ភ្នំពេញ៖ កម្មករ-កម្មការិនីប្រមាណ ២០០ នាក់បានប្រមូលផ្ដុំគ្នានៅថ្ងៃទី ១០ ខែឧសភា នៅលើកំណាត់ផ្លូវវេងស្រេង ស្ថិតក្នុងភូមិដំណាក់ធំ ២ សង្កាត់ស្ទឹងមានជ័យ៣ ខណ្ឌមានជ័យ ទាមទារ ឱ្យអាជ្ញាធររាជធានីភ្នំពេញជួយរកដំណោះស្រាយជាមួយម្ចាស់បន្ទប់ជួលក្នុងការសុំបញ្ចុះថ្លៃឈ្នួល ៥០ ភាគរយ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាប្រាប់ភ្នំពេញប៉ុស្តិ៍នៅថ្ងៃទី ១០ ខែឧសភា ឆ្នាំ ២០២១ ថាការទាមទាររកដំណោះស្រាយនេះ ដោយហេតុពួកគេបាននិងកំពុងជួបការលំបាកដោយមិនទាន់ទទួលបានប្រាក់ខែនៅក្នុងអំឡុងពេលរីករាលដាលជំងឺកូវីដ១៩។
លោក អាត់ ធន់ បន្តថា ម្យ៉ាងទៀតការទាមទារនេះធ្វើឡើងក្រោយពេលដែលលោកនាយករដ្ឋមន្ត្រី ហ៊ុន សែន បានអំពាវនាវដល់ម្ចាស់ផ្ទះជួលទាំងអស់បញ្ចុះតម្លៃដល់អ្នកជួលដែលទទួលរងការលំបាកខ្លាំង។
លោក អាត់ ធន់ អះអាងថា ម្ចាស់ផ្ទះជួលជាង ៩០ ភាគរយនៃម្ចាស់ផ្ទះនៅតែបន្តយកឈ្នួលផ្ទះពេញថ្លៃដូចមុនពេលមិនទាន់មានការផ្ទុះជំងឺកូវីដ១៩ បើទោះមានការអំពាវនាវពីនាយករដ្ឋមន្ត្រី ដោយម្ចាស់ផ្ទះជួលខ្លះគ្រាន់តែផ្ដល់ឱកាសឱ្យអ្នកជួលជំពាក់តែប៉ុណ្ណោះ។ លើសពីនេះ ក៏ម្ចាស់ផ្ទះមួយចំនួនបានបណ្ដេញអ្នកជួលចេញ ដោយមិនបានបង់ថ្លៃឈ្នួលទៀងទាត់តាមពេលកំណត់។
លោក អាត់ ធន់ ថ្លែងថា៖ «ខ្ញុំគិតថា អ្វីដែលគាត់ធ្វើបានបង្ហាញយ៉ាងច្បាស់ពីការលំបាក។ អីចឹង រឿងនេះមានតែ ២ ទេ គឺរឿងទី ១ ម្ចាស់ផ្ទះជួល គួរតែជួយសម្របសម្រួលគ្នាទៅ ដោយបញ្ចុះតម្លៃ ៥០ ភាគរយ និងទី ២ អាចពន្យារពេលក្នុងការបង់អីចឹងទៅ»។
លោក នួន ផារ័ត្ន អភិបាលរងរាជធានីភ្នំពេញបានឱ្យដឹងថា បញ្ហានេះអាចនឹងសម្របសម្រួលក្នុងការសុំចុះថ្លៃឈ្នួល ២០ ដុល្លារ គឺម្ចាស់ផ្ទះជួលចុះជូនតែមួយខែតែប៉ុណ្ណោះ ខណៈការប្រើប្រាស់ទឹកប្រចាំថ្ងៃត្រូវបានរដ្ឋាករទឹកស្វយ័តមិនគិតប្រាក់ជូនចំនួន ៣ ខែ ប៉ុន្តែសម្រាប់ការប្រើប្រាស់អគ្គិសនី គឺត្រូវគិតធម្មតា។
លោក នួន ផារ័ត្ន ក៏បានអំពាវនាវដល់កម្មករ-កម្មការិនីទាំងអស់អត់ធ្មត់ក្នុងគ្រាដែលលំបាកនេះ ព្រោះអាជ្ញាធររាជធានីភ្នំពេញបាននិងកំពុងខិតខំប្រឹងប្រែងក្នុងការទប់ស្កាត់កុំឱ្យមានការរីករាលដាលនៃជំងឺកូវីដ១៩បន្ថែមទៀត។
លោកនាយករដ្ឋមន្ត្រី ហ៊ុន សែន កាលថ្ងៃទី ៨ ខែឧសភាបានបន្តអំពាវនាវ និងសំណូមពរដល់ម្ចាស់ផ្ទះជួលទាំងអស់ ទាំងអគ្គិសនីកម្ពុជា និងរដ្ឋាករទឹក ផ្អាកយកប្រាក់ថ្លៃជួលបណ្តោះអាសន្នពីកម្មករ-កម្មការិនី ដែលរស់នៅក្នុងតំបន់ក្រហម ឬតំបន់បិទខ្ទប់ ដែលក្នុងស្ថានភាពបែបនេះ ម្ចាស់ផ្ទះសំណាក់ ផ្ទះជួល ទាំងអស់ គួរយោគយល់ដល់ការលំបាករបស់កម្មករ-កម្មការិនី ក្នុងពេលវេលាមួយដែលទាំងអស់គ្នាសុទ្ធតែជួបការលំបាក។ ក្នុងរយៈពេលកន្លងទៅនេះ ក៏មានម្ចាស់ផ្ទះមួយចំនួនបានសម្រេចមិនយកប្រាក់ឈ្នួលរបស់កម្មករ-កម្មការិនី ក្នុងចំនួនមួយរយៈ ឬក៏បញ្ចុះថ្លៃ និងមានមួយចំនួនទៀត គឺបានឱ្យប្រើប្រាស់ក្នុងរយៈពេលវែង។ ក៏ប៉ុន្ដែក៏នៅសេសសល់ម្ចាស់ផ្ទះជួលមួយចំនួនដោយខ្វះការយោគយល់ បង្កើតឱ្យមានបញ្ហាឡើង។
លោកនាយករដ្ឋមន្ដ្រីបន្តថា៖ «ពិតហើយខ្ញុំដឹងថា ម្ចាស់ផ្ទះ គឺខ្ចីលុយធនាគារយកមកសាងសង់នូវផ្ទះឈ្នួលទាំងនោះ បងប្អូនពិតជាមានការលំបាកដូចគ្នា ដែលម្ខាងជាកូនបំណុល ម្ខាងទៀតជាម្ចាស់បំណុល។ ប៉ុន្ដែសង្ឃឹមថា ម្ចាស់ផ្ទះជួលទាំងអស់នឹងអាចយោគយល់បាននូវការលំបាករួម»៕