The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​១៨​នាក់ នៅ​កំពង់​ចាម​រក​អន្តរា​គមន៍​ប្រាក់​ចូល​និវត្តន៍




កម្មករ​១៨​នាក់ នៅ​កំពង់​ចាម​រក​អន្តរា​គមន៍​ប្រាក់​ចូល​និវត្តន៍

កម្មករ​១៨​នាក់ នៅ​កំពង់​ចាម​រក​អន្តរា​គមន៍​ប្រាក់​ចូល​និវត្តន៍

ភ្នំពេញៈ ប្រធាន​សហជីព​សេរី​កម្មករ​បាន​ផ្ញើ​លិខិត​មួយ​ច្បាប់​ទៅ​កាន់​ក្រសួង ការ​ងារ កាល​ពី​ម្សិលមិញ​ដើម្បី​ធ្វើ​អន្តរាគមន៍​ទៅ​ថៅកែ​រោងចក្រ​កាត់ដេរ ម៉ាន​ហាត​ថាន់ នៅ​ក្នុង​ស្រុក​កំពង់​សៀម ខេត្ត​កំពង់​ចាម ដើម្បី​អនុញ្ញាត​ឲ្យ​កម្មករ​រោងចក្រ​វ័យ​ចំណាស់​១៨​នាក់​បាន​ចូល​និវត្តន៍ និង​ទទួល​ប្រាក់​សោធនិវត្តន៍។

លិខិត​ដែល​បាន​ចុះ​ហត្ថលេខា ដោយ​លោក ជា មុនី ដែល​បាន​ផ្ញើ​ទៅ​កាន់​រដ្ឋ​មន្ត្រី​ក្រសួង​ការងារ​លោ វង សូត បាន​ស្នើ​សុំ​ឲ្យ​គាត់​ជួយ​បញ្ជា​ដល់​ថៅ​កែ​រោងចក្រ​ម៉ាន​ហាត​ថាន់ អនុញ្ញាត​ឲ្យ​កម្មករ​ចំនួន​១៨​នាក់ ដែល​មាន​អាយុ​ចាប់​ពី​៥៥​ដល់​៧៤​ឆ្នាំ​បាន​ចូល​និវត្តន៍ និង​ទទួល​ប្រាក់​សោធ​និវត្តន៍​របស់​ពួកគាត់។

លោក យេន សុឃាង ប្រធាន​សហជីពសេរី​កម្មករ​ប្រចាំ​រោងចក្រ​នេះ​បាន​និយាយ​ថា រោងចក្រ​ត្រូវ​ការ​ឲ្យ​កម្មករ​ទាំង​១៨​នាក់​នោះ​ដាក់​ពាក្យ​លាឈប់​ដោយ ខ្លួន​ឯង ពី​ព្រោះ​រោងចក្រ​មិន​ត្រូវ​ចំណាយ​ប្រាក់​សោធននិវត្តន៍​ដល់​ពួក​គាត់​ទេ។

លោកថា ៖«ពួកគេ​ចង់​ឲ្យ​ខាង​រោងចក្រ​បញ្ឈប់​ពី​ការងារ​ដើម្បី​ទទួល​បាន​ប្រាក់ ចូល​និវត្តន៍ ប៉ុន្តែ​រោង​ចក្រ​បដិសេធ មិន​បញ្ឈប់​ពួកគាត់​ទេ»។

លោក យេង សុឃាង បន្ត​ថា រោង​ចក្រ​ចង់​ឲ្យ​គាត់​លា​ឈប់​ដោយ​ខ្លួន​ឯង និង​ទទួល​បាន​ប្រាក់​ខែ​ចំនួន​ពីរ​ខែ​ទៀត បន្ទាប់​លា​ឈប់ ប៉ុន្តែ​មិន​ទទួល​បាន​ប្រាក់​អ្វី​ផ្សេង​ទៀត​ឡើយ។

កម្មករឈ្មោះ លី ជុង អាយុ​៧២​ឆ្នាំ​ធ្វើ​ការ​នៅ​រោងចក្រ​ម៉ាន​ហាត​ថាន់ បាន​ប្រាប់​ភ្នំពេញ ប៉ុស្តិ៍​កាល​ពី​ខែ​សីហា​ថា កម្មករ​ដែល​មាន​អាយុ​ច្រើន​ចង់​ឈប់​ធ្វើ​ការ ពី​ព្រោះ​ពួកគាត់​កាន់​តែ​ចាស់​ណាស់​ហើយ។ ពួកគេ​ក៏​បាន​ស្នើ​សុំ​ឲ្យ​ក្រុមហ៊ុន​បញ្ឈប់​ដែរ​ដើម្បី​ទទួល​ប្រាក់ សោធនិវត្តន៍​ទៀត។

កាលពី​ថ្ងៃ​ទី​៣ ខែ​កក្កដា មន្ត្រី​សហជីព​សេរីកម្មករ​បាន​ផ្ញើ​លិខិត​ទៅ​រដ្ឋមន្ត្រី​ក្រសួង​សង្គម​កិច្ច​និង​អតីត​យុទ្ធជន លោក អ៊ិត សំហេង ដើម្បី​ស្នើ​ឲ្យ​ជួយ​ធ្វើ​អន្តរាគមន៍​ដល់​កម្មករ​ដែល​មាន​វ័យ​ចំណាស់​ទាំង​១៨​នាក់ នោះ​ដែរ ប៉ុន្តែ​លោក រដ្ឋ​មន្ត្រី​បាន​ផ្ញើ​លិខិត​នោះ​ត្រឡប់​មក​សហជីព​សេរីកម្មករ​ដោយ​ប្រាប់​ឲ្យ​ស្នើ​ទៅ​ក្រសួង​ការងារ​វិញ។

លោក សំ សីហា ប្រធាន​រដ្ឋបាល​រោងចក្រ​កាត់​ដេរ ម៉ាន​ហាន​ថាន់ មិន​អាច​ទាក់​ទង​ដើម្បី​សុំ​ធ្វើ​ការ​បញ្ជាក់​បាន​ទេ ប៉ុន្តែ​លោក​ធ្លាប់​បាន​និយាយ​កន្លង​មក​ថា រោងចក្រ​ត្រូវ​ការ​កម្មករ​ដែល​មាន​ជំនាញ ប៉ុន្តែ​ក៏​មិន​បាន​បង្ខំ​ឲ្យ​ពួកគាត់​ជា​មនុស្ស​ចាស់​ធ្វើ​ការ​នោះដែរ៕ CC

អត្ថបទគួរចាប់អារម្មណ៍