The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ សាប្រ៊ីណា ៨ នាក់​ត្រូវ​តុលាការ​កោះ​ហៅ




កម្មករ សាប្រ៊ីណា ៨ នាក់​ត្រូវ​តុលាការ​កោះ​ហៅ

កម្មករ សាប្រ៊ីណា ៨ នាក់​ត្រូវ​តុលាការ​កោះ​ហៅ

130821_06a
កម្មកររោងចក្រ សាប្រ៊ីណា លើកគ្នាមកគាំពារកម្មករដែលត្រូវតុលាការចោទប្រកាន់ ហេង ជីវ័ន

កំពង់ស្ពឺៈ កម្មករ​រោងចក្រ សាប្រ៊ីណា ចំនួន ៨ នាក់​ដែល​រង​ការ​ចោទ​ប្រកាន់​ថា ពាក់​ព័ន្ធ​នឹង​នៅ​កូដកម្ម​ហិង្សា​មួយ​ដែល​ប៉ះ​ទង្គិច​ជាមួយ​អាជ្ញាធរ នៅ​រោងចក្រ​ផ្គត់​ផ្គង់​ឲ្យ​អ្នក​បញ្ជា​ទិញ Nike នៅ​ខេត្ត កំពង់ស្ពឺ​មួយ​នេះ ត្រូវ​ចេញ​ដីកា​កោះ​ហៅ​ចូល​តុលាការ ខណៈ​កម្មករ​ជា​កូដករ ៨ នាក់​ទៀត​ដែល​ត្រូវ​បាន​ចាប់​ខ្លួន​នៅ​កន្លែង​កើត​ហេតុ នៅ​កំពុង​ជាប់​ឃុំ​ឃាំង​ក្នុង​ពន្ធនាគារ និង​កំពុង​រង់​ចាំ​សវនាការ​នៅ​ឡើយ។

ដីកា​កោះ​ខ្លះ​ក្នុង​ចំណោម​ដីកា​ទាំង​នោះ​បាន​បញ្ជា​ឲ្យ​កម្មករ​ដែល​ចោទ​ប្រកាន់​ថា បាន​ចូល​រួម​នៅ​ក្នុង​កូដកម្ម​ហិង្សា​ដែល​បាន​កើត​ឡើង​នៅ​ថ្ងៃ​ទី២៧ ខែ ឧសភា និង​ថ្ងៃ​ទី៣ ខែ មិថុនា​ឆ្នាំ ២០១៣ នៅ​រោងចក្រ​សម្លៀក​បំពាក់ សាប្រ៊ីណា ក្នុង​ខេត្ត កំពង់ស្ពឺ ឲ្យ​ចូល​បង្ហាញ​ខ្លួន​នៅ​ចំពោះ​មុខ​ចៅក្រម​ស៊ើប​សួរ​នៅ​សប្តាហ៍​ក្រោយ។ នេះ​បើ​យោង​តាម​លោក ឈឹម ឫទ្ធី ចៅក្រម​សាលា​ដំបូង​ខេត្ត កំពង់ស្ពឺ ដែល​កាន់​សំណុំ​រឿង​នេះ​បាន​អះអាង​ឲ្យ​ដឹង​កាល​ពី​ម្សិលមិញ។

កម្មករ​ដែល​ត្រូវ​កោះ​ហៅ​ឲ្យ​ចូល​ខ្លួន​ទៅ​តុលាការ​ខេត្ត កំពង់ស្ពឺ នោះ រួម​មាន​ឈ្មោះ ជី សៀកឡា អាយុ ៣៣ ឆ្នាំ ស៊ុន វ៉ាន់នី អាយុ ៣៣ ឆ្នាំ សាយ សំបូរ, សាយ ប្រុស, ស៊ាង ហែម និង​មន្រ្តី​សហជីព​សេរី​កម្មករ​រួម​មាន ឈ្នោះ ស្រី មុំ, យ៉ាន់ រស់កែវពិសី និង​ឈ្មោះ ថន ថុល។

កម្មករ​ទាំង ៨ នាក់​នេះ គឺជា​អ្នក​ចុង​ក្រោយ​ដែល​ប្រឈម​នឹង​ការ​ចោទ​ប្រកាន់​បន្ទាប់​ពី​កូដករ​បាន​នាំ​គ្នា​ប្រើ​ដំបង និង​គប់​ដុំ​ថ្ម​ប៉ះ​ទង្គិច​ជាមួយ​នឹង​កង​កម្លាំង​សមត្ថកិច្ច​នគរបាល ដែល​ពង្រាយ​ការពារ​សន្តិសុខ​ទី​នោះ និង​ក្រុម​កម្មករ​ដែល​កំពុង​ធ្វើ​ការ​នៅ​ខាង​ក្នុង​រោងចក្រ ក្នុង​អំឡុង​ពេល​ពួក​គេ​កំពុង​ធ្វើ​កូដកម្ម​តវ៉ា​នៅ​មុខ​រោងចក្រ សាប្រ៊ីណា។ នៅ​ក្នុង​ការ​ប៉ះ​ទង្គិច​គ្នា​ដោយ​ហិង្សា​ដែល​បាន​កើត​ឡើង​នៅ​ថ្ងៃ​ទី២៧ ខែ ឧសភា និង​ថ្ងៃ​ទី៣ ខែ មិថុនា ឆ្នាំ ២០១៣ នៅ​រោងចក្រ សាប្រ៊ីណា នេះ បាន​បណ្តាល​ឲ្យ​មាន​ការ​ខូច​ខាត​ខ្លាំង​លើ​ទ្រព្យ​សម្បត្តិ​រោងចក្រ និង​បាន​បណ្តាល​ឲ្យ​មនុស្ស​យ៉ាង​ហោច ២៣ នាក់ រួម​ទាំង​នគរបាល​ម្នាក់​ផង​បាន​រង​របួស៕ PS

អត្ថបទគួរចាប់អារម្មណ៍