.jpg)
កម្មករធ្វើការតវ៉ា នៅមុខរោងចក្រ នូវ ខប ដើម្បីទាមទារប្រាក់អត្ថប្រយោជន៍របស់ខ្លួន។ ANG SNUOL POST
កណ្ដាលៈ កម្មករប្រមាណជាង ២០០ នាក់ និងថៅកែរោងចក្រកាត់ដេរ នូវ ខប កាលពីម្សិលមិញបានឯកភាពគ្នាបញ្ចប់ការចរចា ដោយសម្រេចបញ្ចូនករណីវិវាទការងាររបស់ពួកគេទៅក្រុមប្រឹក្សាអាជ្ញាកណ្តាលនៃក្រសួងការងារ ដើម្បីដោះស្រាយបន្ត។
លោក ហេង សុខា តំណាងកម្មករម្នាក់ដែលបានចូលជួបចរចា បានប្រាប់ភ្នំពេញប៉ុស្តិ៍ពីម្សិលមិញថា ការចរចាលើកចុងក្រោយនេះមានតំណាងកម្មករចំនួន ១២ នាក់ និងតំណាងមកពីក្រុមហ៊ុនដែលជាជនជាតិកូរ៉េ រួមទាំងមានការសម្របសម្រួលពីប្រធានមន្ទីរការងារខេត្ត។
លោកបន្តថា៖ «ការចរចានេះ ត្រូវបានបញ្ចប់ទៅដោយគ្មានដំណោះស្រាយ»។
លោកអះអាងថា ភាពមិនចុះសម្រុងគ្នា ព្រោះនាយករោងចក្រមិនផ្តល់អ្វីលើសពី ៤៨០ ដុល្លារ ជូនកម្មករទេ ដោយម្ចាស់រោងចក្របានប្រកាសថាពួកគេមិនបិទរោងចក្រនោះទេ ដោយបន្តស្វែងរកអ្នកបញ្ជាទិញផ្សេងទៀត ដើម្បីដំណើរការរោងចក្រ។
លោក សៀង សម្បត្តិ ប្រធានសហព័ន្ធសហជីពមិត្តភាពកម្មករបានលើកឡើងថា ករណីនេះ វាអាស្រ័យទៅលើការសម្រេចចិត្តរបស់ភាគីទាំង ២ បើសិនជាការចរចាគ្មានដំណោះស្រាយ ព្រោះតែនេះគឺនីតិវិធីស្របច្បាប់។ រោងចក្របានប្រកាសរួចហើយ ថា មិនបិទរោងចក្រនោះទេ ដូច្នេះបើកម្មករទាមទារឲ្យរោងចក្រទូទាត់អត្ថប្រយោជន៍ទាំងអស់ដូច្នេះ វាជារឿងមួយដែលពិបាកហើយ។
លោកបញ្ជាក់ថាកម្មករ ១ ៤០០ នាក់ ឥឡូវនេះ ពួកគាត់ទទួលយកជាង ១ ២០០ នាក់ហើយ បានលាឈប់ទាំងអស់គ្នា ព្រោះមិនអាចរង់ចាំការព្យួរការងារពីក្រុមហ៊ុនបាន។ ហើយអ្វីដែលនីតិវិធីហ្នឹងភាគីទាំងសងខាងនៅតែអះអាងរៀងៗខ្លួន បើរោងចក្រមិនមានលទ្ធភាពទេត្រូវទូទាត់តាមច្បាប់។
កាលពីថ្ងៃទី ២៦ និង ២៧ ខែ មិថុនា កម្មកររោងចក្រ នូវ ខប ដែលមានទីតាំងស្ថិតនៅភូមិជើងអក ឃុំលំហាច ស្រុកអង្គស្នួល ខេត្តកណ្តាល ប្រមាណជាង ៤០០ នាក់ បានផ្ទុះការតវ៉ា ដើម្បីទាមទារឲ្យថៅកែរោងចក្រទូទាត់ប្រាក់អត្ថប្រយោជន៍នានារបស់ពួកគេឲ្យបានត្រឹមត្រូវ កម្មករទាំងនោះនៅតែអះអាងថា នេះគឺជាការគេចវេះរបស់រោងចក្រ ក្នុងចេតនាមិនចង់ទូទាត់ប្រាក់អតីតភាពការងាររបស់កម្មករ ដែលកម្មករខ្លះមានអតីតភាពការងារនៅក្នុងរោងចក្រនោះប្រមាណជាង ១០ ឆ្នាំមកហើយ៕
