុម​វេជ្ជបណ្ឌិត​ ​ប្រាប់​ខ្ញុំ​ថា ពួក​គេសន្លប់​មក​ពី​សុខ​ភាព​ពួក​គេខ្សោយ មិន​បាន​ញ៉ាំ​​អាហារ​ពេល​ព្រឹក ​ដែល​​​​​ធ្វើ​ឲ្យ​ពួក​គេ​ខ្សោយ ហើ​យ​​សន្លប់​។ រោង​ចក្រមិន​មាន​​ធុំក្លិន​​ដូច​អ្វី​ដែល​គេនិយាយ​​ទេ បើ​រោង​ចក្រ​ធ្វើ​ឲ្យ​ពួក​គេសន្លប់ ដូច្នេះ​កម្ម​ករ​​​ទាំង​ជាង​៦​ពាន់​នាក់​ ក្នុង​រោង​ចក្រនឹង​សន្លប់​គ្រប់​គ្នា»​។

តាម​របាយការណ៍របស់​សហជីពស៊ីខៅឌូ ​​​​​ចេញ​ផ្សាយ​​កាល​​ពី​ខែ​មករា​ ស្តីអំពី​ស្ថាន​ភាព​​នៃ​សិទ្ធិ​ការ​ងារ​​នៅ​ឆ្នាំ​២០១២ បាន​រៀប​រាប់​ថា កម្មករ​ជាង​២១​០០​នាក់ បាន​​សន្លប់​ នៅ​កន្លែង​​ធ្វើ​ការ​ងារ​​ក្នុង​​រោង​ចក្រ​ជាង២០ រី​ឯ​កម្មករ​ជាង១ពាន់​នាក់​សន្លប់​កាលពី​ឆ្នាំ​​២០១១។ ចំណែក​ក្នុង​​របាយការណ៍​​ក្រសួង​ការ​ងារថា មាន​កម្មករ​១.៦៨៦នាក់ បាន​​​សន្លប់​កាលពី​ឆ្នាំ​២០១២​៕ NR

អត្ថបទគួរចាប់អារម្មណ៍