The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ​៣​រោងចក្រ​តវ៉ា​ទាមទារ​ឡើង​ប្រាក់​ខែ




កម្មករ​៣​រោងចក្រ​តវ៉ា​ទាមទារ​ឡើង​ប្រាក់​ខែ

កម្មករ​៣​រោងចក្រ​តវ៉ា​ទាមទារ​ឡើង​ប្រាក់​ខែ

ភ្នំពេញៈ កម្មករ​កាត់​ដេរ​ជាង​១​ពាន់​នាក់ បាន​ធ្វើ​កូដកម្ម​កាល​ពី​ព្រឹក​ម្សិល​មិញ ដើម្បី​ទាម​ទារ​​ការ​ដំឡើង​ប្រាក់​ឈ្នួល​អប្បបរមា និង​ស្ថានភាព​ការងារ​ឲ្យ​បាន​ប្រសើរ បន្ទាប់​ពី​កិច្ច​ចរចា​ប្រាក់​ឈ្នួល​អប្បបរមា​ទទួល​បរាជ័យ​រវាង​សហជីព និង​ថៅកែ​កាលពី​ថ្ងៃ​ចន្ទ​។

មន្រ្តី​សហជីព​សេរី​កម្មករ​លោក យ៉ាន រ័ត្ន​កែវ​ពិសី ​បាន​ថ្លែង​ថា កម្មករ​ជាង​ ៦០០​ នាក់​នៅ​ខេត្ត​កណ្តាល​កាល​ពី​ថ្ងៃ​ម្សិលមិញ បាន​តវ៉ា​នៅ​មុខ​រោងចក្រ​ Sixplus Industry ជា​ក្រុមហ៊ុន​ផ្គត់​ផ្គង់​យីហោ Adidas ទាមទារ​ដំឡើង​ប្រាក់​ឈ្នួល​អប្បបរមា​ពី​៦១​ដល់​១២០ ​ដុល្លារ​ និង​​ប្រយោជន៍​នៅ​ថ្ងៃ​ឈប់​សម្រាក ក្នុង​ចំណោម​ការ​ទាមទារ​ផ្សេង​ៗ​ទៀត​។

មន្រ្តី ​រដ្ឋបាល​រោងចក្រ ដែល​សុំ​មិន​បញ្ចេញ​ឈ្មោះ បាន​និយាយ​កាលពី​ថ្ងៃ​ម្សិលមិញ​ថា ថៅកែ បាន​ព្រម​ដំឡើង​ប្រាក់​ឈ្នួល​អប្បបរមា​ដល់​កម្មករ​ដល់​ទៅ​៧១​ដុល្លារ​ក្នុង មួយ​ខែ ប៉ុន្តែ​កម្មករ ​មិន​ទទួល​យក ហើយ​និយាយ​ថា ពួក​គេ​នឹង​ធ្វើ​កូដកម្ម​ម្តង​ទៀត​នៅ​ថ្ងៃ​នេះ​។

ទន្ទឹម​គ្នា​នេះ​ដែរ កម្មករ​ជាង​ ៣០០ នាក់​នៅ​រោង​ចក្រ​ Complete Honour Footwear Industrial នៅ​ខេត្ត​កំពង់​ស្ពឺ បាន​បិទ​ផ្លូវ​ជាតិ​លេខ​ ៣ ​សម្រាប់​ថ្ងៃ​ទី​ពីរ​ជាប់​ៗ​គ្នា​ កាលពី​ថ្ងៃ​ម្សិល​មិញ​រហូត​ដល់​ពួក​គេដឹង​កាលពី​ល្ងាច​មិញ​ថា ​ថៅ​កែបាន​ទទួល​​យក​ការ​ទាមទារ​របស់​ពួក​គេ ​ដែល​រួម​មាន​ការ​បញ្ចប់​ការ​ធ្វើ​ការ​លើស​ម៉ោង​ដោយ​បង្ខំ និង​ការ​រើសអើង​ប្រឆាំង​នឹង​សមាជិក​សហជីព។

អធិការ​ស្រុក​គង​ពិសី​ លោក​ខែម សុផាន់រ៉ា បាន​និយាយ​ថា​៖ «​កម្មករ​ប្រហែល​ជា​ត្រឡប់​មក​ធ្វើ​ការ​វិញ​នៅ​ថ្ងៃ​ស្អែក»។

កម្មករ ប្រមាណ​ ១​ ពាន់​នាក់​នៅ​រោង​ចក្រ​ E Cheng Cambodia Cooperation ក្នុង​ក្រុង​តាខ្មៅ ក៏​បាន​តវ៉ា​ផង​ដែរ កាល​ពី​ថ្ងៃ​ម្សិលមិញ​ដើម្បី​ទាមទារ​ការ​ដំឡើង​ប្រាក់​ឈ្នួល​អប្បបរមា រហូត​ដល់​៨០​ដុល្លារ និង​ប្រយោជន៍​ផ្សេង​ទៀត​ផង​ដែរ៕ NR

អត្ថបទគួរចាប់អារម្មណ៍